« Te tuta ’e te parāoa ’orota, » Hoa, Mē 2023, 8–9.
Te tuta ’e te parāoa ’orota
Nāhea te mau hōho’a pēni a Dieter e nehenehe ai e tauturu ia vetahi ’ē ?
’Ua tupu teie ’ā’amu i Tanata.
’Ua hina’aro Dieter e fa’aro’o i te ’āmuira’a rahi. ’Ua tāmata ’oia e pārahi hau noa. ’Ua tāmata ’oia e fa’aro’o i te mau a’ora’a. ’Ua ha’afifihia rā ’oia e te ma’i hiparoto ’ia tūtonu atu. ’Ua hā’uti’uti ’oia i ni’a i te pārahira’a. ’Ua ha’uti ’oia ’e tāna mau ha’uti. ’Ua horo ’oia nā te mau vāhi ato’a.
I muri iho, ’ua hi’o atu ’oia ia pāpā. Tē pārahi ra pāpā ma te māniania ’ore ’e tē fa’aro’o ra i te feiā a’o. ’Ua hina’aro Dieter e riro mai iāna te huru. Nō reira, ’ua ’īriti mai ’oia i tāna mau tauiha’a anoihi. Penei a’e e tauturu te fa’a’ūra’a i te hō’ē hōho’a iāna, ’ia pārahi māniania ’ore noa.
’A fa’a’ū noa ai ’oia, ’ua fa’aro’o Dieter ia Elder Jeffrey R. Holland i te paraparaura’a. ’Ua fa’ati’a Elder Holland i te hō’ē ā’amu nō ni’a ia Iesu. ’Ua ani Iesu i te hō’ē taure’are’a tao’a rahi ’ia hōro’a i tāna moni tā’āto’a i te feiā veve.*
’Ua hina’aro ato’a Dieter e tauturu i te mau ta’ata ’aita tā rātou e moni. ’E e mana’o tōna.
« Māmā, tē hina’aro nei au e pēni i te hō’ē tuta », ’ua parau Dieter. « E nehenehe ānei ’oe e pāpa’i hōho’a i te hō’ē nā’u ? »
« ’Ē », te parau ïa a māmā. ’Ua pāpa’i hōho’a ’oia i te hō’ē tuta.
Uhi atu ra Dieter i tāna purūmu pēni i roto i te pēni. ’Ua pēni ’oia nā mua i te pererau o te tuta. ’Ua pēni ’oia i te mau huruhuru i te ’ū ’ō’aha ’e te mau huruhuru i te ’ū puātou. ’A pēni noa ai ’oia, tē fa’aro’o ra ’oia i te tahi atu mau a’ora’a. Noa atu ē ’ua hope te mau a’oraa ato’a, ’ua tāmau noa ’o Dieter i te rave i te ’ohipa. ’Ua hina’aro ’oia, ’ia nehenehe maita’i te tuta.
Teie nei ra, ’ua oti te fa’a’ūra’a a Dieter. ’Ua fa’a’ite atu ’oia i te tuta ia māmā.
« E mea faʼahiahia roa ! » ’Ua parau Māmā. « E ti’a ānei e fa’atautau i te reira ? »
’Ua tā’iri’iri Dieter te upo’o nō te parau ’aita. « Tē hina’aro nei au e ho’o i te reira ’e e hōro’a i te moni nō te tauturu i te mau ta’ata ’aita tā rātou e moni. Mai tā rātou i parau i te ’āmuira’a ».
’Ua ʼataʼata māmā. « E hi’o ana’e e aha tā tāua e nehenehe e rave ».
’Ua hāpono atu māmā i te hō’ē hōho’a nō te hōho’a pēni a Dieter nō te ho’o nā ni’a i te natirara. ’Ua pāpa’i māmā ma te parau ē, e hōro’a Dieter i te moni nā te hō’ē pūhapara’a nō te feiā ’aita e fare.
’Ia po’ipo’i a’e, ’ua hi’opo’a Dieter ’e o māmā i te poro’i. ’Ua māere roa Dieter ! E rave rahi ta’ata tei hina’aro e ho’o mai i tāna hōho’a. ’Ua ’oa’oa roa ’oia nō te rahira’a o te ta’ata tei hina’aro e tauturu.
’Ua ani te hō’ē fare tāmā’ara’a nō te ’oire o Dieter, e ho’o mai i te hōho’a pēni. ’Ua parau rātou e tāta’i ’ahuru rātou i te ’aufau i te ho’o tā Dieter ’e tā māmā i ani ! ’Ua ani ato’a mai te tahi atu mau fare toa iāna i te tahi atu mau hōho’a peni. Rahi roa atu te ’ohipa a Dieter !
’Ua pāpa’i hōho’a māmā i te tahi atu mau ’ānimara, ’e ’ua ’īriti mai Dieter i tāna mau pēni. ’Ua fa’a’ū ’oia i te hō’ē ruto, te hō’ē liona, ’e te hō’ē parāoa ’orota. E mea au a’e nāna te parāoa ’orota. ’Ua hōro’a ’oia i te i’oa ’o « Otis te parāoa ’orota ». Nā te hō’ē fare toa i pīha’i iho i tōna fare i ho’o mai i te reira. I muri iho, ’a haere ai Dieter i te fare toa ’ua ’ite atu ’oia i te reira i te tārerera’a i ni’a i te papa’i !
« ’A hi’o na māmā ! » ’Ua fa’atoro Dieter i ni’a i te hōho’a pēni.
« ’Auē te au ē ! » ’Ua parau māmā. « I teienei, i te mau taime ato’a e haere mai tāua i’ō nei, e nehenehe tāua e ha’amana’o e mea nāhea tō ’oe mau tāreni i te tauturura’a i te ta’ata ».
’Ua te’ote’o Dieter i te mea ē, e mea au roa nā te ta’ata tāna mau hōho’a pēni. Terā rā, ’ua ’oa’oa rahi roa atu ā ’oia i te tauturura’a ia vetahi ’ē. ’Ua ’oa’oa ’oia i te fa’aro’ora’a i te taime o te ’āmuira’a rahi.
Fa’ahōho’ara’a nā Natalie Campbell