Ang Lista sa Magulang nga Lalaki
Ang manghod nga babaye ni Andrew, si Samantha, pirming magdula sa iyang mga butang.
“Nganong manghilabot man siya sa akong mga butang?” nangutana siya ni Mama.
“Gamay pa si Samantha. Nagkat-on pa siya,” miingon si Mama. “Apan gihigugma ka niya.”
Nahibalo siya niana. Apan wala kini makahupay sa iyang gibati. Gikapuyan na siya sa pagpakigbahin.
Gikuha ni Andrew ang iyang mga krayola. Nagdrowing siya og hulagway sa iring sa iyang lola. Dayon iyang gipangita si Mama.
“Mahimo ba nakong ipadala ang akong hulagway ngadto ni Lola?” nangutana siya.
“Nindot kana nga ideya,” miingon si Mama.
Sa dihang mibalik si Andrew, nagkolor pud si Samantha sa hulagway.
“Imo man nang giguba!” misinggit siya.
Nagsugod sa paghilak si Samantha. Naguol si Andrew. Wala niya tuyoa nga pahilakon siya.
“Pasayloa ko,” miingon siya ni Mama. “Apan gikapoyan na ko sa pagkamagulang nga lalaki.” Kahilakon na pud siya.
Gigakos ni Mama si Andrew. “Naguol ko nga iyang gidrowingan ang imong hulagway. Ang pagkamagulang nga lalaki mahimong lisod. Akong sultihan si Samantha kabahin sa dili paghilabot sa imong mga butang kon dili mananghid. Ug basin makalista ta og pipila ka butang nga ganahan nimo buhaton uban niya. Dayon kon masuko ka niya, mahimo nimong buhaton ang usa sa mga butang nga naa sa lista.”
Naghunahuna si Andrew mahitungod niini. Dayon mitando siya.
Si Andrew ug si Mama nagtinabangay sa paghimo sa lista.
Ganahan ko nga makigdula ni Samantha.
Ganahan ko nga pagamiton siya sa akong mga dulaan usahay.
Ganahan ko kon gakson ko ni Samantha.
Ganahan ko nga magbasa og libro ngadto niya.
Gihuman ni Andrew ang iyang lista. Dayon gigakos niya si Samantha. Daghang maayong mga butang ang pagkamagulang nga lalaki!