“Nonga Mei he Fakamoʻuí,” Kaumeʻá, Māʻasi 2023, 2–3.
Mei he Kau Palesitenisī ʻUluakí
Nonga mei he Fakamoʻuí
Naʻe toʻo mei he “Nonga ʻi he Moʻuí Ni,” Liahona, Tīsema 2016.
Ngaahi tā fakatātā ʻa Dilleen Marsh
Naʻe folofola ʻe he Fakamoʻuí, “Te mou maʻu ʻa e mamahí ʻi māmani” (Sione 16:33). ʻOku ʻuhinga ia te tau fetaulaki kotoa mo ha ngaahi taimi faingataʻa ʻi he māmaní. Ka naʻá Ne toe ʻomi foki mo e talaʻofa ko ʻení: “ʻOku ou tuku ʻa e melinó kiate kimoutolu, ko ʻeku melinó ʻoku ou foaki kiate kimoutolú” (Sione 14:27). ʻI heʻetau muimui ʻi he Fakamoʻuí, ʻe lava ke tau ongoʻi ʻa e nongá ʻi hotau ngaahi taimi faingataʻaʻiá.
ʻI heʻetau maʻu e sākalamēnití, ʻoku tau palōmesi ai ke manatu maʻu ai pē ki he Fakamoʻuí. Te ke lava ʻo fakakaukau kiate Ia ʻi ha ngaahi founga ʻe tokoni atu ke ke ongoʻi ofi ange ai kiate Ia. Ko e taimi ʻe niʻihi ʻoku ou fakakaukau kiate Ia ʻokú Ne tūʻulutui ʻi he Ngoue ko Ketisemaní. ʻOku ou sioloto he taimi ʻe niʻihi ki Heʻene ui ʻa Lasalosi ke hū mai ki tuʻa mei he fonualotó. ʻI heʻeku fai iá, ʻoku ou ongoʻi ofi kiate Ia. ʻOku ou ongoʻi houngaʻia mo nonga. Te ke lava mo koe foki.
Naʻe talaʻofa ʻa Sīsū ko e taimi ʻoku tau tauhi ai ʻEne ngaahi fekaú mo muimui ʻiate Iá, ʻe ʻiate kitautolu ʻa e Laumālie Māʻoniʻoní. Te tau lava leva ʻo maʻu ʻa e nongá, ʻo tatau ai pē pe ko e hā ʻe hoko ʻi heʻetau moʻuí.
Ngaahi Talanoa ʻo Sīsuú
Naʻe pehē ʻe Palesiteni ʻAealingi ʻokú ne ongoʻi houngaʻia mo nonga ʻi he taimi ʻokú ne fakakaukau ai ki he Fakamoʻuí ʻi Ketisemaní. Ko e hā ha ngaahi talanoa ʻo Sīsū ʻoku nau tokoniʻi koe ke ke ongoʻi ofi kiate Ia?