« Te mau hoa origami », Hoa, Mē 2023, 30–31.
Te mau hoa origami
Nāhea e nehenehe ai ia Ari ’e tōna mau hoa e tauturu ia Franklin vahine ?
’Ua tupu teie ’ā’amu i te fenua Marite.
« Taime fa’afa’aeara’a ! » ’Ua pi’i te orometua a Ari.
’Ua ana’i te mau hoa o Ari nō te haere i rāpae i te tahua ha’utira’a. Terā rā e haere noa Ari ’e tōna mau hoa i te vāhi vaira’a buka, i te reira taime. E mea au roa nā rātou e tārahu mai i te mau buka ’e e hāmani ’āmui i te mau ’ohipa rima’ī.
Tē tīa’i noa ra Kristin ’e o Ella i te ’ūputa. ’Ua rave mai Ari i tāna buka ’e hō’ē ha’apu’era’a pāpie. I muri iho ’ua ’īriti mai ’oia i te ’ē’a nā roto i te aroā.
« Maita’i ē, ’ua fa’aho’ihia mai The Dragon Keeper’s Secret [Te parau huna a te Tīa’i Teni] ! » ’Ua parau Ari. « ’Ua hina’aro vau e tārahu i te reira e rave rahi hepetoma i teienei ».
I te taera’a rātou i te vāhi vaira’a buka, ’ua tārape atu te mau tamāhine ia Franklin vahine, te ha’apa’o vaira’a buka o te fare ha’api’ira’a. ’Ua fāri’i noa ’oia ia rātou ma te mata ’ata’ata. I teie rā mahana, e ere tōna mata i te mea ’ata’ata maita’i.
’Ua fa’atu’atu’a Ari i tōna mata, ’a tu’u ai ’oia i tāna buka i ni’a i te hō’ē ’aira’amā’a. « E huru ’oto ānei tō Franklin vahine i tō ’outou hi’ora’a ? »
Ha’ape’e a’e ra Kristin i tōna tapono. « E mea ’ohipa roa paha ’oia ».
« Pēnei a’e » Pārahi ihora Ari ’e ’ua huti mai i te hō’ē ’api parau. ’Ua tūfetu māite ’oia i te reira, ma te fa’ahe’e i te tūfetura’a ’e tōna manimani rima rahi.
« E aha tā tātou e rave i teie mahana ? » Ui a’e ra Ella.
« E aha tō ’outou mana’o te mau tāpa’o buka ? » ’Ua parau Ari. « E mea ’ōhie roa te reira. E fa’a’ite atu vau ia ’ōrua ».
’Ua ha’api’i mai Ari nāhea i te hāmani i te origami [hōho’a pāpie]. E ’ohipa anoihi te reira nō Tāpōne, tei ravehia ma te tūfetu i te ’api parau nā roto i te mau huru hōho’a ato’a. ’Ua ’ite Ari nāhea i te hāmani i te mau huru hōho’a ato’a, ’e ’ua ha’api’i ’oia i tōna mau hoa i te mea tāna i ha’api’i mai.
’Ua fa’a’ite Ari ia Kristin ’e ia Ella nāhea ’ia hāmani i te tūfetura’a tāta’itahi. ’Aita i maoro roa, ’ua oti mai tā rātou e toru tāpa’o buka na’ina’i.
« E tano te reira i te poro, mai teie te huru ». ’Ua ’īriti mai Ari i tāna buka ’e ’ua tu’u i te tāpa’o buka i te poro o te hō’ē ’api.
« Nave ! » ’Ua rave mai ra Kristin i te tahi atu ’api parau. « Tē hina’aro nei au e tāmata vau iho i te reira ».
’A ’ohipa ai rātou, ’ua paraparau rātou nō ni’a i te mau buka tā rātou i tai’o ’e te mau buka tā rātou e hina’aro e tai’o i muri iho. ’Ua hi’o fa’ahou atu ra Ari ia Franklin vahine. E au ē, tē ’oto ri’i noa ra ’oia.
’Aita i maoro ’ua fa’aea mai Franklin vahine i tā rātou ’aira’amā’a.
« ’Ia ora na te mau tamāhine ». ’Ua tu’u mai ’oia i te hō’ē buka i ni’a i te ’aira’amā’a. ’O te buka ïa nō Te parau huna a te tīa’i teni ! « Nā ’oe teie e Ari. ’Ua ’ite au ē, tē tīa’i nei ’oe nō te tai’o i te reira ».
« Māuruuru roa ! ». ’Ua rave mai Ari i te reira.
Autā a’e ra Franklin vahine. « ’Ua ’eiā te hō’ē ta’ata i tō’u pere’o’o i teie mahana. ’Ua rave rātou i tā’u mau buka ’e tā’u pehe ».
« E mea fifi roa ! » ’Ua parau Kristin.
Fa’a’ite ihora Franklin vahine ia rātou te hō’ē ’ata ’oto. « ’Ē pa’i, e tauiha’a noa te reira. E nehenehe noa te mau tauiha’a e monohia. Tē ’oa’oa nei au i te mea ē, ’aita hō’ē ta’ata i pēpē ».
’Ua hi’o Ari ia Franklin vahine i te haere-’ē-ra’a.
« Tē hina’aro nei au ’ia rave tātou i te hō’ē mea nō te tauturu », ’ua parau Ella.
’Ua hi’o atu Ari i te hōho’a tāpa’o buka origami i roto i tōna nā rima. « Penei a’e e nehenehe tātou ! »
« E aha ra ? » Ui a’e ra Kristin.
’Ua ’ata’ata Ari. « Haere mai i tō’u fare i muri a’e i te ha’api’ira’a. E mana’o tō’u ».
I te po’ipo’i a’e, ’ua haere Ari, Kristin ’e ’o Ella i te fare vaira’a buka i tō rātou taime fa’afa’aeara’a, mai tā rātou i nā reira noa na. I teie rā taime, ’aita rātou i hōpoi noa mai i te mau buka. E ’ohipa ta’a ’ē tā rātou nā Franklin vahine.
« ’Ua hāmani mātou i teie mau mea nā ’oe ! » ’Ua hōro’a atu Ari i te hō’ē pūtē nā Franklin vahine. « ’Ua ’ite mātou ē, e’ita tā mātou e nehenehe e mono i te mau mea ato’a tei ’eiāhia, ’ua mana’o rā mātou ē, e fa’aitoito teie mau mea ia ’oe ».
’Ua hi’o Franklin vahine i roto i te pūtē. ’Ua ’ī i te mau origami—te mau tāpa’o buka, te i’a, te māfatu, te mau pepe. ’Ua ’āta’ata rahi roa ’oia.
« E mea fa’ahiahia mau te reira ! Māuruuru maita’i ». ’Ua huti mai ’oia i te hō’ē hōho’a origami nā roto mai i te pūtē. ’Ua tūfetuhia nō te hāmani i te hō’ē buka na’ina’i. « E fa’a’ohipa vau i teie buka iti ’ā’amu nō te pāpa’i i te tā’āto’ara’a o tō’u mau mana’o ’oa’oa ! »
’Ua ʼata ato’a mai ’o Ari. E nehenehe noa ’oia e rave i te hō’ē mea maita’i nō vetahi ’ē—hō’ē ’api parau tūfetu i te taime hō’ē.
Te mau fa’ahōho’ara’a nā Brian Martin