« Te temeio o te hiero a Jimena », Hoa, Mē 2023, 36–37.
Te temeio o te hieroa Jimena
’Ua ha’ape’ape’a Jimena. ’Ua ’ite rā ’oia e tauturu mai te Fatu iāna.
’Ua tupu teie ’ā’amu i Guatemala.
’Ua pa’uma Jimena i roto i te pere’o’o ’e ’ua tāmau i tōna hātua. Tei ni’a ’ōna ’e tōna nā metua i te purūmu nō te haere i te hiero. Teie tāna taime mātāmua nō te rave i te mau bāpetizora’a hiero. E bāpetizo Papi iāna nō te tahi o tō rātou mau tupuna. ’Aita Jimena e nehenehe e tīa’i !
Terā rā, ’ua ha’amana’o Jimena i te hō’ē ’ohipa tei fa’ataiā iāna. « Papi », ’ua parau ’oia, « ’e tā’u pāmu rā’au ? »
E ma’i ’ōmaha tihota tō Jimena, nūmera 1. Nō te vai maita’i noa i te pae ea, e amo noa ’oia i teie mātini na’ina’i i ni’a iāna tei pi’ihia te pāmu ’oromona ’aitihota (insuline), nō te tauturu i te fa’a’aifāito i te tihota i roto i tōna toto. Mai te mea e maoro roa te taime ’aita ’oia e amo i teie mātini i ni’a iāna, e ma’ihia ’oia.
« E vaiiho ānei rātou iā’u ’ia amo i te reira i roto i te hiero ? » ’Ua ui atu Jimena. ’Ua ’ōtu’itu’i pūai tōna māfatu. « ’E ’ia haere au i roto i te pape ? »
« ’Aita e fifi », ’ua parau Papi. « E nehenehe ’oe e ’ō’omo i tā ’oe pāmu, ē tae roa i te taime e tomo ’oe i roto i te pape. I muri iho e tauturu Māmā ia ’oe ’ia ’ō’omo fa’ahou i te reira ’a haere ai ’oe i rāpae ».
’Ua tā’iri’iri Māmā i tōna upo’o. « ’E mai mea tē ’ite ra ’oe te ha’amata ra ’oe i te ma’ihia i te taime ’a rave ai ’oe te mau bāpetizora’a, ’a parau noa ia Papi ’e e nehenehe ’oe e fa’aea ». ’Ua tāpe’a atu Māmā i tōna rima. « E fa’aea noa mātou i pīha’i iho ia ’oe i te taime tā’āto’a ».
« Nā reira ïa », ’ua parau Jimena. Tē vai noa ra tōna ha’ape’ape’ara’a. ’Ua tauturu rā Māmā ’e o Papi i te tāmarū iāna.
I tō rātou taera’a atu, ’ua tāpe’a atu Jimena i tō Māmā ’e tō Papi rima, ’a haere ai rātou i te ’ūputa o te hiero. I tōna tomora’a atu i roto, ’ua fāri’i Jimena i te hō’ē mana’o māhanahana ’e te tāmarū. ’Ua ’ite ’oia ē, ’ua parau te Vārua Maita’i iāna ē, e tauturu mai te Metua i te ao ra iāna, noa atu tē ha’ape’ape’a nei ’oia. E maita’i te mau mea ato’a, mai tā Papi i parau.
’Ua taui Jimena iāna i roto i te ’ahu ’uo’uo. I muri iho, ’ua tauturu Māmā ia Jimena ’ia tātara i tāna pāmu. « Nō te tahi noa tau minuti noa », ’ua parau Māmā. ’Ua rave mai ’oia ia Jimena i roto iāna.
Tomo atu ra Jimena i roto i te pape. Tē tīa’i ra Papi iāna. ’Ua toro atu ’oia i te rima ’e ’ua tauturu ia Jimena ’ia pou mai nā ni’a te ’ē’a.
’Ua parau Papi i te pure bāpetizora’a ’e ’ua tāumi ia Jimena i raro i te pape. I tōna ti’ara’a mai, ’ua ’ata’ata Jimena. I muri iho, ’ua rave rāua i te tahi atu ā mau bāpetizora’a.
« Mea maita’i ’oe ? » ’Ua muhumuhu atu Papi i roto i tōna tari’a.
« ’Ē ! », ’ua parau Jimena.
’Ua bāpetizo Papi iāna nō te tahi atu ā mau ta’ata. « E nehenehe ānei ’oe e rave hau atu ? », ui fa’ahou atu ra ’oia.
« ’Ē ! », ’ua parau Jimena.
I muri a’e i te bāpetizora’a hope’a, ’ua tauturu atu Māmā ia Jimena ’ia ’ō’omo i tāna pāmu ’e ’ua hi’opo’a i te fāito tihota o Jimena. ’Ua ’ata’ata Māmā. Mea tano noa ! Mai te huru ra ē, ’aita roa atu Jimena i tātara i tāna pāmu.
I muri iho, ’ua haere atu rātou i roto i te hō’ē piha na’ina’i a’e. ’Ua tu’u atu Papi i tōna nā rima i ni’a i te upo’o o Jimena. ’Ua ha’amau ’oia iāna ’ei melo nō Te ’Ēkālesia a Iesu Mesia i te Feiā Mo’a i te mau Mahana Hope’a nei, nō te mau ta’ata tei pohe, tāna iho i bāpetizo. I teienei, e nehenehe tōna mau tupuna e mā’iti e ’āmui mai i te ’Ēkālesia a Iesu Mesia !
I te pō ’utuāfare nō te hepetoma i muri iho, ’ua paraparau Jimena ’e tōna nā metua nō ni’a i tō rātou tere i te hiero. « Te hiero ’o te fare ïa o te Fatu », ’ua parau Papi. « ’Ia haere ana’e tātou, e nehenehe tātou e fāri’i i te mau temeio i roto i tō tātou orara’a ».
« Mai te aha te huru o te mau temeio ? » ui mai ra te teina o Jimena, ’o Pablo.
« ’Ua ha’ape’ape’a ri’i au i te mana’o ē e tātara i tō’u pāmu ’oromona ’aitihota (Insuline), nō te tomo i roto i te pape », tē parau ra Jimena. « ’A rave ai au i te mau bāpetizora’a, ’aita roa vau i ’ite a’e i te ma’i. E temeio mau teie ! » ’Ua ’ata’ata Jimena. « ’E noa atu ā ’ua ri’ari’a vau, ’ua tauturu mai te Vārua Maita’i iā’u ’ia vai hau noa. E temeio ato’a te reira ».
Fa’ahōho’ara’a nā Alyssa Petersen