O le Malo Taua
E alala le tusitala i Dar Es Salaam, Tanzania, ma Iuta, ISA.
E mafai faapefea e Amona ona fesoasoani i lona aiga e talia la latou malo taua?
“Faatu se fale, o se fale tatalo lea, … o se fale maopoopo, o se fale o le Atua” (Mataupu Faavae ma Feagaiga 88:119).
O le aoauli o le Aso Toonai. Sa manao Amona ia maua sina taimi fiafia.
“Tina,” na ia fai mai ai, “e mafai ona ou alu i fafo ma taalo?”
“E tatau ona teu muamua lou potu,” o le tala lea a Tina.
“Ae, Tina,” sa fai atu ai Amona, “e le mafai ona faatali lo’u potu?”
“Tatou te mananao e valaaulia se tasi taua e avea ma a tatou malo. O lea tatou te mananao ai i lo tatou fale ia mama ma lelei.”
“O se malo faapitoa?” Sa fai mai ai Amona. “I totonu o le tatou fale?”
“Ioe, ma e mafai ona e fesoasoani e valaaulia o ia,” o le tala lea a Tina. “Ia alu laia e teu lou potu.”
Sa fiafia Amona. E fiafia o ia e maua ni malo faaaloalogia. Sa ia mafaufau po o ai le malo. O le pulenuu? Le puleaoga mai le aoga? Atonu o le epikopo!
Sa alu atu Amona i lona potu. Na muamua ona ia maua ona totini palapala i luga o le foloa. Sa ia tuuina i totonu o le ato o tagamea. Ona faatulaga lea e Amona lana tusiaoga i luga o le kesi. Sa ia manao ia iloa e le malo o ia e fiafia e aoao ni mea fou.
O le tuafafine matua o Amona, o Angel, na sau i lona potu. “O le a lau mea o fai?”o lana fesili lea.
“Fai mai Tina o loo i ai sa tatou malo taua,” na fai atu ai Amona. “Sa ia fai mai ia te au e fesoasoani e sauni mo ia.”
Sa la tilotilo atu i luga e vaai ia Tina i le faitotoa.
“O le a se isi mea e mafai ona tatou faia e saunia ai?” Sa fai mai ai Amona. “Tatou te mananao i la tatou malo taua ia lagona le taliaina.”
“O a ni lua manatu?”
“E mafai ona tatou fai atu karibu,” o le tala lea a Amona. I le faaSuaili o lona uiga, “E talia oe i lo matou fale. E talia oe e tautala.”
“E mafai ona matou faalogo,” o le tala lea a Angel. “E taua le faalogo.”
“O ni manatu lelei na,” o le tala lea a Tina. “Sei o tatou vaai po o le a se tala a Papa (Tama) pe a oo mai i le fale.”
Pe a ma se itula, na taunuu ai Papa.
Sa faatalitali lava Amona. “Fai mai Tina o loo tatou valaaulia se malo faapitoa i lo tatou fale. O lea sa matou tapenapena ai.”
Sa ataata Tama. “Ou te fiafia. Sau. Saofai. Tatou talanoa. Angel, faamolemole sau foi ma oe.”
Ina ua faatasitasi i latou uma, sa fai mai Papa, “Sa ma talanoa ma Tina e uiga i le malo faapitoa ma le mea e mafai ona tatou faia ina ia maua ai se lagona o le taliaina o ia. Muamua, o le a ou tau atu ia te oulua po o ai le tatou malo. O le Agaga Paia lea. O Ia o se tasi o malo sili ona taua o tagata uma.”
Sa tilotilo atu Amona ma le Angel i le tasi ma le isi. E le o ia lea na faamoemoe i ai Amona!
“Ma o Ia o se malo e mafai ona tatou valaaulia ia faatasi ma i tatou i taimi uma,” o le tala lea a Tina. “Angel, ina ua uma ona e papatiso, sa faamauina oe. Ma sa tuuina atu ia te oe se meaalofa. E te manatua le mea na fai mai ai Papa i le faamanuiaga?”
“Sa fai mai o ia ia ou taliaina le Agaga Paia.”
“Sa’o lelei,” na fai mai ai Tina. “Sa valaaulia oe e talia le Agaga Paia. Ia, Amona, ina ua ou fai atu e mafai ona e fesoasoani e valaaulia o Ia, o le a le uiga o la’u tala?”
Sa mafaufau Amona. Sa ia fuafua e faia se kata e valaaulia ai le latou malo. Ae e faapefea ona ia valaaulia le Agaga Paia? “Masalo o le faia o mea ina ia lagona ai e Ia le taliaina, ou te valaauliaina ai o Ia,” o le tala lea a Amona.
“E sa’o lena!” Na fai mai ai Papa. “O se tasi o auala e mafai ona tatou valaaulia ai o Ia i lo tatou aiga o le avea lea ma fale o le maopoopo.”
“O le mafuaaga lena na manao ai Tina e teu o tatou potu?” O le fesili lea a Amona.
“Ioe!” O le tala lea a Mama. O le a se isi mea e mafai ona tatou faia e valaaulia ai o Ia e faatasi ma i tatou?”
“E mafai ona tatou tatalo,” o le tala lea a Amona. “Ma faitau tusitusiga paia.”
“E mafai ona tatou faalogologo i musika lelei,” o le tala lea a Angel. “E mafai ona tatou usuina faatasi viiga.”
“E mafai ona tatou faia le lelei ma ia le taua’imisa,” o le tala lea a Amona.
“Sa’o lelei,” na fai mai ai Tama. “A tatou taumafai e fai mea na aoao mai e Iesu Keriso, tatou te valaaulia le Agaga Paia e faatasi ma i tatou. Ma o le a Ia fesoasoani i lo tatou aiga ia avea ma se nofoaga e mafai ai ona tatou lagonaina le alofa ma le filemu.”
Sa mafaufau Amona mo se minute. “E sa’o oe Papa. O le Agaga Paia o se tasi o malo sili ona taua i malo uma!”
Ata na tusia e Mark Jarman