O Ai E Mafai Ona Tatou Fesoasoani Atu i Ai?
E alala le tusitala i Iuta, ISA.
O lenei tala sa tupu i Aukilani, Niu Sila.
Sa faasoa atu e le aiga o Tadiana le latou faatoaga. O le a la se isi mea e mafai ona latou faasoa atu?
“Fetaomi i luma ma … le alofa i le Atua ma tagata uma” (2 Nifae 31:20).
“Ua e sauni e tipi i lalo fa’i?” O le fesili lea a Tama. Na matamata Tadiana faatasi ma nai ona tei o Alicia ma Kavi. Sa faaaoga e Tama se naifi e tipi ai i lalo le aufa’i atoa.
Sa ola lelei le faatoaga i lenei tausaga! Ae o le tele o isi mea sa faigata. Sa i ai se faanofoesea i Niu Sila ona o le vairasi o le korona. Sa lei mafai e Tadiana ona vaai i ana uo pe alu i le aoga. Ae sa fiafia o ia e faaaluina le tele o taimi e faatasi ai ma lona aiga.
Na pupula tele mata o Kavi a o sioa atu i fualaauaina uma. “E le mafai ona tatou aia uma mea na mea nao i tatou!” o lana tala lea.
Sa luelue le ulu o Tina. “Ou te matea e manao i ai Tuafafine Banks. E le i mafai ona galue o ia i lana togalaau talu ona maliu lona toalua.”
“Ou te iloa o Tuafafine Finau ua tuuatoatasi foi,” o le tala lea a Tadiana. “E mafai ona ou alu e ave i ai ni fa’i!”
“O ai le isi?” Na fai mai ai Tama. Sa latou saofafai uma i lalo i le vao. Sa latou faia se lisi o tagata o e atonu e manaomia sina fesoasoani.
O le aso na sosoo ai na latou utu ai taga e tumu i fualaau aina faisua lanu meamata pei o kapisi (silverbeet), umara (pateta suamalie), ma fa’i. Sa tietie atu Tina ma Tama e taamilo i le tuaoi. Sa latou tuua se taga i fale taitasi i la latou lisi.
Sa tilotilo atu Tadiana mai le faamalama o le taavale ma vaavaai atu o loo tatala e Tuafafine Banks le faitotoa. Sa faaaoga e Tuafafine Banks lona tootoo e savali lemu atu ai agai i le ato. O lana ataata sa matuai mataina lava lea na mafai ai ona iloa atu e Tadiana a o latou malaga ese atu.
Sa lagona e Tadiana se lagona mafanafana ma le fiafia. Ae sa ia lagonaina foi sina faanoanoa laitiiti. Sa faanofoesea o ia faatasi ma lona aiga. Ae o Tuafafine Banks sa nofo na o ia. Atonu e lei talanoa o ia i se tasi i le tele o vaiaso!
“Ou te manatu e iai se isi mea e mafai ona tatou faia mo o tatou tuaoi,” o le tala lea a Tadiana. “Aisea tatou te le valaaulia ai i latou i se valaau vitio mo la tatou po mo tusitusiga paia faaleaiga?”
“O se manatu manaia tele lena!” na fai atu ai Tamā.
Ina ua latou taunuu i le fale, sa valaau Tadiana ia Tuafafine Banks. “Talofa, Tuafafine Banks! O loo faia e lo matou aiga se po o tusitusiga paia i le po nei. E te fia talanoa mai ai?”
“Ou te fiafia i ai!” O le tala lea a Tuafafine Banks. Ina ua maea lena valaau, sa tuu atu e Tadiana le telefoni ia Alicia. Sa feauauai i laua e valaauina ni tagata i le uarota ma valaaulia i latou.
O lena po sa faatalitali ai Tadiana ma le popole i le komepiuta. Mata o le a i ai tagata? Ona, taitoatasi lea ma faaali ae i luga o le lau o le komepiuta foliga o o latou tuaoi. O nisi o i latou sa faigata ona faaaoga le tekinolosi, o lea sa fesoasoani atu ai Tina ia i latou.
Sa uu i luga e se tasi o tamaitai se ipu o le hokey pokey (honeycombtoffee). “Ou te iloa e leai se tasi o outou e mafai ona tofo i lenei mea,” o lana tala lea. “Ae sa ou fiafia tele i lenei po lea sa ou kukaina ai se meaai suamalie faapitoa! Atonu e mafai ona e faafoliga o loo manogi i luga o le lau!”
Sa talie tagata uma ma talanoa e uiga i le auala sa latou faaaluina ai o latou aso. E toatele tagata sa tauivi, ae na latou fiafia uma e talanoa le tasi i le isi.
Ina ua uma ona latou talanoa, na faasoa mai e Tadiana se mau, o le 2 Nifae 31:20: “Fetaomi atu i luma ma le tumau ia Keriso, ma se susulu atoatoa o le faamoemoe, ma le alofa i le Atua ma tagata uma.”
Sa faia sa latou lesona puupuu ma sa feauauai e faitau mai tusitusiga paia. Ona faia lea e Kavi le tatalo.
“Manatua e toe o mai i le vaiaso fou!” Na fai mai ai Tadiana. Sa taitoatasi ona talotalo faatofa mai ma tuua le valaau.
Ina ua tuua e le tagata mulimuli, sa faapotopoto e Tina ma Tama le aiga i se opo tele lava. Sa fiafia Tadiana sa mafai e ia ma lona aiga ona fesoasoani i o latou tuaoi. O le a latou fetaomi uma atu faatasi i luma.
Ata na tusia e Liz Brizzi