Mga Pioneer sa Matag Yuta
Ang Unang Pakigpulong ni Moira
Nahibalo siya nga mahimo niya kini uban sa tabang sa Langitnong Amahan.
Si Moira nikanta og hinay samtang siya ug si Mamá nilakaw pagawas sa chapel. Bag-o lang nahuman ang simba.
“Hi, Moira,” miingon si Presidente Scott. Si Richard G. Scott mao ang presidente sa misyon sa Argentina, diin nagpuyo si Moira. “Mahimo ba nga mohatag ka og pakigpulong sa komperensiya sa district sunod bulan?”
Si Moira milad-ok. Siya 12 anyos pa lang, ug wala pa gayod siya makahatag sukad og pakigpulong! “Sulayan nako,” miingon siya.
Si Presidente Scott mipahiyom. “Salamat! Mahimong maayo kaayo ang imong buhaton.”
Sa dalan pauli gikan sa Simbahan, kusog kaayo nga mipitik ang kasingkasing ni Moira. “Wala ko masayod kon mahimo ba kana nako,” miingon siya.
“Ang Langitnong Amahan motabang nimo,” miingon si Mamá. “Mitabang Siya nimo nga makahimo og lisod nga mga butang kaniadto, dili ba?”
Mitando si Moira. Ang Langitnong Amahan naka tabang niya kaniadto. Sama sa dihang siya ug si Mamá mipasakop sa Simbahan usa ka tuig na ang milabay.
Si Moira mahinamon kaayo nga mosulti sa iyang suod nga higala, si Dorita, kabahin sa iyang pagbunyag. Apan sa dihang nahibaloan sa mga ginikanan ni Dorita, dili na nila tugotan si Dorita nga makigdula ni Moira. Gibati ni Moira nga nag-inusara kaayo.
Apan ang Langitnong Amahan mitabang kaniya nga makahimo og bag-ong mga higala. Sa iyang labing unang Dominggo sa simbahan, nakakita siya og batang babaye nga nagbarog sa pultahan.
“Hi,” miingon ang batang babaye. “Ako si Carmen. Ganahan kang molingkod tupad nako?” Sa wala madugay si Carmen ug Moira nahimong maayo nga managhigala.
Si Moira kinahanglan nga mahimong isog aron makigpulong sa komperensiya sa district. Apan nahibalo siya nga mahimo niya kini uban sa tabang sa Langitnong Amahan. Sa misunod nga pipila ka semana, gihagoan gayod ni Moira ang iyang pakigpulong. Iyang gisulat kon unsa ang iyang isulti. Dayon, nagbansay siya sa pagsulti niini og kusog.
Sa kataposan miabot ang adlaw alang sa iyang pakigpulong. Si Moira milingkod sa atubangan ug mitan-aw sa tanan nga tawo nga naa sa chapel. Dihay daghan kaayo!
Dayon si Moira nakabantay og usa ka tawo nga mikamay kaniya. Si Carmen kadto! Mibalos og kamay si Moira. Ang pagkakita sa iyang higala sa pundok nakapaarang-arang sa iyang gibati.
Sa dihang higayon na niya, miduol si Moira ngadto sa mikropono. Miginhawa siya og lawom. Dayon iyang gihatag ang iyang pakigpulong. Nagkurog ang iyang tingog sa pagsugod. Apan mabati niya ang Espiritu Santo nga nagtabang kaniya. Sa pagtapos, iyang gipaambit ang iyang pagpamatuod. “Nasayod ko nga si Jesus buhi ug nagmahal kanato. Sa ngalan ni Jesukristo, amen.”
Human sa miting, ang tanan migawas alang sa piknik nga paniudto. Nakit-an ni Carmen si Moira ug migakos kaniya. “Nindot kaayo ang imong nabuhat!” miingon siya.
“Salamat! Nahadlok ako apan ang Langitnong Amahan mitabang gayod nako.” Mipahiyom si Moira. Nakahimo siya og usa ka butang nga wala niya mahimo sukad, ug kana nakapahimo niya nga pioneer.
Ang Argentina mao ang ikaduha sa labing dako nga nasod sa Habagatang Amerika.
Sa dili madugay aduna nay lima ka templo sa Argentina.
Ang Argentina adunay sobra sa 30 ka nasodnong parke.
Si Elder D. Todd Christofferson usa sa mga misyonaryo nga nagtudlo ni Moira ug sa iyang pamilya.
Sa dihang 12 si Moira, siya mao ang secretary sa Primary sa iyang branch.
Karon, si Moira nagtrabaho alang sa Simbahan sa Utah, USA.
Mga paghulagway pinaagi ni Christopher Thornock