Tusia e Oe
Faamafanafanaga mai le Uo
I se tasi aso sa vili la’u uila mai le aoga i le fale. Ina ua ou latalata atu i lo’u fale, sa ou vaaia lo’u Tina o uuina le matou tama’i ta’ifau fou. Sa ou fiafia e vaai ia i laua, o lea sa vave ai ona ou tuleieseina la’u uila. Na faafuasei lava, ona ou faalogoina se paleotele! Sa lagona le tiga i lou lima taumatau atoa. Sa tau le mafai ona ou siia i luga.
Sa momoli au e lo’u tina i le falemai. Ina ua ma taunuu, sa faia e le fomai se faata o lo’u lima. Sa fai mai o ia o loo i ai se fula(cyst) i lo’u ponaivi. Ou te lei iloa po o le a lena mea, o lea sa ia faamalamalama mai ai. “O se fula(cyst) o le ponaivi o se vaega o le ponaivi e papau ma tumu i le vai,” o le tala lea a le fomai. “O le mea lena sa faigofie ai lava ona gau.”
Na fai mai le fomai e ono manaomia le faia o so’u taotoga. Na foliga taufaafefe lena mea. Sa ia tau mai ia i maua o le a matou toe feiloai i ni nai vaiaso e filifili ai pe ou te manaomia se taotoga pe leai. Seia oo i lena taimi, e manaomia ona ou faia se siligi mo lo’u lima. I le toe foi ai i le fale, sa faaauau ona ou faia tatalo i lo’u mafaufau. Tama Faalelagi, faamolemole fesoasoani mai ia te au ia lototele. E matuai taufaafefe lava lenei mea. Faamolemole fesoasoani mai ia ou toafilemu.
I se masina mulimuli ane, sa ou toe alu ai e vaai le fomai e pei ona faatonuina e vaai pe ou te manaomia se taotoga. Sa ou fefe pea. Sa faatoa sau lava le mekasini o le Uo mo le masina, ma sa amata ona ou faitau i ai. O le ata komi o Matt ma Mandy sa faatatau i le auala na gau ai le lima o Matt (Oke. 2019). Sa tatau ona faia sona taotoga. E faapei lava o a’u!
Ina ua uma ona ou faitauina, sa ou lagonaina le filemu. Sa ou faia se tatalo e faafetai atu ai i le Tama Faalelagi mo le tali mai i la’u tatalo. Sa ou iloa e mafai ona ou toa e tusa lava po o le a le mea e tupu. Sa ou faafetai foi i le Tama Faalelagi mo le faalogo mai i taimi uma ia te au ma le i ai iina mo au, e pei o se uo moni.
Ata na tusia e Katie Kath