“Ko e Lotu Hūfekina ʻi he Mofuiké,” Kaumeʻá, Māʻasi 2022, 4–5.
Ko e Lotu Hūfekina ʻi he Mofuiké
ʻI he ʻā hake ʻa Vāletí, naʻe ngalulu ʻa e meʻa kotoa pē!
Naʻe hoko ʻa e talanoa ko ʻení ʻi Pelū.
Naʻe lolotonga mohe ʻa Vāleti pea fakaʻāaki ia ʻe ha ʻuʻulu longoaʻa. Naʻá ne ʻuluaki fakakaukau ia ko ha mana.
Ka naʻe fakaʻau ke toe leʻolahi ange e ʻuʻulú. Naʻá ne luluʻi e matapā sioʻata ʻo hono loki mohé.
Naʻe tangutu vave hake ʻa Vāleti. Ko ha mofuike ʻeni!
Naʻe ʻikai fuʻu fuoloa ʻene hiki mo hono fāmilí ki Peluú. Naʻá ne ʻiloʻi ʻoku faʻa hoko heni ha ngaahi mofuike. Pea kuó ne ʻosi teuteu mo hono fāmilí maʻanautolu pea akoako mo e meʻa ke fakahokó. Ka naʻe fakailifia ange ʻeni ʻi he meʻa naʻá ne fakakaukau ki aí. Naʻe lava ke ne ongoʻi ʻoku tete hono sinó!
Naʻe lele ʻa Vāleti ki peito ʻo totolo ʻi he lalo tēpilé. Hili ha ngaahi sekoni siʻi mei ai, naʻe kau fakataha mo hono tuongaʻané mo hono tokouá. Pehē pē mo e Fineʻeikí mo e Tangataʻeikí.
Naʻe pehē atu e Tangataʻeikí, “Meʻa lelei ʻaupito ko hono manatuʻi e meʻa naʻa tau akó. ʻOku SAI PĒ ʻa e tokotaha kotoa?”
Naʻe kamokamo pē ʻa e tuongaʻane mo e tokoua ʻo Vāletí.
Ka naʻe ilifia ʻa Vāleti. Naʻá ne kuikui. Naʻe faingataʻa ke ne tukunoaʻi ʻa e tetetete hono sinó.
Pea manatuʻi leva ʻe Vāleti ke lotu. Naʻá ne kūnima pea punou hono ʻulú. Naʻá ne fanafana hake, “ʻE Tamai Hēvani, fakamolemole ʻo tokangaʻi muʻa homau fāmilí.”
Naʻe hoko atu pē ʻa e lotu ʻa Vāletí. Naʻá ne ongoʻi hangē ʻoku fāʻofua ange ha taha kiate iá. ʻI he ʻosi ʻene lotú, naʻá ne hanga hake ki ʻolunga. Naʻe kūnima ʻa e Fineʻeikí mo e Tangataʻeikí. Pea pehē foki ki hono tuongaʻané mo e tokouá. Naʻa nau lotu kotoa! Naʻe kei ngalulululu pē ʻa e kelekelé. Ka naʻe ongoʻi nonga ʻa Vāleti ʻi hono lotó mo e ʻatamaí.
Ne faifai pē pea ʻosi e ngalulululú. Naʻe kei toitoi pē ʻa Vāleti mo hono fāmilí ʻi he lalo tēpilé ʻi ha kiʻi taimi, ke fakapapauʻi pē ʻoku malu.
“Fēfē hoʻo ongoʻí?” Ko e ʻeke ange ia ʻe he Fineʻeikí kia Vāletí.
“SAI PĒ,” ko Vāleti atu ia. “Naʻá ku fuʻu ilifia heʻene kamatá. Ka naʻe tokoni mai ʻa e lotú ke u ongoʻi fiemālie ange.” Naʻá ne fāʻofua ki he Fineʻeikí. Naʻá ne fiefia ʻi hono tokoniʻi ia ʻe he Tamai Hēvaní ke ne ongoʻi fiemālié.
Tā Fakatātā ʻe Toby Newsome