« Te ’ōpani ’īriti o te hiero », Hoa, Mē 2023, 16–17.
Te ’ōpani ’īriti o te hiero
’Ua ’ana’anatae roa Svetan i te tomo atu i roto i te hiero !
’Ua tupu teie ’ā’amu i te fenua Marite.
E ’ana’anatae rahi tō Svetan. Tē rātere ra tōna ’utuāfare mai Rāparata nō te fenua Marite. ’E i teienei, ’ua tae te taime nō te pa’uma i roto te manureva rahi !
’Ua hi’o Svetan nā te ha’amāramarama ’a ma’ue ai te manureva. ’Ua uiui ’oia iāna iho, e aha te huru o tōna fare ’āpī. E mea ta’a ’ē te mau mea ato’a. Hō’ē fare ’āpī. Hō’ē piha ta’otora’a ’āpī. Hō’ē vāhi nohora’a ’āpī. ’E te mau hoa ’āpī e fārerei ! ’Ua ʼana’anatae roa Svetan.
’Ua ’ite ato’a Svetan ē, tei pīha’i iho tōna fare ’āpī i te hō’ē hiero tei patu-’āpī-hia. I Raparata, e mea ātea roa te hiero. ’Ua ’ite noa ’oia i te reira i roto i te mau hōho’a.
’Ua fāriu atu Svetan i ni’a ia Mami. « I tō ’oe mana’o, e ti’a ānei ia tātou ’ia ’ite i te hiero nā ni’a atu i te ra’i ? »
’Ua ’ata’ata Mami. « ’Aita vau i mana’o. Fātata rā tātou e ’ite mai i te reira ».
’Ua ʼata’ata ato’a ’o Svetan. ’Ua parau Mami ’e ’o Papi ē, ’aita te hiero i matara atu ra. ’Aita rā e maoro roa e tupu te hō’ē ’ōpani ’īriti. Te aura’a, e nehenehe te mau ta’ata e tomo atu i roto nō te hi’o i te reira, hou ’a ha’amo’ahia ai. ’E e haere te ’utuāfare o Svetan i te ’ōpani ’īriti ! E ’oa’oa iti rahi tōna ’ia hi’o mau i te hiero.
Ma’a hora i muri mai, tei roto Svetan ’e tōna ’utuāfare i tō rātou fare ’āpī. E rave rahi ’ohipa e rave. ’Ua tauturu Svetan i te tātaratara i tā rātou mau ’āfata ’e e fa’anehenehe i tō rātou fare.
I te mahana nā mua a’e te ’ōpani ’īriti, ’ua pārahi rātou i roto i te piha fa’afa’aeara’a nō te paraparau.
« Te hiero ’o te fare ïa o te Fatu », ’ua parau Mami. « ’Ia tae tātou i roto, tītauhia ia tātou ’ia fa’atura. ’Ua ’ite ānei ’oe e aha te aura’a o te reira ? »
« E paraparau marū noa ’ia nehenehe ia tātou e fa’aro’o maita’i a’e i te Vārua Maita’i ? » ’Ua pāhono atu Svetan.
« Tē reira ihoā », ’ua parau Mami. « E nehenehe tātou e ha’api’i rahi mai ’ia vai ana’e tātou i roto i te hiero ».
’Ua tā’iri’iri Svetan te upo’o. ’Ua hina’aro ’oia ’ia fa’atura ’ia nehenehe iāna ’ia fāri’i i te Vārua Maita’i i roto i te hiero.
I te po’ipo’i a’e, ’ua ara ’oi’oi Svetan. ’Ua ’ahu i tōna ’ahu nō te sābati. ’E ’ua tae te taime nō te haere.
’Ua tae te ’utuāfare o Svetan i te hiero. ’Ua tauturu te mau ta’ata ia rātou ’ia ’ō’omo i te mau pū’ohu tīa’a ’ūrina na’ina’i.
« Nō te aha rātou i fa’a’ō’omo ai i teie mau pū’ohu tīa’a i tō’u ’āvae e Mami ? » Ui atu ra Svetan.
« Nō te mea i roto i te hiero e mea ’āpī ’e e mea mā te mau mea ato’a. E hina’aro tātou e ha’apa’o maita’i i te reira ».
’Ua fāri’i poupou mai te hō’ē vahine ia rātou. ’Ua tai’o te vahine i te mau ta’o i ni’a i te ’ūputa o te hiero : « Ha’amo’ahia i te Fatu—te Fare o te Fatu ».
’Ua tāpe’a atu Svetan i te rima o Mami. ’Ua tomo atu rātou i roto. E mea nehenehe roa te mau mea ato’a ! Penei a’e mai te reira te mana’o e fāri’ihia i te ra’i.
« ’A hi’o na ! » Muhumuhu a’era Svetan. ’Ua fa’atoro ’oia i ni’a i te hō’ē hōho’a pēni. « Tē vai ra Iesu ! »
I te otira’a, ’ua ’oa’oa roa Svetan. ’Ua māuruuru roa ’oia i te tomora’a ’oia i roto i te hiero. ’Ua hina’aro ’oia e ho’i fa’ahou i roto ’ia pa’ari ana’e ’oia.
Fa’ahōho’ara’a nā Mark Robison