“Naʻe Papitaiso ʻa Sīsū Kalaisi,” Kaumeʻa, Māʻasi 2023, 24–25.
Ngaahi Talanoa ʻo Sīsuú
Naʻe Papitaiso ʻa Sīsū Kalaisi
Toʻo ʻa e peesi ko ʻení pea pelu ua ia. Puke hake leva ʻa e fakatātaá lolotonga hoʻo fai ʻa e talanoá.
Tā valivali ʻe Greg Olsen
Ko ha palōfita ʻa Sione Papitaiso. Naʻá ne akoʻi e kakaí fekauʻaki mo Sīsū Kalaisi. ʻI ha ʻaho ʻe taha naʻe papitaiso ai ʻe Sione ʻa e kakaí ʻi he Vaitafe ko Soataní. Naʻe hāʻele mai leva ʻa Sīsū. Naʻá Ne kole kia Sione ke papitaiso Ia.
Naʻe folofola ʻa Sīsū ʻo pehē, ne fekauʻi mai ʻe he Tamai Hēvaní ke papitaiso ʻa e tokotaha kotoa pē. Naʻá Ne fie talangofua ki he Tamai Hēvaní. Naʻá Ne fie tā ha sīpinga maʻatautolu.
Naʻe papitaiso ʻe Sione ʻa Sīsū ʻi he Vaitafe Soataní. ʻI he ʻalu hake ʻa Sīsū mei he vaí, naʻe fanongo ʻa e kakaí ki he leʻo ʻo e Tamai Hēvaní. Naʻá Ne folofola mai ʻo pehē, “Ko hoku ʻAlo ʻofaʻangá ʻeni, ʻa ia ʻoku ou fiemālie lahi aí.”
ʻE lava ke tau muimui ʻi he sīpinga ʻa Sīsū Kalaisí ʻaki hano papitaiso kitautolu. ʻOku fiefia ʻa e Tamai Hēvaní ʻi he taimi ʻoku tau muimui ai ʻi Hono ʻAló.