“Ko e Angaʻofa ʻi he Kalosoló,” Kaumeʻá, Māʻasi. 2023, 28–29.
Ko e Angaʻofa ʻi he Kalosoló
Naʻe fakaʻamu ʻa Tamieni naʻe ʻikai ke ne kaikaila ki hono tuofefiné.
ʻI he taimi naʻe hū atu ai ʻa Tamieni ki he paʻaké, naʻá ne fanongo ki ha tā fasi hiva fakafiefia. Naʻe ʻave ia ʻe heʻene kui fefiné mo hono kiʻi tuofefine ko ʻĀtelí, ke heka ʻi he kalosolo naʻá ne saiʻia taha aí. Naʻe fai ha kiʻi vaʻinga fakalata ai, ne fakaʻaonga ki ai ha ngaahi foʻi mama. Naʻe fiefia ʻa Tamieni ke fakaʻaliʻali kia ʻĀteli ʻa e founga vaʻingá.
Ne ʻikai fuoloa kuó na tuʻu laine. Naʻe lahi mo lanu kehekehe ʻa e kalosoló, pea lahi e fanga kiʻi hoosi tā tongitongí. Naʻe tangutu e kau leka mata malimalí ʻi he fanga kiʻi hōsí mo taʻataʻalo holo ʻi heʻenau heka takatakaí.
“Kapau te ke fili ha kiʻi hoosi ʻi he tafaʻaki ki tuʻá, te ke lava ʻo vaʻinga ʻi he kiʻi vaʻinga ʻoku fakaʻaongaʻi ki ai e foʻi mamá!” Ko e talaange ia ʻe Tamieni kia ʻĀtelí. “Sio ki he fanga kiʻi vaʻakau ʻoku pukepuke ʻe he kau leká? Pea sio ki he siana ʻoku ʻi ai e ngaahi foʻi mamá?”
Naʻe tuhu ʻa Tamieni ki he tokotaha ngāué. Naʻá ne tuʻu ʻo ofi ki he kalosoló ʻo puke hake ha foʻi mama. ʻI heʻenau heka hake ʻi he kalosoló, ne feinga e fānaú ke fakahū ʻa ʻenau vaʻakaú ʻi he foʻi mamá ke maʻu ia. Ko e taimi kotoa pē naʻa nau maʻu ai ha foʻi mama, naʻe puke hake ʻe he tokotaha ngāué ha foʻi mama foʻou.
Naʻe pasipasi ʻa ʻĀteli. Naʻá ne pehē mai, “ ʻOku ou fie maʻu e ngaahi foʻi mamá kotoa!”
Faifai peá na aʻu ki muʻa ʻi he lainé. Ka naʻe toe pē ha hoosi ʻe taha ʻi he kalosoló.
Naʻe pehē atu ʻena Grand-mère (kui fefiné) “Tamieni, fēfē ke ta tuku ange kia ʻĀteli ke ne maʻu e faingamālie fakaʻosí, he kuo teʻeki ai ke ne heka ai kimuʻa? Te ke lava koe ʻo heka he meʻa hokó.”
Naʻe tali atu ʻe Tamieni, “Sai ia.” Naʻá ne siofi hono tokoniʻi ʻe he tokotaha ngāué ʻa ʻĀteli ke heka ki he kiʻi hoosi lanu koko ngingilá. Ne ʻoange leva ʻe he tokotaha ngāué ha vaʻakau kia ʻĀteli ke heuʻi ʻaki ha ngaahi foʻi mama.
Naʻe kamata ʻa e fasí, pea kamata ke vilo takai ʻa e kalosoló. Naʻe tuʻu pē ʻa Tamieni mo Grand-mère mei he tafaʻakí ʻo siofi ʻa ʻĀteli. Ka naʻe puke fakaholomui ʻe ʻĀteli ia e vaʻakaú! Naʻe totonu ke ne puke ʻi he muiʻi-ʻakau fōlahí, ka naʻá ne puke ʻe ia e muiʻi-ʻakau ʻa ia naʻe lōloa mo fōsiʻi ki hono heuʻi ʻaki ʻo e ngaahi foʻi mamá.
