Higala ngadto sa Higala

Walay Dapit nga Ikatandi sa Panimalay

Ni Amy A. Wright

Ikaduhang Magtatambag sa Kinatibuk-ang Kapangulohan sa Primary

Gikan sa usa ka interbiyo ni Sydney Walker.

Ang lola sa lola sa lola sa akong lola mao si Mary Wilson Montgomery. Natawo siya sa Scotland. Siya ug ang iyang bana, si Robert, misakay og barko padulong sa Canada aron mangita og bag-ong mga kahigayonan.

Niadtong tingpamulak sa 1845, nahimamat nila ang mga misyonaryo. Niana nga tingtugnaw, si Mary ug Robert andam na nga mopasakop sa Simbahan. Gikinahanglan pa nilang buslotan ang ice aron sila mabunyagan!

Si Mary ug Robert mibalhin ngadto sa Nauvoo, Illinois, USA, aron makig-uban sa ubang mga miyembro sa Simbahan. Apan sa wala madugay gipugos sila sa pagbiya sa ilang mga panimalay. Miadto sila sa Utah sakay sa may atop nga karwahe. Mipuyo sila sa North Ogden sa tiilan sa bungtod. Nagpahinumdom kadto ni Elizabeth sa usa ka bungtod didto sa Scotland nga ginganlan og Ben Lomond (Beacon Mountain). Iyang gihangyo ang mga lider sa siyudad nga nganlan usab kini nga bungtod og Ben Lomond. Misugot sila.

Dihang nagdako ko, ang akong mga apohan nagpuyo sa tiilan sa bungtod sa Ben Lomond sa Utah. Kasagaran moadto mi sa ilang panimalay aron magsaulog sa mga holiday ug espesyal nga mga kalihokan. Panahon sa tingtugnaw, ang snow sa bungtod murag nawong sa tawo kon tan-awon. Ang akong lola misulti nako nga ang bungtod nagpahinumdom niya nga magmalig-on, maisogon, ug matinud-anon, sama ni Mary. Miingon siya nga sama kini sa usa ka anghel nga nagbantay namo. “Samtang makita pa nimo ang Ben Lomond,” miingon siya, “anaa ka sa panimalay.”

Naghunahuna ko nga ang mga templo sama sa Ben Lomond. Sila nagpahinumdom kanato nga mamalig-on, maisogon, ug matinud-anon. Kon motan-aw kita sa templo, kita makahinumdom sa atong langitnon nga panimalay. Ug walay dapit nga ikatandi sa panimalay!

Paghulagway ni Augusto Zambonato