Ang Lumba sa Pagpangahoy
Ang propeta miingon nga kinahanglang dili kita mohunong sa pagpangandam.
Ang mga tiil ni Luke mipalagubo sa yuta. Mipasiplat siya nga naglingi. Ang iyang igsoon, si Robert, naggukod niya!
“Dakpan! Ikaw ang hago!” Miingon si Robert.
Miagik-ik og katawa si Luke. Iyang gigukod ang iyang magulang nga igsoong babaye, si Mili.
Human sa dula, ang tanan milingkod aron mopahulay.
“Unsa ang atong dulaon karon?” Nangutana si Mili.
Nalipay si Luke nga aduna siyay kadula nga mga igsoon. Apan ang COVID-19 nakapausab og daghang mga butang. Dili sila mahimong moadto og mga lugar nga daghan og tawo. Ug usahay, dili gani sila tugotan nga mogawas.
Si Luke misulay sa paghunahuna og usa ka dula nga ilang madula. Dayon nakahunahuna siya og usa ka butang nga iyang nadunggan sa Primary.
“Morag kinahanglan ta nga mobuhat og usa ka butang aron maandam,” miingon si Luke.
“Unsay buot nimong ipasabot?” Nangutana si Mili.
Mitan-aw si Luke sa mga kahoy nga bayabas sa palibot sa ilang balay. “Ang propeta miingon nga kinahanglang dili kita mohunong sa pagpangandam. Tingali puwede tang mangahoy karong adlawa. Maghimo ta og dula kon kinsa ang makakuha og labing daghan!”
Si Luke ug ang iyang mga igsoon naglumbaay padulong ngadto sa mga kahoy duol sa ilang balay. Si Luke mibutang og mga lipak sa iyang mga kamot ug mibalik og dagan aron ipundok ang iyang mga kahoy didto sa pasilongan. Dihang miabot ang iyang mga igsoon didto, iya silang gitabangan sa pagpundok usab sa ilang kahoy. Nagsige sila og dagan pabalikbalik hangtod nga nakatigom sila og dako kaayo nga pundok.
“Sakto na kini nga gamiton para pangluto sa usa ka semana!” Miingon si Mili.
“Lingawa ato oy,” miingon si Robert. “Ganahan ko nga mahimong andam!”
“Ako sad,” miingon si Luke. Ganahan siya nga makahimo og lain pa nga butang aron mahimong andam.
Pagkasunod siya ug ang iyang igsoong lalaki ug babaye nagtamon og bele (berde nga utanon) sa ilang garden. Giputol ni Luke ang mga punoan sa gulang na nga mga tanom aron makapananom sila ug makapatubo og daghan pa.
Samtang nagtrabaho sila, ang ilang mga apohan ug mga ginikanan migawas sa balay.
“Kamo ra ang nagtanom sa bele?” Nangutana si Lolo.
“Oo,” miingon si Luke. “Ug naa pod tay sugnod!”
“Salamat,” miingon si Papa. “Bisi kaayo ko karong adlawa. Dili gyod ko makahimo niana.”
Nianang pagkahapon, si Luke naglingkod sa sulod sa balay uban sa iyang pamilya. Nakadungog sila og pahibalo sa radyo nga ang tanan kinahanglan nga magpuyo sa balay sulod sa upat ka adlaw aron mahunong ang COVID-19 sa pagdaghan. Walay bisan usa nga tugotan nga mogawas sa ilang panimalay.
“Maayo kay nangahoy ta karong adlawa. Dili na unta ta makahimo karon,” miingon si Mili.
Mipahiyom si Luke. Nalipay siya nga nakasunod sila sa imbitasyon sa propeta nga mangandam.