Uo i le Uo
Filemu e ala i le Mana o le Perisitua
Saunia e Elder Steven R. Bangerter
O Le Fitugafulu
Mai se faatalanoaga ma Lucy Stevenson Ewell.
A o ou tuputupu a’e, sa tauivi lou tino ma se faama’i pipisi e mafua mai i le toto [e le lava ona gaosia ia sela (antibodies) e puipuia le tino mai i faama’i.] Sa faigata ona ou tetee atu i siama, o lea sa ou ma’i so’o ai.
I se tasi po sa ou ala ae ai ma le tiga tele o o’u taliga. Sa matuai tiga lava sa ou faapea o le a pasae lo’u ulu! Ou te manatua le o mai o lou tina ma lou tama i totonu o lo’u potu. Sa nofo lo’u tina i autafa o le moega ma faaluelue a’u i ona lima. Ona tuu lea e lo’u tama ona lima i luga o lo’u ulu ma tuu mai ia te au se faamanuiaga faaleperisitua. I lena faamanuiaga, sa ia tau mai ai ia te a’u e silafia a’u e lo’u Tama oi le Lagi. Sa silafia e Ia lo’u tiga. Na te faamanuia a’u ia ou moe i le po atoa.
E lei pine ae ou to’a, sa ou fiamoe, ma moe i le po atoa i le leva o le taeao. Ina ua ou ala ae, sa feololo ou taliga. Ae sa tele ni tausaga sa alu faatoa ou maloloina atoatoa mai i lo’u ma’i.
I le aluga o nai tausaga na sosoo ai, sa faaauau pea e lou tama ona tuuina mai ia te au ni faamanuiaga faaleperisitua e tuuina mai ia te au le malosi. Sa ia aoaoina au, o na faamanuiaga o ni avanoa ia mo le Tama Faalelagi e talanoa mai ai ia te au. O lo’u ma’i sa avea ma se auala mo le Tama Faalelagi e fesoasoani ai i lo’u faatuatua e tuputupu ae.
O faamanuiaga faaleperisitua e avanoa mo oe ma fanau uma a le Tama Faalelagi. E eseese uma lava a tatou lu’itau. Tatou te ola i nofoaga eseese ma e eseese o tatou aiga. O nisi o outou atonu e leai se tama e mafai ona tuuina atu ia te oe faamanuiaga faaleperisitua. E mafai ona e liliu atu i ou alii o le auaunaga po o taitai o le Ekalesia.
E tasi lava le mea e tutusa mo i tatou uma lava. O le alofa o lo tatou Tama Faalelagi mo i tatou. E tutusa uma i tatou i le silafaga a le Atua. E finagalo le Tama Faalelagi e faamanuia i tatou uma e ala i Lona mana o le perisitua.
Ou te manao ia e iloa e silafia ma alofa le Tama Faalelagi ia te oe. Na te silafia lou igoa. O loo aapa atu Ona lima agaalofa ia te outou.
Ata na tusia e Ben Simonsen