« Te pure a Rosi, » Hoa, Mē 2023, 14–15.
Te pure a Rosi
’Ua rohirohi roa Rosi i te fāri’ira’a i te mana’o ē, ’aita tōna e pārahira’a.
’Ua tupu teie ’ā’amu i te fenua Marite.
’Ua tu’u Rosi i tāna pūtē i ni’a i te tahua. Nō fa’aoti noa mai nei ’oia i te piti o te mahana i roto i tāna piha ha’api’ira’a ’āpī. ’E e ’ere ïa i te mahana maita’i.
« E aha te fifi ? » ’Ua ui atu māmā.
’Ua topa pārahi atu ra Rosi i ni’a i te ro’i pārahira’a. « ’Ua parau te tahi mau tamari’i nō tā’u piha ha’api’ira’a i te mau mea ’ino nō’u », ’ua parau ’oia. « Nō ni’a i tō’u ’iri ravarava ».
’Aita i rahi te ta’ata i te fare ha’api’ira’a e hō’ē ā ’iri e tō Rosi, nō reira ’ua mana’o ’oia ’aita tōna e pārahira’a. ’Ua ha’amāuiui roa atu rā te mau fa’ao’ō’ora’a iāna.
E mata pe’ape’a tō māmā. « ’A tātarahapa mai », ’ua parau ’oia. ’Ua tauahi atu ’oia ia Rosi. « E paraparau vau i tō ’oe ’orometua ha’api’i nō ni’a i te reira ».
Terā rā i te mahana i muri iho i te fare ha’api’ira’a, ’ua fa’ao’ō’o-fa’ahou-hia ’o Rosi. E mea ’ino roa te hō’ē tamāroa i roto i tāna piha ha’api’ira’a i ni’a iāna, i te mahana tā’āto’a.
’Ua ’oto o Rosi. ’Ua riri ato’a rā ’oia. I te tahi taime, ’ia ’ino ana’e mai te tamāroa i ni’a iāna, e pāhono riri atu Rosi. ’Aita rā te reira i tauturu ia Rosi ’ia maita’i mai.
I te hō’ē mahana, ’a ho’i mai ai Rosi nā te fare ha’api’ira’a, ’ua horo ’āfaro atu ’oia i roto i tōna piha. ’Ua ta’ahoa roa ’oia i te mau fa’ao’ō’ora’a. ’Ua ta’ahoa roa ’oia i te mana’ora’a ē, ’aita tōna e parahira’a. ’Ua tāpo’i atu ’oia i tōna hōho’a mata i te tūru’a ’e ’ua ta’i.
E aha tā’u e rave ? ’ua feruri ’oia. ’Aita ’oia i hina’aro e fāri’i i te reira mana’o nō te roara’a o te matahiti ha’api’ira’a.
’Ua tāmarō Rosi i tōna mata. I muri iho, ’ua hi’o atu i ni’a i te ti’i na’ina’i o Iesu i ni’a i tāna vaira’a buka. ’Ua hōro’a mai māmā te reira nā Rosi nō te tauturu iāna ’ia ha’amana’o noa ia Iesu.
Penei a’e e ti’a iā’u ’ia pure, ’ua mana’o ’oia. ’Ua tūturi atu ’oia ’e ’ua tūfene i tōna na rima.
« E te Metua here i te ao ra, tē māuiui mau nei au i roto. E mea ’ino roa tō’u mau hoa piha ha’api’ira’a i ni’a iā’u nō tō’u ’iri ravarava, ’e tē māuiui nei au. ’A tauturu mai na iā’u ».
E mea au roa ’ia paraparau i tōna mau mana’o i te Metua i te ao ra. ’Ua ’ite ’oia ē, tē fa’aro’o ra ’oia. ’Ua tae mai te mana’o māhanahana ’e te here, mai te hō’ē ’ahu ta’oto marū tei pū’ohuhia i ni’a iho iāna. ’Ua mana’o ’oia ē, e mea nehenehe te ’ū o tōna ’iri. E tamari’i ’oia nā te Atua, ’e ’ua here ’oia iāna.
I te otira’a Rosi i te pure, ’ua tupu mai te hō’ē mana’o iāna. Penei a’e e ti’a iāna ’ia rave hau atu nō te tauturu i tāna fare ha’api’ira’a.
I te hepetoma i muri iho, ’ua paraparau Rosi ’e tōna māmā i te feiā fa’atere o te ha’api’ira’a, nō te ’ohipa e tupu ra i roto i tāna piha ha’api’ira’a. ’Ua ha’apa’o atu Rosi i te tahi atu mau tamari’i i te fare ha’api’ira’a, tei fāri’i ato’a i te fa’a’o’ō’ora’a ’e ’ua fa’ahoa atu ’oia ia rātou. ’Ua tāmata ’oia i te tāu’a ’ore i te tamaiti e fa’a’o’ō’o nei iāna. ’E i te fare purera’a i te sābati, ’ua fa’a’ite ’oia i tōna ’itera’a pāpū ē, ’ua here te Metua i te ao ra i te mau ta’ata ato’a.
’Aita te mau mea i te fare ha’api’ira’a i maita’i ’oi’oi mai. ’Ia fifi roa ana’e rā, e ha’amana’o Rosi i te mea tāna i fāri’i i roto i tāna pure. E tamari’i ’oia nā te Atua, ’e ’ua herehia ’oia. ’E nō te mea ’ua ’ite ’oia i te reira, ’ua ti’a iāna ’ia rave i te mau mea ato’a.
Fa’ahōho’ara’a nā Shawna J. C. Tenney