Pagbutang og Kolor sa Laay nga Adlaw
Ang pagpanghatag og mga hulagway ngadto sa mga silingan makalingaw kaayo!
Nagreklamo si Clara. “Walay pwede nga mahimo!”
Daghan kaayo nga mga butang ang gusto niya nga buhaton. Apan dili niya mahimo. Gusto siya nga molangoy. Apan sirado ang swimming pool. Gusto siya nga magdula sa iyang mga dulaan. Apan gipangputos pa kini. Gusto niyang makigdula sa iyang mga higala. Apan ang iyang pamilya bag-o lang nga nibalhin. Karon nagpuyo sila sa usa ka apartment diin wala sila makaila sa ilang mga silingan.
“Nganong dili man lang ka magkolor og hulagway?” Nangutana si Mama.
“Laay man kana,” miingon si Clara.
Apan ang iyang manghod nga lalaki, si Ben, milukso. “OK!” miingon siya. Midagan siya ngadto sa lamesa ug nakakita og mga krayola. Nagdrowing siya og kahoy ug yellow nga adlaw.
“Gusto nakong ihatag kini sa atong silingan,” miingon siya.
Nagmug-ot si Clara. “Apan wala kita makaila sa atong mga silingan.”
“Kon mao ato silang ilailahon!” Miingon si Mama.
Si Ben ug Mama migawas sa atubangan nga pultahan. Nanuktok sila sa pultahan sa tabok sa hawanan. Nitan-aw si Clara gikan sa pultahan.
Usa ka babaye ang mitubag. Gihatag ni Ben sa babaye ang hulagway. Mipahiyom ang babaye. “Salamat,” miingon siya.
Gibantayan ni Clara si Ben nga mibalik sa lamesa nga dunay dako nga pahiyom. Tingali ang pagkolor dili gayod daotan, naghunahuna siya.
Mitupad si Clara ni Ben. Silang duha ang nagkolor sa usa ka hulagway. Nagdrowing si Clara og usa ka rocket ship ug daghan nga bitoon.
Gihatag nila ang ilang mga hulagway ngadto sa duha pa ka silingan. Dayon nagkolor pa sila og dugang. Nanghatag sila og mga hulagway sa tibuok hapon. Ang ubang tawo makita nga naguol sa pag-abli nila sa pultahan. Apan sa dihang ilang nakita ang hulagway, mipahiyom sila. Si Clara ug Ben nakailaila pa gani og pipila ka bata nga nagpuyo sa gambalay [building] sa apartment.
Sa dihang nahuman sila, gigunitan ni Clara ang kamot ni Mama. “Makalingaw kaayo kadto.”
Mipahiyom si Mama. “Kon mohimo kita og nindot nga butang alang sa usa ka tawo, makapalipay kini nila. Makapalipay usab kini nato. Ug labaw sa tanan, makapalipay kini sa Langitnong Amahan.”
“Tingali ugma atong hangyoon ang uban nga mga bata nga magkolor kauban nato,” miingon si Clara.
“Murag maayo kaayo kana nga ideya.”
Mipahiyom si Clara. Ang pagkolor ug pagpanghatag og mga hulagway makalingaw. Ang iyang laay nga adlaw nahimo nga malipayon!