Imong Sinulat

Drama sa Likod sa Entablado

Paisley B., edad 12 anyos, Utah, USA

Ang akong manghod nga lalaki kataw-anan, maayo kaayo og imahinasyon, ug manggihuna-hunaon sa uban. Usa siya sa akong labing unang magdadayeg kon mopasundayag ko sa entablado. Aduna usab siyay espesyal nga mga panginahanglan. Gamay kaayo siya para sa iyang edad ug maglisod siya sa pagbasa, pagsulat, pagsulti, ug usahay pagsabot sa uban. Bungol usab siya.

Usa ka adlaw panahon sa praktis, misaka ko sa hagdanan aron moadto sa entablado. Nakadungog ko og usa ka tawo nga nagbugal-bugal sa mga bata nga adunay mga kakulangan. Ang tanan nagsugod sa pagkomedya ug pagpangatawa bahin niini.

Nasayod ko nga wala silay tuyo nga pasakitan ko, apan naguol kaayo ko ug midagan ko aron mangita og katagoan. Samtang naglingkod ko sa akong tagoanan, usa ka hamtong nga tawo milingkod sa akong tapad ug misugod sa pagpakigsulti kanako bahin sa pasundayag sa entablado. Miarang-arang ang akong gibati.

Sa dihang namauli na mi, akong gisultihan ang akong mama sa nahitabo. Gisultihan ko niya nga OK ra kon mopalayo ko kon adunay usa ka butang nga makapahiubos nako ug OK ra nga makig-istorya sa usa ka hamtong kabahin sa akong mga pagbati.

Usahay ang mga tawo dili makasabot kon unsay bation sa dunay espesyal nga mga panginahanglan o dunay kaila nga tawo nga dunay espesyal nga mga panginahanglan. Gusto kong mahimong ehemplo sa gugma ug pagkamabination.

Paghulagway pinaagi ni Kristin Sorra