“Tauhi ʻEne Palōmesí,” Kaumeʻá, Māʻasi 2023, 10–11.
Ko Hono Tauhi ʻEne Palōmesí
Naʻá ku loi pē ki he Tangataʻeikí. Ko e hā leva e meʻa ʻe hokó?
Naʻe hoko ʻa e talanoá ni ʻi Kana.
“Toe pē ʻaho ʻe ono pea papitaiso au!” Ko Fiefia ange ia. ʻOku mei aʻu ki he ʻaho ko iá!
Naʻe fehuʻi ange ʻe he Tangataʻeikí, “Kuó ke maau?”
Naʻe pehē atu ʻe Fiefia, “ʻOku ou tui pē ki ai.”
Ne pehē ange ʻe he Tangataʻeikí,“ʻI he taimi ʻoku papitaiso ai koé, ʻokú ke fakahoko ha fuakava.” “ʻOkú ke manatuʻi nai hono ʻuhingá?”
“Ko ha palōmesi nai ia, ko ia?”
Ne kamokamo mai ʻa e Tangataʻeikí. “Ko ia! ʻOkú ke palōmesi ke muimui ʻia Sīsū Kalaisi mo tauhi e ngaahi fekaú. ʻOku talaʻofa mai e Tamai Hēvaní ke tāpuekina mo tokoniʻi koe.”
Naʻe malimali ʻa Fiefia. Naʻá ne ʻilo ko ha talaʻofa mahuʻinga ia. Naʻá ne fiefia ke aʻu ki ai!
Naʻe faifai pea hokosia e ʻaho ʻo hono papitaisó. Naʻe fetongi ʻa Fiefia ki ha vala hinehina. Naʻe papitaiso foki mo ha ongo tamaiki kehe. Naʻa nau mamata kotoa ki hono fakafonu vai ʻa e faiʻanga papitaisó.
ʻI he hoko hono taimi totonú, naʻe hifo ʻa Fiefia mo e Tangataʻeikí ki he faiʻanga papitaisó. Naʻe fai ʻe he Tangataʻeikí ʻa e lotu papitaisó. Naʻe puke leva ʻe Fiefia hono ihú, pea tukutuku hifo ia ʻe he Tangataʻeikí ki lalo ʻi he loto vaí.
ʻI heʻene alu hake mei he vaí, naʻe ongoʻi fiefia ʻaupito ʻa Fiefia ʻi hono lotó! Naʻá ne fie tauhi ʻene palōmesí ke muimui ʻia Sīsū. Naʻá ne fie maʻu ke ne ongoʻi maʻa mo fiefia peheni ʻo taʻengata. Naʻe ʻikai ke ne toe fie fai ha fili hala.
Hili ha ngaahi ʻaho siʻi mei ai, naʻe ʻā hake ʻa Fiefia ʻo fakamoʻui ʻa e vai mafaná ke kaukau. Naʻe fuoloa pea toki māfana ʻa e vaí. Ko ia naʻe fakamoʻui ai ʻe Fiefia ʻa e TV. Naʻá ne fie sio katuni lolotonga ʻene tatalí.
Naʻe kata ʻa Fiefia ʻi heʻene mamata ki he fanga kiʻi monumanú ʻi heʻenau talanoa ʻi he faivá. Naʻe fakaoli ʻaupito ʻa e fakaʻaliʻali ko ʻení! Ne ʻikai fuoloa kuo ngalo ʻiate ia ʻa hono fakamafana ʻo e vaí.
Hili ha houa ʻe taha mei ai, naʻe hū mai ʻa e Tangataʻeikí ki he lokí. Naʻá ne fehuʻi ange, “Ko e hā hono fuoloa hono fakamafana ʻo e vaí?”
Ne sio hake ʻa Fiefia. Naʻá ne sio TV ʻo lōloa ange ʻi he taimi naʻá ne fakataumuʻa ki aí!
Ne tali atu ʻe Fiefia, “Naʻe ʻikai ke fuʻu fuoloa.” “ʻI ha kiʻi miniti siʻi pē.” Naʻá ne tāmateʻi e TV peá ne lele ke kaukau.
Ka ʻi he toenga ʻo e ʻahó, naʻe ongoʻi loto mamahi ʻa Fiefia ʻi hono lotó. Hili hono papitaisó naʻá ne loto ke ʻoua naʻá ne teitei fai ha fili hala. Ka naʻá ne toki loi pē ki he Tangataʻeikí!
Naʻe māpuhoi ʻa Fiefia. Naʻá ne ʻilo ʻa e meʻa kuo pau ke ne faí.
Naʻe pehē ange ʻe Fiefia, “ʻEi, Tangataʻeiki. Naʻá ku fakahoko ha loi. Naʻá ku mavahe fuoloa mei hono fakamāfanaʻi ʻo e vaí, ka naʻe ʻikai ke u ʻuhinga ke pehē. Fakamolemole.”
“SAI pē ia. Mālō hoʻo talamai kiate aú,” ko e Tangataʻeikí ange ia.
“Naʻá ku ongoʻi taʻeoliʻia ʻaupito koeʻuhí ko ʻeku maumauʻi ʻeku palōmesi ʻi he papitaisó,” ko Fiefia atu ia.
Ne tangutu hifo ʻa e Tangataʻeikí mo Fiefia ʻi he seá. “ʻI he taimi naʻá ke papitaiso aí, naʻe ʻikai te ke palōmesi ke ke haohaoa. Naʻá ke palōmesi te ke feinga mālohi ke muimui ʻia Sīsū.”
Naʻe kamokamo pē ʻa Fiefia. Naʻá ne ongoʻi fiemālie ange ai.
“Pea ʻokú ke ʻiloʻi nai e meʻa te ke lava ʻo fai ʻi he taimi ʻokú ke fakahoko ai ha fehalaākí?” Ko e fehuʻi ange ia ʻa e Tangataʻeikí.
“Fakatomala?” ko Fiefia ange ia.
“Ko ia! ʻI he taimi ʻoku tau fakatomala aí, ʻoku fakamolemoleʻi kitautolu ʻe he Tamai Hēvaní. Pea ʻe lava leva ke tau maʻa ʻo hangē pē ko e ʻaho naʻa tau papitaiso aí. Ko e fakatomalá ko ha konga ia ʻo hono tauhi hoʻo palōmesi ʻi he papitaisó.”
Naʻe mamali ʻa Fiefia. “Te u lotu ʻo kole ki he Tamai Hēvaní ke fakamolemoleʻi au.” Naʻá ne fiefia ʻi heʻene lava ʻo tauhi ʻene palōmesi ʻi he papitaisó.
Tā fakatātā ʻe Macky Pamintuan