“Ko ʻEku Taumuʻa ki he Tohi ʻa Molomoná,” Kaumeʻá, Māʻasi, 2023, 31.
Fānaú mo e Toʻu Tupú
Ko ʻEku Taumuʻa ki he Tohi ʻa Molomoná
Tā Fakatātā ʻe Rachel Hoffman-Bayles
Naʻá ku fokotuʻu ha taumuʻa ke lau e Tohi ʻa Molomoná kimuʻa ʻi hoku papitaisó, ʻo hangē ko ia ne fai ʻe hoku taʻoketé mo hoku tuofefiné. Ka ʻi he taimi naʻe hoko ai ʻa e COVID, naʻá ku faʻa liʻaki ako, pea naʻe faingataʻa ange ʻa e laukongá kiate au. ʻOku lahi e ngaahi foʻi lea mahuʻinga ʻi he Tohi ʻa Molomoná, pea naʻá ku fie maʻu tokoni.
Naʻá ku maʻu leva mo ʻeku ongomātuʻá ha fakakaukau. Naʻá ku fakaʻaongaʻi ʻa e polokalama Gospel Library ʻi he telefoni ʻeku fineʻeikí ke fanongo ki he Tohi ʻa Molomoná. Naʻá ma fakamāmālieʻi e ngaahi leʻó ke u lava ʻo lau mo muimuiʻi ngofua ange. Naʻá ku kiʻi taʻofi foki ʻi he lolotonga ʻeku laú ʻo mamata ʻi he ngaahi fehokotakiʻanga ki he ngaahi vitioó ʻi he polokalamá. Ko e taimi kotoa pē naʻá ku lau aí, naʻá ku fakaʻilongaʻi ia ʻi ha saati. Naʻá ku talanoa ki heʻeku fineʻeikí fekauʻaki mo e meʻa naʻá ku laú. Naʻe fakalata ʻaupito!
Naʻe fakaʻau ke lelei ange ʻeku laukongá, ka naʻe ʻikai ke u fakakaukau te u lava ʻo lau ke ʻosi ia kimuʻa ʻi hoku papitaisó. Ko ia ne u pehē ai, ʻe ʻikai te u fakaʻosi ia kimuʻa ʻi hoku papitaisó, te u toki fakaʻosi ia ʻi he fakaʻosinga ʻo e taʻú (ʻa ia ko ha māhina ʻe taha kimui ange ai). Ne hoko atu pē ʻeku laú. Naʻá ku faʻa lau mo ʻeku faʻeé pe tokouá ʻi ha ngaahi taimi ʻe niʻihi.
ʻI he ʻaho 31 ʻo Tīsemá, naʻá ku fakaʻosi ai ʻa e Tohi ʻa Molomoná! Naʻe fiefia kotoa hoku fāmilí. Naʻá ku ʻalu leva ki hoku lokí ke fai ha lotu. Naʻá ku fehuʻi ange pe ʻoku moʻoni ʻa e Tohi ʻa Molomoná, pea naʻá ku ongoʻi fiefia ʻaupito.
ʻOku ou ʻiloʻi ʻoku fanongo mai ʻa e Tamai Hēvaní ʻi he taimi ʻoku ou lotu aí. ʻOku ou ʻiloʻi ʻoku ʻofa ʻeku ongomātuʻa fakalangí ʻiate au. ʻOku ou ʻilo ko e Tohi ʻa Molomoná ko e folofola ia ʻa e ʻOtuá, pea ʻoku ʻofa ʻa Sīsū ʻiate kitautolu.