“Liliani Pē,” Kaumeʻa, Māʻasi 2023, 40–41.
Liliani Pē
Naʻe ʻikai fie maʻu ʻe Liliani ke ne toko taha pē ʻi he Kau Finemuí.
Ko e ʻaho fakaʻosi ʻeni ʻo Liliani ʻi he Palaimelí. ʻE ʻofa mai ʻa Liliani ki he fānau Palaimeli kehé. Naʻa nau toko tolu pē—ko ha ongo kiʻi tamaiki fefine iiki mo hono tuongaʻane siʻisiʻi ko Maikoló.
Naʻe fehuʻi ange ʻe heʻene faiako Palaimelí, “Ko e hā e ongo ʻokú ke maʻú ʻi hoʻo hiki hake ki he Kau Finemuí?”
“ʻOku ʻikai ke u faʻa tatali ke u ʻalu ki he kalasi ʻa e tamaiki fefine lalahi angé!” Ko e lea ia ʻa Lilianí.
Naʻe pehē ange ʻe heʻene faiakó, “ʻOku ou fiefia ʻi hoʻo loto vēkeveké.” “Ko hai mo koe ʻe ʻi he Kau Finemuí?”
Naʻe fakakaukau ʻa Liliani ki he tamaiki fefine matuʻotuʻa ange ʻi he uōtí. Naʻe toki ʻosi pē ʻa Sama mo Kova mei he ako māʻolungá. Pea kuo hiki e fāmili ʻo Meliviná. Tatali angé. ʻOku toe . . . pē ʻa Liliani.
ʻE fēfē nai ʻene kalasi ʻi he Kau Finemuí? Ko e kau faiakó pē mo ia? Naʻe ongo faikehe—mo fakataʻelata. Naʻe manavasiʻi ʻa Liliani ʻi heʻene fakakaukau ki aí. Naʻá ne fakafulofula. Naʻe ʻikai ke ne fie maʻu ke toko taha pē ʻi he Kau Finemuí.
ʻI he toenga ʻo e ʻahó, naʻe fakakaukau ʻa Liliani ki heʻene hoko toko taha pē ko e finemuí. ʻI he maʻu meʻatokoni efiafí, naʻá ne ʻunuakiʻi holo e meʻakai ʻi heʻene peletí kae ʻikai ke kai ia. Naʻá ne ngulungulu lalo ʻi hono taimi ke lau ai ʻi he ako folofola fakafāmilí.
Naʻe tuku hifo ʻe he fineʻeikí ʻene folofolá ki lalo. Naʻá ne fehuʻi ange, “Ko e hā e meʻa ʻoku hokó?”
Naʻe māpuhoi ʻa Liliani. “Te u toko taha pē ʻi he Kau Finemuí!”
Naʻe hiki ʻa e fineʻeikí ʻo tangutu ʻi he tafaʻaki ʻo Lilianí. Naʻá ne fāʻofua ki ai. Naʻá ne pehē ange, “ʻE ʻikai faingofua ia.” “Ko e hā ha meʻa te mau lava ʻo tokoni atu ai?”
Ne fakakaukau ki ai ʻa Liliani ʻi ha kiʻi taimi siʻi. “Mahalo te tau lava ʻo lotua ha taʻahine ʻe taha ke hiki mai ki he uōtí. Pea mahalo ʻe lava ke tuku mai ʻe he Tangataʻeikí haku tāpuaki.”
Ne malimali ʻa e Tangataʻeikí. “Ko ha ngaahi fakakaukau lelei ia.”
Naʻe tūʻulutui e fāmilí ʻo lotu. Naʻe kamata ʻe Liliani ʻo pehē, “ʻOku ou fiefia ke u hiki hake ki he Kau Finemuí. ʻOku ʻikai ke u fie nofo toko taha, ka ʻo kapau ko Ho finangaló ia, ʻoku sai pē ia. Kātaki ʻo tokoni mai ke u ʻiloʻi ʻa e meʻa te u lava ʻo fai ke u ongoʻi fiemālie ange aí. Pea kapau ʻokú Ke finangalo ke ueʻi fakalaumālie ha fāmili ʻoku ʻi ai haʻanau kiʻi taʻahine ʻi hoku toʻú ke hiki mai ki homau uōtí, ʻe lelei ʻaupito foki ia.
Hili e lotú, naʻe hili ʻe he Tangataʻeikí hono ongo nimá ki hono ʻulú. Naʻá ne pehē, “ʻOku ou tāpuakiʻi koe ke ke ongoʻi fiemālie fekauʻaki mo e hiki ki he Kau Finemuí. ʻE tāpuekina koe ʻe he Tamai Hēvaní ʻo fakatatau ki hoʻo kole ʻEne tokoní.”
Naʻe ongoʻi fiemālie ʻa Liliani. Naʻe teʻeki ai ke ne fakapapauʻi pe ko e hā te ne lava ʻo fakahokó ke faingofua ange ai ʻene hiki ki he Kau Finemuí. Ka naʻá ne ʻiloʻi foki ʻe tokoniʻi ia ʻe he Tamai Hēvaní.
ʻI he ʻaho Sāpaté, naʻe kiʻi manavasiʻi ʻa Liliani. Ka naʻá ne manatuʻi ʻa e fiemālie naʻá ne ongoʻi hili hono tāpuakiʻi ia ʻe he Tangataʻeikí. Naʻá ne ʻiloʻi ʻe SAI pē.
Naʻe fakahā ʻe he pīsopé ʻi he houalotu sākalamēnití ʻe hoko ʻa Sisitā Pānesi ko e palesiteni foʻou ʻo e Kau Finemuí. Naʻe tuʻu hake ʻa Sisitā Pānesi ʻi he taimi naʻe ui ai hono hingoá. Naʻe ʻikai ke fuʻu ʻiloʻi lelei ia ʻe Liliani, ka naʻá ne mataʻi anga fakakaungāmeʻa.
Naʻe pehē ʻe he Fineʻeikí ko e taimi naʻe taʻu tatau ai mo Lilianí, naʻe hoko ʻene taki ʻi he Kau Finemuí ko e taha ʻo hono ngaahi kaungāmeʻa lelei tahá. Mahalo ʻe lava pē ke kaungāmeʻa ʻa Liliani mo Sisitā Pānesi! Ko ha tali ia ki heʻene lotú.
Hili e houalotu sākalamēnití, naʻe ʻalu ʻa Liliani ki hono lokiako foʻoú. Naʻe tuʻu ha taʻahine matuʻotuʻa ange ʻi he holó.
Naʻe pehē atu ʻa Liliani, “Mālō e lelei.” “ʻOkú ke ʻaʻahi mai ki homau uōtí?”
Naʻe kalokalo atu e taʻahiné. “ʻIkai. Ne toki hiki mai homau fāmilí ki heni.”
Naʻe malimali ʻa Liliani. “ʻOku ou talitali lelei koe ki homau uōtí. Ko hoku fuofua ʻaho ʻeni ʻi he Kau Finemuí.” Naʻá ne tangutu mo e taʻahiné ʻi he loki akó. “Kaekehe, ko hoku hingoá ko Liliani.”
Naʻe pehē atu e kiʻi taʻahine foʻoú “Mani ē!” “Ko Liliani mo hoku hingoá!”
Naʻe kata ʻa Liliani. Kuo toe tali mai ʻe he Tamai Hēvani ʻene lotú! Mahalo pē he ʻikai ke fuʻu fakataʻelata fēfē ʻa e Kau Finemuí.
Naʻe hoko ʻa e talanoa ko ʻení ʻi ʻAositelēlia.
Tā Fakatātā ʻe Sue Teodoro