Ang Pangutana Kabahin sa Video
Si Josué nagkinahanglan og mga tubag, apan kinsa ang iyang pangutan-on?
Si Josué misulod sa internet café. Ang mga computer naglinya sa bungbong ug ang mga tingog sa mga zap ug mga ping gikan sa mga video game mipuno sa lawak. Wala siyay computer sa balay, mao nga dinhi siya mopaingon aron makagamit og usa. Dili na siya makahulat aron makatan-aw og pipila ka makalingaw nga mga video!
Ang iyang higala nga si Carlos miabot diha sa iyang luyo. Si Josué mihatag sa tag-iya og pipila ka kwarta. Dayon siya ug si Carlos nakakita og computer nga magamit.
Sa sinugdanan si Josué nangita og kataw-anan nga video nga giistorya sa iyang higala sa eskwelahan. Dayon si Carlos mipili og video nga tan-awon. Padayon sila nga nagpuli-puli.
“Tan-awa, kining usa kabahin sa Simbahan,” miingon si Josué. Iyang gi-klik ang video ug nagsugod sa pagtan-aw.
Ang tawo sa video nagsulti og makalibog nga mga butang kabahin sa Simbahan. Miingon siya nga ang Simbahan dili tinuod. Ang video nakapahimo sa sulod sa lawas ni Josué nga mabati nga mura og gikumot.
“Nagtuo ba ka nga tinuod ang gisulti sa tawo?” Nangutana si Josué sa dihang nahuman na ang video.
Milingo-lingo si Carlos. “Nagtuo ba ka nga ang iyang gisulti tinuod?”
Nagmug-ot si Josué. Nag-ampo siya nga mahibalo nga ang Simbahan tinuod ug maayo ang iyang gibati kabahin niini. Kanunay siyang mobati og kalinaw kon siya moadto sa simbahan o mobasa sa iyang mga kasulatan. Apan wala siya kahibalo kon unsa ang hunahunaon kabahin sa iyang nadungog sa video.
Nianang gabhiona, si Josué naglimbag-limbag sa iyang higdaanan. Dili siya makatulog! Daghang pangutana ang misantop sa iyang ulo. Apan kinsa man ang iyang pangutan-on? Si Papá dili miyembro sa Simbahan, ug si Mamá bisi kaayo sa pagtrabaho. Walay pwede nga makaistorya.
Pagkasunod adlaw sa eskwelahan, si Carlos adunay dako nga pahiyom sa iyang nawong. “Nangutana ko ni papa kabahin sa giistorya sa tawo diha sa video. Iyang gitubag ang tanan nakong pangutana.”
Mituyhakaw si Josué. “Mao ba? Sa imong hunahuna mahimo ba kong makig-istorya sa imong papa kabahin usab niini?”
“Oo! Adto sa among balay human sa klase, ug mahimo kita nga makig-istorya sa akong papa.”
Ang nahabiling oras sa klase hinay nga milabay. Si Josué dili mahimutang sa iyang lingkoranan. Naglisod siya sa pag-pokus. Ang tanang pangutana nga mitumaw sa iyang ulo mahimo na nga matubag!
Human sa klase, si Brother Zavala, ang papa ni Carlos, milingkod uban ni Josué ug Carlos. Nag-istorya sila sa taas nga higayon kabahin sa video. Si Brother Zavala adunay tubag sa tanan nga pangutana ni Josué!
“Nahingawa ko nga dili ka makahibalo sa mga tubag sa akong mga pangutana,” miingon si Josué.
“Bisan kon wala ako kahibalo, ang Langitnong Amahan kanunay nga adunay mga tubag,” miingon si Brother Zavala.
“Apan sa matag higayon nga mag-ampo ko aron mahibalo sa usa ka butang, aduna lang koy pagbati. Wala gayod akoy madawat nga tubag,” miingon si Josué.
“Usahay ang pagbati mao ang atong tubag,” miingon si Brother Zavala. “Mahimo kitang padayon nga mosiksik sa mga kasulatan ug mag-ampo alang sa panabot. Ang mga tubag tingali dili moabot dihadiha dayon, apan OK ra kana. Ang Langitnong Amahan nakahibalo sa tanang butang nga wala nato mahibaloi. Ug ang Espiritu Santo makatabang nato nga mobati og kalinaw.”
Sa nahabilin nga mga oras sa adlaw si Josué naghunahuna kabahin sa unsay gisulti ni Brother Zavala. Nianang gabhiona, miluhod siya aron mag-ampo. “Langitnong Amahan,” miingon siya, “tinuod ba ang gisulti ni Brother Zavala? Dili ko gustong mobati og kalibog.”
Si Josué mibati og kalinaw ug kamalipayon. Siya mapasalamaton nga siya padayon nga makapangutana. Ug siya nalipay nga ang Langitnong Amahan mihatag kaniya sa tubag nga iyang gikinahanglan.