O Le Filifiliga o Fualaau Faasaina
Pe tatau ona ou tau atu i se tasi? Sa mafaufau ai Alevini.
“Fai mea tonu; ma ia le popole” (Viiga, no. 148).
Sa tatagi le logo i le isi itu o le malaetaalo. Ua mae‘a le malologa puupuu. Sa tuu ese e Alevini lana polopasiketi ma savali atu i le potuaoga.
“Faamolemole nofo i lalo ma ave i fafo lau tusi o le matematika,” o le tala lea a lona faiaoga, o Mrs. Hall.
Sa nofo atu Alevini i lona nofoa ma aapa atu i lana ato aoga. Ona ia faalogoina lea o se tuitui i le faitotoa o le potuaoga. Sa taliina e Mrs. Hall ma amata ona talanoa ma se isi faiaoga.
Na o ni nai kesi i tua atu, sa amata ona musumusu Blake ma Jared.
“Pssst! Vaai i le mea na ou mauaina!”
“Auoi!”
“E te manao e faataitai pe a uma le aoga?”
O le a le mea o tupu? Sa mafaufau ai Alevini.
Sa tau le mafai ona ia iloa atu ia Blake ma Jared mai le tulimanu o lana vaai. Sa foliga mai o se tasi o i laua sa toso mai i fafo se tamai taga pepa i lana taga.
Faatali, o ni fualaau faasaina?!
Na televave le tata o le fatu o Alevini. Sa talanoa muamua atu ona matua ia te ia ma ona tei e uiga i fualaau faasaina. Sa ia iloa o fualaau faasaina sa le tusa ai ma le Upu o le Poto, ma e mafai ona afaina ai lou tino ma le faiai. Na ia iloa foi e le saogalemu le inuina o ni vailaau e te le onaina.
O le a le mea e tatau ona ou faia? Na mafaufau ai Alevini. Sa tilotilo solo o ia. O na fualaau faasaina e mafai ona afaina ai se tasi! Sa leai se tasi o isi tamaiti na foliga mai sa gauai atu. Pe tatau ona ou tau atu i se tasi? Pe na o le faafoliga ou te le o vaai i ai?
Sa le mafai ona ua’i atu Alevini i le taimi o le matematika. Sa le mafai ona ia taulai atu i le taimi o le faitusi. E oo atu i le malologa o le aoauli, sa ia lagona e pei o loo saofai se maa i lona manava.
“O LELEI oe?” o le fesili lea a lana uo o Mitch.
Sa faamimigi Alevini.
“O Lea le mea ua tupu? Tau mai ia i matou,” o le tala lea a lana uo o Hazel.
O lea na faamatala atu ai e Alevini ia i latou le mea na ia vaai i ai. “Ou te manatu e tatau ona ou tau atu ia Mrs. Hall.”
“Ae faapefea pe a latou iloaina o oe?” Na fai mai ai Mitch. “Atonu latou te matua feita lava ia te oe.”
Sa ioe atu Alevini. Ae sa le mafai ona aluese le lagona faaletonu i lona manava. Mulimuli ane na ia faia se faaiuga. O le a ia tau atu i lo latou faiaoga.
“O le a ou alu faatasi ma oe!” na fai mai ai Hazel.
Na maua e Alevini ma Hazel ia Mrs. Hall i lona potuaoga.
“Mrs. Hall?” Na fesili atu ai Alevini. “E mafai ona ma talanoa ma oe na’o oe?”
“Ioe,” o le tala lea a Mrs. Hall. “E mafai faapefea ona ou fesoasoani ia te oe?”
“A … ,” o le tala lea a Alevini. Sa ataata ma le agalelei Mrs. Hall. O lena mea na ia lagona ai le lototoa. “Sa ou vaai i ni fualaau faasaina ia Blake ma Jared i le vasega i le aso. Sa ou lagona e pei e tatau ona ou tau atu ia te oe. ”
“Ua e faia le mea sao,” o le tala lea a Mrs. Hall. “E mafai lava ona e sau e talanoa mai ia te au pe a e vaai i se faafitauli. O le a ou foia.”
Sa mapuea leotele Alevini. Na mou ese le lagona mamafatu.
I lena aoauli, sa oo atu ai le fesoasoani o le puleaoga i lo latou potu ma valaau atu ia Blake ma Jared e o mai i fafo i le faletele.
E lei toe foi mai tama i le vasega mo aso e tolu.
Ina ua iu ina la toe foi mai, sa popole Alevini ina ua toe vaai ia i laua.
Ae faapefea pe afai la te iloa ane o ia lea sa ta’uina i le faiaoga? na ia mafaufau ai. Ae faapefea pe afai ua la feita tele ia te au?
Ae sa laua nonofo ma talasua i le tasi ma le isi, e pei ona masani ai.
“O fea sa lua i ai?” o le fesili lea a le isi tamaitiiti o le vasega ia i laua.
“Oi … oi … Sa maua ni mea leaga ia ma’ua i le aoga,” o le tala lea a Blake. “O lea na tutuli ai maua i le fale.”
Sa talatalanoa tagata uma, ma iu ai ina toamalie Alevini. Sa fiafia o ia ona sa ia talanoa atu e uiga i fualaau faasaina e fesoasoani ai e faatumau le saogalemu o isi. Sa ia manao e fai ni filifiliga lelei e tausia ai le saogalemu ma le maloloina o lona tino.
Ata na tusia e Mark Robison