Mālō e Lelei mei Kilipati!

Ako fekauʻaki mo e fānau ʻa e Tamai Hēvaní ʻi he funga ʻo e māmaní.

Ko Kilipatí, ko ha motu ia ʻi he Tahi Pasifikí. ʻOku meimei ki he kakai ʻe toko 120,000, ʻoku nofo ʻi aí.

ʻOtu motu ʻe 33

Tā Fakatātā ʻe Robyn Brimley

ʻOku mafola atu ʻa e kiʻi motu siʻisiʻi ʻo Kilipatí ʻi ha sikuea maile ʻe 1.4 miliona (km² ʻe 3.5 miliona) ʻo e tahí! ʻI hono tuʻunga ʻi he māmaní, ʻokú ne tuʻu ai ʻi he feituʻu ke fuofua mamata ki he maama ʻo e ʻaho foʻou takitaha.

Ngaahi Matātahi Fakaʻofoʻofá

ʻOku fonu ʻa Kilipati ʻi he matātahi lau ʻoneʻoné pea mo e ʻulupāmé. ʻOku māfana ʻi he taʻú kakato.

Ngaahi Faʻifaʻitakiʻanga Lelei

ʻOku meimei ko e peseti ʻe 20 ʻo e kakaí ko e kāingalotu ʻo e Siasí. Ko ha faʻifaʻitakiʻanga lelei kinautolu ki he niʻihi kehe ʻoku nofo ʻi he ʻotu motú.

ʻAlu ʻo Toutai!

Koeʻuhí ʻoku ʻātakaiʻi kinautolu ʻe he tahí, ʻoku lahi e kai meʻatahi ʻa e kakai ʻi Kilipatí. ʻOku angamaheni ʻaki foki ʻa e niú, laisé, mo e hiná.

ʻOku ʻAmanaki ke Langa ha Temipale ʻi Kilipati

ʻI he ʻOkatopa ʻo e 2020, naʻe fanongonongo ai ʻe Palesiteni Lāsolo M. Nalesoni ʻe langa ha temipale ʻi Kilipati! ʻE fōtunga peheni ia.

ʻEkitivitī

Hulohula ʻa e Fanga Monumanú

Ko e tauʻolungá ko ha konga mahuʻinga ia ʻo e moʻuí ʻi Kilipati. ʻOku maʻu ʻenau ngaahi haka tauʻolungá mei heʻenau manupuna fakafonua, ko e frigate. ʻOku mafao atu e ongo nima ʻo e kau tauʻolungá ʻo hangē ha kapakaú lolotonga ʻenau ngaue holó.

Ko e hā e monumanu ʻokú ke saiʻia taha aí? Fakakaukau ki he founga ʻoku ngaue aí. Peá ke fakahaka ha foʻi tauʻolunga fakatatau ki he monumanu ko iá. Kole ki ha ngaahi kaungāmeʻa ke nau kau fakataha mo koe!

Founga Feimeʻatokoní

Supo Hina Loloʻi

1. Lingi ha kiʻi meʻi lolo niu ki ha kulo. Tānaki atu ʻa e foʻi onioni ʻosi tongi ʻe taha pea haka ʻi ha mafana ʻoku ʻikai fuʻu kakahá kae ʻoua kuo kamata ke melomelo ʻa e onioní.

2. Tānaki atu ha ipu hina kuo ʻosi laiki ʻe 2, ipu niu tatau ʻe 2, mo ha ipu supo moa ʻe 4. ʻAi ke tuifio lelei.

3. Fakalili ʻa e supó, pea tukutuku hifo ʻa e uló pea tuku ke kolokolo pē ai ʻi ha miniti ʻe 20.

4. Kapau ʻokú ke fie maʻu, tānaki atu ha māsima, pepa (pepper), sinisā, pe ha ngaahi sipaisi kehe.

Fakapapauʻi ʻoku tokoni atu ha taha lahi!

Kiʻi Tokoni ki he Moʻui Leleí

Ngaue Leva!

ʻOku hanga ʻe he fakamālohisinó ʻo ʻai ke moʻui lelei ho mafú, ngaahi uouá mo e ngaahi huí. Te ke lava ʻo fai ha ngaahi meʻa fakafiefia ʻi he ʻaho kotoa pē ke ueʻi ho sinó pea pamu ho mafú, hangē ko e hulohulá, vaʻinga sipotí, pe heka pasikalá—pe ko e hā pē meʻa ʻokú ke saiʻia aí!