“Ko e Palopalema ʻi he Fevahevaheʻakí,” Kaumeʻá, Māʻasi 2023, 36–37.
Ko e Palopalema ʻi he Fevahevaheʻakí
“Ko e vahevahé, ko ha founga ia ke fakahā ai ki ha taha ʻokú ke tokanga kiate ia.”
Pangungungungu, pangungungungu, pangungungungu. Naʻe folo ʻe ʻAnitelū ʻene popikoané pea faluku mai mo haʻane falukunga ʻe taha.
Naʻe tō tangutu hifo hono taʻokete ko Kēlepí ʻi he seá ʻi hono tafaʻakí. “ʻEi, ʻe lava ʻomai haʻaku meʻi meʻa?”
Naʻe ʻikai sio kehe ʻa ʻAnitelū mei he TV. “ʻIkai.”
“Mani, ʻai foki. Te ke lava ʻo vahevahe.”
Naʻe ala atu ʻa Kēlepi ki he poulú, ka naʻe toʻo ia ʻe ʻAnitelū.
“ʻIkai! Naʻá ku ʻosi talaatu kimuʻa. ʻOua te ke toe kole mai!”
“Sai.” Naʻe tuʻu hake ʻa Kēlepi ʻo mavahe mei he lokí.
ʻI he ʻaho hono hokó, naʻe ʻalu ʻa ʻAnitelū ki peito. Naʻe ngaohi ʻe Kēlepi ha susi ʻaki ha laise, limu (seaweed), mo e kapa puaka.
Naʻe hafu e fāvai ʻo ʻAniteluú he ʻuakaí. “ʻE lava ʻo ʻomai haʻaku meʻi meʻa?”
“ʻIkai,” ko Kēlepi atu ia.
Naʻe ʻita ʻaupito ʻa ʻAnitelū ai. Naʻá ne lele ki lalo ke talaange ki he Tangataʻeikí.
Naʻá ne fehuʻi ange, “Ko e hā ʻoku siokita pehē ai ʻa Kēlepí?”
Naʻe fakafulofula e Tangataʻeikí. “Naʻá ku sio ʻaneafi ʻi he ʻikai ke ke vahevahe hoʻo popikoané. Ko e hā ka vahevahe ai ʻa Kēlepi mo koe hili iá naʻe ʻikai ke ke vahevahe mo ia?”
“Koeʻuhí ko hoku tokoua ia!” Ko ʻAnitelū atu ia.
“Pea ko e hā naʻe ʻikai ke ke vahevahe ai mo iá?”
“ʻOku ʻikai ke faʻa vahevahe ia mo au! Pea tahá, naʻá ku ngaahi ia ʻe au maʻaku kae ʻikai maʻana,” ko ʻAnitelū atu ia. Ka naʻá ne kiʻi ongoʻi taʻeoliʻia. Mahalo pē naʻá ne angakovi ʻi he ʻikai ke ne vahevahé.
“ʻOkú ke ʻiloʻi nai, ʻoku mahuʻinga ʻaupito ia ʻi Kōlea, ke fevahevaheʻaki?” Ko e fehuʻi ange ia ʻa e Tanagataʻeikí. Ko e fāmili ʻo ʻAniteluú mei Kōlea. “Ko e vahevahé, ko ha founga ia ʻokú te fakahaaʻi ai ʻokú te tokanga kiate kinautolu. Ko ia kapau ʻoku ʻikai ke ke vahevahe, ʻoku hangē ia haʻo pehē ʻoku ʻikai ke ke tokanga koe kiate kinautolu.
“Ka ʻoku ou tokanga kia Kēlepi.”
Naʻe fakakaukau ʻa ʻAnitelū ki he meʻa ʻe ala fakahoko ʻe Sīsuú. Naʻá ne manatuʻi e ʻofa ʻa Sīsū ki he tokotaha kotoa peé—ʻo aʻu kiate kinautolu naʻa nau anga taʻeʻofa kiate Iá.
Naʻá ne talaange ki he Tangataʻeikí, “ʻOku ou tui te u vahevahe mo Kēlepi ʻapongipongi pea vakaiʻi angé pe ko e hā e meʻa ʻe hokó.”
Ne malimali ʻa e Tangataʻeikí. “ʻOku ou tui ko ha fakakaukau lelei ia.”
ʻI he taimi naʻe mohe ai ʻa ʻAnitelū he pō ko iá, naʻá ne fakakaukau ki ha ngaahi meʻa lelei kehe te ne lava ʻo fakahoko maʻa Kēlepi. Naʻá ne fiefia ke kamata vahevahe!
ʻI he pongipongi hono hokó, ne ʻā hake ʻa ʻAnitelū ki ha meʻa fakaʻohovale meia Kēlepi. Naʻe teuteuʻi ʻe Kēlepi ʻa e maʻu meʻatokoni pongipongí maʻana pē!
“Naʻe talanoa mai ʻa e Tangataʻeikí kiate au fekauʻaki mo e vahevahé,” ko Kēlepi atu ia. “ʻOku ou fie fai lelei ke lahi ange. Ko ia naʻá ku ngaohi ʻeni maʻau.”
“Mālō!” Ko ʻAnitelū atu ia. “ʻOku ou fie fai lelei ange pē mo au!”
Kimui ange ʻi he ʻaho ko iá, naʻe sio faiva ʻa ʻAnitelū mo Kēlepi. Naʻe tuku ʻe ʻAnitelū ke fili ʻe Kēlepi ʻa e faiva ke na sio aí. Naʻá ne ngaohi leva ha popikoane maʻa Kēlepi pē! Naʻá ne sio ki he loto poulú. Naʻe hangē ʻoku pehē hake e popikoané ia, “KAI AU!” Ka naʻe ʻikai tali ia ʻe ʻAnitelū. Naʻá ne ʻoange kia Kēlepi ʻa e poulú peá ne pehē ange, “Ko koe kotoa ʻena. ʻOku ou kole fakamolemole atu ʻi he ʻikai ke u vahevahe kimuʻá.”
Naʻe vahevahe ʻa ʻAnitelū mo Kēlepi ʻi he uiké kakato. Naʻá ne tuku ke lau ʻe Kēlepi ʻene ʻū tohí. Naʻá ne tuku ke fakaʻaongaʻi ʻe Kēlepi ʻene ngaahi peni fakaʻilongá. Naʻá ne tuku ke vaʻinga ʻa Kēlepi ʻaki e meʻa vaʻinga naʻá ne saiʻia taha aí. Naʻe aʻu ʻo ne toe ʻoange kia Kēlepi ha taimi makehe ʻi he taimi naʻá na vaʻinga aí.
Ko e lahi ange e vahevahe ʻa ʻAnitelū mo Kēlepí, ko e lahi ange ia e vahevahe ʻa Kēlepi mo iá! Naʻe ʻikai fuoloa kuó na fakahoko ha ngaahi meʻa lelei maʻanaua he taimi kotoa pē. Naʻe ʻiloʻi ʻe ʻAnitelū naʻe tokoniʻi ia ʻe he Tamai Hēvaní ke vahevahe mo hono tokouá. Naʻe ʻikai haohaoa ʻa ʻAnitelū ʻo hangē ko Sīsuú, ka naʻá ne feinga ke hangē ange ko Iá ʻi he ʻaho kotoa pē.
Naʻe hoko ʻa e talanoá ni ʻi he ʻIunaiteti Siteiti ʻo ʻAmeliká.
Tā Fakatātā ʻe Adam Howling