“Lele atu ki he Māmá,” Kaumeʻa, Māʻasi 2023, 32–33.
Kaumeʻa ki he Kaumeʻa
Lele atu ki he Māmá
Naʻe toʻo mei he “Running toward the Light” (vitiō), ChurchofJesusChrist.org.
Tā Fakatātā ʻe Adam Nickel
Naʻá ku tupu hake ʻi he feituʻu fakatuʻutāmaki ʻo ha fuʻu kolo lahi. ʻI ha ʻaho ʻe taha naʻá ku luelue ai ki he akó mo ha paʻanga ʻi hoku kató. Naʻe ngatata ʻa e koiní ʻi heʻeku lué.
Naʻe pau ke u lue fakalaka atu ʻi ha niʻihi ʻo e tamaiki tangata matuʻotuʻa angé naʻa nau ʻi ha kulupu fakatamaiki. Naʻá ku feinga ke u mataʻi toʻa. Naʻá ku feinga ke ʻoua te u ilifia. Ka naʻa nau fanongo ki he ngatata [ʻa e koiní]. Naʻa nau fie maʻu ʻa e koiní pea naʻa nau kamata tuli au.
Naʻá ku lele ʻi he vave taha naʻá ku lavá ke u hola. Naʻá ku afe atu ʻi ha kiʻi vahaʻa hala. Naʻá ku lava ʻo sio ki he maama ʻi he ngataʻanga ʻo e vahaʻa halá, ko ia naʻá ku lele atu ki he māmá. Taimi siʻi pē kuo tuku ʻenau muimui ʻiate aú, pea naʻá ku hao.
Naʻe hoko ʻeni ko ha sīpinga ʻi heʻeku moʻuí. Naʻá ku lele mei he meʻa naʻe koví, peá u fekumi ki he meʻa naʻe leleí. Naʻá ku loto-foʻi he taimi ʻe niʻihi, ka naʻá ku kei feinga pē ke maʻu ʻa e māmá.
ʻI heʻeku hū ki he ʻunivēsití, naʻá ku vaʻinga ʻi he timi pasiketipoló. Ko e tokolahi taha ʻo e timí naʻa nau kau ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Naʻá ku ako meiate kinautolu fekauʻaki mo e ongoongoleleí. Naʻá ku ako ʻo ʻiloʻi ko e fānau au ʻa e ʻOtuá. ʻA ia ko hono ʻuhingá te u lava ʻo ikunaʻi hoku ngaahi faingataʻaʻiá pea hoko ʻo lelei ange. Naʻá ku kau ki he Siasí. Talu mei ai, mo ʻeku feinga ʻi he ʻaho kotoa pē ke u hoko ʻo hangē ange ko ʻeku Tamai Hēvaní mo Hono ʻAlo ko Sīsū Kalaisí. Pea te ke lava ʻo fakahoko mo ia foki!
Ko e taimi ʻokú ke lele atu ai ki he māmá, ʻoku ʻi ai ha ʻamanaki lelei. ʻOkú ke ʻiloʻi ʻokú ke lele ki he mālohi, nonga, mo e fiefiá. ʻOku tau fie maʻu kotoa ke tau lele ki he māmá.
Pasiketipolo Fakafiefia
Naʻe ako ʻa ʻEletā Sionisoni fekauʻaki mo e ongoongoleleí lolotonga ʻene vaʻinga pasiketipoló. Ko koe leva ʻeni!
-
Kosi ʻo toʻo ʻa e tapafā ʻi laló pea kukuʻi ke fakafoʻi-pulu.
-
Taufetongi ʻi hono fakahū e ngaahi foʻi pulú ki ha loto poulu.
-
ʻI he taimi ʻoku tō ai ha foʻi pulu ʻi he loto poulú, fakaava ʻa e pepá pea tali ʻa e fehuʻí!
-
Ko e hā ha founga ʻe taha te ke lava ai ʻo muimui ʻi he Tamai Hēvaní?
-
Ko e fē ha taimi kuó ke fili ai ʻa e totonú?
-
ʻOkú ke mamata fēfē nai ki he maama ʻa e Tamai Hēvaní ʻi hoʻo moʻuí?
-
Ko e hā ha meʻa ʻokú ne tokoniʻi koe ke ke ongoʻi e ʻofa ʻa e Tamai Hēvaní?
-
Te ke lava fēfē nai ʻo vahevahe e maama ʻa e Tamai Hēvaní mo e niʻihi kehé?
-
Tohi hoʻo fehuʻi pē ʻaʻau!