Ngaahi ʻEkitivitī ʻo e “Haʻu, ʻo Muimui ʻIate Aú ,” Kaumeʻá, Māʻasi 2023, 6–7.
Ngaahi ʻEkitivitī ʻo e Haʻu ʻo, Muimui ʻIate Aú
Ako e folofolá, pe fakahoko ha meʻa fakafiefia ʻi he efiafi ʻi ʻapí!
Ko e Matangí
Tā fakatātaaʻi ʻe Katy Dockrill
Ki he Mātiu 8; Māʻake 2–4; Luke 7
Talanoá: Lau ʻa e talanoa ʻo hono lolomi ʻe Sīsū Kalaisi ʻa e matangí ʻi he peesi 46 pe ʻi he Maʻake 4:36–41. Talanoa fekauʻaki mo e ngaahi founga ʻoku ʻomi ai ʻe Sīsū ʻa e nongá kiate koé.
Hivá: “ʻOku Ongo ʻa e ʻOfá” (Tohi Hiva ʻa e Fānaú, 42)
ʻEkitivitī: Tuʻu fakafuopotopoto pea pukepuke ʻa e ngaahi tafaʻaki ʻo ha sipi kafu. Tuku ha foʻi pulu ʻi he sipi kafú pea liaki takai holo, ʻo hangē ko hono liaki holo ʻe he peaú ʻa e vaká. Taufetongi ʻi hono tala ki he kulupú ke ʻai vave, māmālie pe “tuʻu maʻu.”
Mana ʻi he Vaʻinga Mateʻi ʻo e Folofolá
Ki he Mātiu 9–10; Maʻake 5; Luke 9
Talanoá: Naʻe fakahoko ʻe Sīsū Kalaisi ha ngaahi mana lahi. Naʻá Ne fakamoʻui ha tangata naʻe ʻikai lava ʻo lue. Naʻá Ne fakamoʻui ha finemui naʻe mate Naʻá Ne fakaʻā ha ongo tangata kui. (Vakai, Mātiu 9.) Ko e hā ha ngaahi mana kehe naʻe fakahoko ʻe Sīsū?
Hivá: “Talamai ʻa e Ngaahi Talanoa ʻo Sīsū” (Tohi Hiva ʻa e Fānaú, 36)
ʻEkitivitī: Hiki ha niʻihi ʻo e ngaahi mana ʻa Sīsuú ʻi ha ngaahi laʻipepa pea faʻo ia ʻi ha poulu. Fili ha laʻipepa, lau ʻa e mana ʻi aí, pea tā hano fakatātā. ʻE lava ke mateʻi ʻe he toengá pe ko e fē ia!
Ngāue Fakataha
Ki he Mātiu 11–12; Luke 11
Talanoa: Naʻe folofola ʻa Sīsū Kalaisi, “ʻOku faingofua pē ʻeku haʻamongá, pea ʻoku maʻamaʻa ʻeku kavengá” (Mātiu 11:30). ʻOku tokoni ʻa e ʻioké ki ha ongo monumanu ke toho fakataha ha meʻa. ʻI he taimi ʻoku tau fili ai ke muimui ʻia Sīsuú, te Ne lava ʻo tokoniʻi kitautolu ʻi hotau ngaahi ʻahiʻahí.
Hivá: “Ka Ne ʻi Heni ʻa e Fakamoʻuí” (ChurchofJesusChrist.org)
ʻEkitivitī: Kole ki ha taha ke ne ʻunuakiʻi ha meʻa mamafa ʻi he lokí. Pea ʻai leva ke nau ʻunuakiʻi ʻa e meʻa ko iá ʻaki ha tokoni ʻa ha taha. Talanoa fekauʻaki mo e founga ʻoku maʻamaʻa ange ai ʻetau ngaahi kavengá ʻi he taimi ʻoku tau tafoki ai ki he Fakamoʻuí ki ha tokoní.
Tohi Haʻo Talanoa Fakatātā Pē ʻAʻau!
Talanoá: Naʻe akoʻi ʻe Sīsū ʻa e ongoongoleleí ʻaki ha ngaahi talanoa ne ʻiloa ko e “ngaahi talanoa fakatātā.” Naʻá Ne fakahoko ha talanoa ʻe taha fekauʻaki mo e founga ʻe lava ke tupu ai ha kiʻi tengaʻi mūsita ʻo hoko ko ha fuʻu ʻakau lahi (vakai, Mātiu 13:31–32). Ko e hā e meʻa naʻá Ne akoʻí? Ko e hā mo ha toe ngaahi talanoa fakatātā kehe naʻe akoʻi ʻe Sīsū?
Hivá: “If I Listen with My Heart” (ChurchofJesusChrist.org)
ʻEkitivitī: ʻE lava ke tokoni ʻa e ngaahi talanoa fakatātaá ke mahino lelei ange kiate kitautolu ʻa e ongoongoleleí. Huke ki he peesi 8 ke tohi haʻo talanoa fakatātā pē ʻaʻau. Vahevahe hoʻo talanoa fakatātaá mo e kau mēmipa ʻo e fāmilí pe ngaahi kaungāmeʻá.
Lahi Ange ʻi he Feʻungá
Ki he Mātiu 14; Maʻake 6; Sione 5–6
Talanoá: Ne ʻi ai ha ʻaho ne akoʻi ai ʻe Sīsū Kalaisi e kakaí ʻi ha ʻaho kakato ʻe taha. Naʻe fiekaia ʻa e tokotaha kotoa pē. Ka ko e foʻi mā pē ʻe nima mo ha mataʻiika ʻe ua ne nau maʻú. Naʻe tāpuakiʻi ʻe Sīsū ʻa e maá mo e iká, pea vahevahe ia ʻe he kau ākongá mo e kakaí. Naʻe feʻunga ʻa e meʻakaí ki he kakai ʻe toko 5,000 tupu! (Vakai, Mātiu 14:15–21).
Hivá: “ʻOku ou Feinga ke Hangē ko Sīsuú” (Tohi Hiva ʻa e Fānaú, 40)
ʻEkitivitií: Taʻo haʻo foʻi mā ʻi he founga ʻokú ke manako taha aí, pe ʻahiʻahiʻi ʻa e founga ʻi he peesi 8. Fakatokangaʻi e founga ʻoku ngaohi ai ʻe ha meʻa siʻisiʻi hangē ko e ʻīsité ʻa e foʻi mā kakató ke fōlahi angé. Kuo ngaohi fēfē nai ʻe Sīsū ke lahi hoʻo fanga kiʻi ngāue īkí?