“Ko eTohi Tainasoá,” Kaumeʻá, Māʻasi 2023, 22–23.
Ko e Tohi Tainasoá
Naʻe fakafulofula ʻa Sōfia. Ko e hā ʻoku ʻikai ke ne saiʻia ai mo ia he fanga tainasoá?
Ko e ongo māhanga ʻa Sōfia mo ʻEle, pea naʻá na hoko ko ha ongo kaungāmeʻa mamae. Naʻá na saiʻia ʻi ha ngaahi meʻa kehekehe, ka naʻe fakafiefia ange ia! Naʻá na manako ke vaʻinga fakataha.
ʻI ha ʻaho ʻe taha ʻi he akó, naʻe ʻave ʻe Sōfia ha tohi fekauʻaki mo e fanga tainasoá mei he laipelí. Naʻá ne fiefia ke fakahaaʻi ia kia ʻEle.
Naʻe pehē ange ʻe Timi, ko ha kiʻi tamasiʻi ʻi heʻene kalasí, “ʻE ʻikai te ke lava ʻo lau ena.”
“He ko e hā?” Ko e fehuʻi ange ia ʻa Sōfiá.
Naʻá ne pehē ange, “Ko e tohi ia maʻá e tamasiʻi.” “ʻOku maʻá e fānau tangatá ʻa e tainasoá.”
Naʻe fakafulofula ʻa Sōfia. Ko e hā ʻoku ʻikai ke ne saiʻia ai mo ia he fanga tainasoá? Naʻá ne faʻo e tohí ki heʻene kató. Ka te ne lau pē ʻe ia, tatau ai pē.
ʻI he ʻahó kakato, naʻe fakakaukau ʻa Sōfia ki he meʻa naʻe lea ʻaki ʻe Timí. Naʻá ne kei ongoʻi loto-mamahi pē ʻi heʻene aʻu ki ʻapi mei he akó.
“Ko e hā e meʻa ʻoku hokó?” Ko e fehuʻi ange ia ʻa e Fineʻeikí.
Naʻe pehē atu ʻe Sōfia, “Naʻe talamai ʻe Timi ʻoku ʻikai ke u lava au ʻo lau ha tohi fekauʻaki mo e tainasoá. Naʻá ne talamai ko e tainasoá maʻá e tamaiki tangatá pē. ʻOku ʻikai ke moʻoni ia, ko ia?”
“ʻIkai, ʻoku ʻikai moʻoni ia,” ko e Fineʻeikí ange ia.
Naʻe sio ʻa Sōfia ki lalo. “Pea ko e hā naʻe lea pehē ai ʻa Timí?”
Naʻe pehē ange ʻe he Fineʻeikí, “Mahalo ʻoku ʻikai ke ne ʻiloʻi ʻe ia ha toe tamaiki fefine ʻoku saiʻia he fanga tainasoá. Ka naʻe ʻikai ngaohi kitautolu ʻe he Tamai Hēvaní ke tau tatau kotoa. Pea ʻokú Ne finangalo ke tau feangaʻofaʻaki.”
Naʻe fāʻofua ʻa e Fineʻeikí kia Sōfia. “Kātaki ʻi he anga pehē atu ʻa Timi kiate koé? Ka ʻoku ʻofa ʻa e Tamai Hēvaní ʻiate koe. Pea pehē foki kiate au.”
Naʻe pehē ange ʻe Sōfia, “Mālō Fineʻeiki.” Naʻá ne ongoʻi fiefia ange he taimí ni.
“Te u talanoa ki hoʻo faiakó fekauʻaki mo ʻeni, SAI ia?” Ko e Fineʻeikí ange ia.
Naʻe kamokamo pē ʻa Sōfia. “Sai.”
Naʻe ʻalu ʻa Sōfia ʻo vaʻinga mo ʻEle. Naʻá na faʻu ha foʻi vaʻinga naʻe ui ko e Lova ʻa e Pilinisesi Toʻá, ʻa ia naʻe hoko ai e fanga kiʻi tamapua ʻa ʻElé ko ha kau fakaʻuli meʻalele lova. Naʻe vāofi pē ʻa e lová, ka naʻe maʻu ia ʻe he Pilinisesi Veʻe Vave Hangē ha Fatulisí ko Sitá! Naʻe fiefia ʻa Sōfia mo ʻEle.
“ʻOkú ke fie sio ʻi he tohi tainasoa naʻá ku haʻu mo ia he ʻaho ní?” Ko e fehuʻi ange ia ʻa Sōfiá.
“ʻIo!” Ko ʻEle ange ia.
Naʻe malimali ʻa Sōfia Naʻá ne fiefia he naʻá ne vaʻinga fiefia maʻu pē mo ʻEle.
ʻI he ʻaho hono hokó, naʻe maʻu ʻe he faiako ʻa Sōfiá ha fanongonongo. Naʻá ne pehē mai, “Kalasi, ʻoku ʻi ai ha meʻa ʻoku ou fie fakahā atu. . ʻOku SAI PĒ ke te saiʻia ʻi he ngaahi meʻa kehekehe. ʻOku maʻá e tokotaha kotoa pē ʻetau ngaahi tohí mo e meʻa-vaʻingá.”
Naʻe fuʻu fiefia ʻaupito ʻa Sōfia! ʻI he taimi laukongá, naʻá ne toʻo hake ʻa e tohi tainasoá mei heʻene kató.
Naʻe haʻu ʻa Timi ki hono tesí. “Fakamolemole atu ʻi heʻeku talaatu ʻoku ʻikai te ke lava ʻo lau ʻa e tohí,” ko Timi ange ia. “ʻOku ou saiʻia mo au ʻi he tainasoá.”
Ne talaange ʻe Sōfia, “ʻOku SAI PĒ. “ʻOkú ke fie laukonga nai mo au?”
“ʻIo!” Naʻe tangutu hifo ʻa Timi ʻi hono tafaʻakí. “Mālō.”
Naʻe fakaava hake ʻe Sōfia ʻa e tohí. Naʻá ne kehekehe pē mo Timi, ka naʻe lelei ke vahevahe ia mo hano kaungāmeʻa foʻou.
Naʻe hoko ʻa e talanoá ni ʻi he ʻIunaiteti Siteiti ʻo ʻAmeliká.
Tā Fakatātā ʻe Mark Robison