Naʻá ne kaila atu, “ʻĀteli, fulihi hoʻo vaʻakaú!” Ka naʻe hangē naʻe ʻikai ongoʻi ʻe ʻĀteli ia ʻene uí koeʻuhi ko e longoaʻá. ʻI heʻene fakalaka atu he foʻi mamá, naʻe pā atu ʻene vaʻakaú ki ai. Ka naʻe fuʻu fōlahi ʻa e kaú ke hao ki loto he foʻi mamá.
“ʻĀteli, hoʻo vaʻakaú!” Ko e toe feinga atu ia ʻa Tamiení. “ʻE ʻikai te ke lava ʻo maʻu ha ngaahi foʻi mama kapau te ke puke peheʻi ia!”
Ka naʻe ʻikai ongoʻi ia ʻe ʻĀteli. Naʻá ne malimali pē mo kata ʻi he vilovilo ʻa e kalosoló. Naʻe toutou patō ʻene vaʻakaú ʻi he foʻi mamá. Naʻe ʻikai pē ke ne maʻu ha foʻi mama ʻe taha.
Naʻe māpuhoi ʻa Tamieni. Naʻe maumauʻi ʻe ʻĀteli hono taimi [heka he kalosoló]! Kapau naʻá ne heka ʻi he kalosoló, te ne maʻu kotoa e ʻū mamá.
ʻI he ʻosi e takai [ʻa e kalosoló], naʻá ne lele atu kia ʻĀteli.
Naʻá ne kaila atu, “Naʻá ku ʻosi tala atu ʻa e founga ki hono puke ʻo e vaʻakaú! Ko e hā naʻe ʻikai te ke fakafanongo mai ai kiate aú? Naʻe hala kotoa e meʻa naʻá ke faí!”
Naʻe ʻikai ke tali kaikaila ʻa ʻĀteli ia kia Tamieni. Ne ʻikai ke ne tangi. Naʻá ne tuʻu pē ʻo hangē naʻá ne ʻalu pē ke ne hā siʻisiʻi angé.
Naʻe tā vave e mafu ʻo Tamiení, pea ongoʻi vela hono fofongá. Naʻá ne ʻita ʻi heʻene sio ki he ngaahi foʻi mama kotoa ne ʻikai maʻu ʻe ʻĀtelí! Ka ko hono fuofua taimí pē ia. ʻIkai ngata aí, ka ne hangē naʻe maʻu ai ʻene fiefiá. Tukukehe pē ʻa e taimí ni.
Naʻe ongoʻi taʻe-oliʻia ʻa Tamieni. Na‘á ne fakaʻamu naʻe ʻikai ke ne kaikailaʻi ʻa ʻĀteli.
Naʻá ne lea ange ʻi ha leʻo molū, “Kātaki fakamolemole atu. “Ko ha angakovi ia naʻe hā atu meiate au.”
Naʻe sio hake ʻa ʻĀteli.
“Fēfē kapau te u ʻoatu ha fanga kiʻi tokoni ki hono maʻu ʻo e ʻū mamá?” Ko Tamieni ange ia. “Te u tangutu ʻi ho tafaʻakí ʻi he kalosoló ʻo tokoni atu.”
Naʻe kamo atu pē e ʻulu ʻo ʻĀtelí.
Ne tafoki leva ʻa Tamieni kia Grand-mère. “ʻE lava nai ke ʻomai haʻama tikite ʻe ua koeʻuhí ke toe feinga ʻa ʻĀteli?”
Naʻe malimali ʻa Grand-mère. “ʻIo.”
Naʻe hoko ʻa e talanoa ko ʻení ʻi Falanisē.
Ngaahi tā fakatātā ʻa Violet Lemay