« Cameron te ta’ata ha’uti piāna », Hoa, Mē 2023, 40–41.
Cameron te ta’ata ha’uti piāna
’Aita ’o Cameron i ’ite i te ha’uti, ’ua hina’aro rā ’oia e tauturu.
’Ua tupu teie ’ā’amu i te fenua Marite.
« E tamari’i au nā te Atua », ’ua hīmene Cameron ’e te tahi atu mau tamari’i Paraimere. E tari’a turi tō Cameron, e mea au rā nāna ’ia hīmene. Tē fātata mai ra te taime, e hīmene atu rātou i roto i te fa’anahora’a a te Paraimere. E hō’ē noa ’āva’e e toe ra !
I te hopera’a te taime hīmenera’a, ’ua fa’a’ite mai te tuahine Jones i te hō’ē fa’aarara’a. « ’Aita e maoro roa, e taui tō tātou ta’ata fa’ata’i piāna nō te Paraimere i te nohora’a. E ’oa’oa rahi mātou, ’ia ha’uti vetahi o ’outou i te piāna nō te fa’anahora’a a te Paraimere. E hina’aro ānei vetahi o ’outou e ha’uti i te hō’ē ’aore rā e piti hīmene ? »
’Āfa’i a’era Cameron i tōna rima i ni’a. E hina’aro tōna e tauturu i te fa’anahora’a.
’Ua pāpa’i te tuahine Jones i te mau i’oa o te mau tamari’i e hina’aro e tauturu. « Emma. Ben. ’E Cameron ! ’Aita vau i ’ite ē, e nehenehe ’oe e ha’uti ». ’Ua ʼataʼata ʼoia.
’Aita roa a’e o Cameron i rave nā i te ha’api’ipi’ira’a nā mua a’e, mea au rā nāna e pāpa’i i te mau hīmene i ni’a i te piāna, i te fare o tōna māmā rū’au.
« ’Aita vau i te mea ’aravihi roa », ’ua parau ’oia. « Tē mana’o nei rā vau ē, e nehenehe au e ha’uti mai te mea e ha’api’ipi’i au ! »
« Māuruuru i te fāri’ira’a ’ia tāvini », ’ua parau te tuahine Jones. ’Ua hōro’a ’oia i te tamari’i tāta’itahi e piti hīmene nō te ha’uti.
’Ua hina’aro roa Cameron e horo haere nā roto i te ārea iti. ’Ua hina’aro noa nā ’oia i te ha’api’ipi’i, i teienei rā, e nā reira ’oia !
« E ’oa’oa rahi tō ’oe ’ia hi’ohia atu ! E ’ohipa ānei tei tupu i te Paraimere ? » Ui a’era māmā i tō rātou tomora’a i roto i te pere’o’o i muri a’e i te purera’a.
’Ā’ano roa te ’ata a Cameron. « E ha’uti au i te piāna nō te fa’anahora’a a te Paraimere ! »
« Mea au roa nā’u ē, tē hina’aro nei ’oe e tauturu », ’ua parau māmā. « ’Aita nei ho’i ’oe i ’ite maita’i i te ha’uti i te piāna nō te rave i te reira ».
Pārahi ’āfaro a’era Cameron. « E nehenehe au e ha’api’i. E fa’aitoito vau i te ha’api’ipi’ira’a ! E nehenehe au e fa’a’ohipa i te piāna a māmā rū’au ».
« Maita’i a’e paha ïa e ha’amata i teienei ! » ’Ua parau māmā.
’Ua tauturu māmā ia Cameron ’ia ’imi i te hō’ē ’orometua ha’api’i piāna. ’Ua fa’a’ite te ’orometua ha’api’i iāna i te mau rāve’a ’ōhie nō te ha’uti i te « Oh, j’aime voir le temple » ’e « L’Eglise de Jésus Christ ».
Pinepine Cameron i te ha’api’ipi’i mai tāna e nehenehe iō māmā rū’au. ’Ua ha’api’ipi’i ’oia nā ni’a iho noa i te mau reni tāta’itahi o te hīmene. Noa atu te mau hape tāna i rave, ’ua tāmau noa ’oia i te tāmata ’e i te ha’uti. I te pae hope’a, ’ua nehenehe iāna e ha’uti i nā hīmene e piti.
’Aita i maoro roa, ’ua tae te taime nō te fa’anahora’a a te Paraimere. « E aha tō ’oe huru ? » ’Ua ui atu māmā.
’Ua ’ū’umi Cameron i tāna buka piāna i roto i tōna ’ōuma. « Taiā ri’i E ’oa’oa ato’a rā ».
Taera’a i tōna taime nō te ha’uti, ’ua rūrūta’ina ri’i te rima o Cameron. E te Metua i te ao ra, ’a tauturu mai iā’u, pure iho ra ’oia i roto iāna. Huti a’era ’oia i te aho. I reira, ’ua ha’uti ’oia mai te fāito maita’i ’o tāna e nehenehe. ’Ua hīmene te tahi mau tamari’i.
I te hopera’a te hīmene, ’ua ’ata’ata ’oia. E mea ’oa’oa roa ! ’Ua ’ite ’oia ’ua tauturuhia ’oia e te Vārua Maita’i.
I teienei, ’ua ha’uti ’oia i te hō’ē hīmene, rahi fa’ahou tō Cameron ti’aturira’a. ’Ua ha’amata ’oia i te piti o te hīmene. ’Ua tere noa tōna mau manimani rima nō ni’a i te mau pitopito mai tāna i ha’api’ipi’i.
Teie te hīmene au-roa-hia a’e e Cameron. ’A ha’uti noa ai ’oia, ’ua feruri noa ’oia i te mau parau. « Tē tiʼaturi nei au i te Fa’aora, Iesu Mesia. E fa’atura vau i tōna i’oa ». ’Ua ha’a itoito maita’i o Cameron nō te ha’api’i i te mau hīmene nō te fa’anahora’a.
Penei a’e te ha’utira’a i te piāna o te hō’ē ïa rāve’a nō te fa’a’ite i tō’u ’itera’a pāpū, ’ua mana’o o Cameron.
I muri a’e i te fa’anahora’a, ’ua tāuahi māmā ia Cameron.
« E aha te huru ? », tāna ïa uira’a.
« Taiā ri’i i te ha’amatara’a, ’ua au roa rā vau ! » Te parau ïa a Cameron. ’Ua hina’aro ’oia e tāmau noa i te ha’api’ipi’i ’e ’ia ha’api’i fa’ahou i te tahi atu ā mau hīmene.
Fa’ahōho’ara’a nā Adam Koford