« Fa’a’īhia ’e te here », Hoa, Mē 2023, 26–27.
Fa’a’īhia ’e te here
« E nehenehe ato’a ānei tātou e tauturu i te ’utuāfare o Jose ? » Ui atu ra Marius.
’Ua tupu teie ’ā’amu i i te fenua Firipino.
’A haere ai Marius i tōna fare, ’ua nehenehe iāna e fa’aro’o i te mau ta’ata e paraparau ra i roto. ’Ua hi’o atu ’oia nā te ha’amāramarama.
Tē uiui nei au ’o vai ra tei i’ō nei, ’ua feruri ’oia. Tē ora ra tōna māmā i roto i te tahi atu fenua nō te ’ohipa, nō reira, ’o ’ōna ana’e ’e ’o Lola (māmā rū’au) i te fare.
’Ua ’īriti ’oia i te ’ōpani. Tei reira tōna mau hoa ato’a !
« Teie mātou ! » parau mai ra rātou.
« ’Ua hina’aro mātou e fa’ahanahana ia ’oe ’e te fēti’a tā ’oe i fāri’i nō tata’ura’a taputo tāpōne », ’ua parau Jose, te hoa maita’i roa a’e o Marius.
« Tē fa’ahiahia nei au ia ’oe ». Tauahi rahi mai ra Lola ia Marius. « ’O tō ’oe metua vahine teie i roto i te niuniu ! ’Ua pāpū iā’u ē, e hina’aro rahi tōna e ’ite i te mau mea ato’a nō ni’a i tā ’oe fēti’a ».
I muri a’e i tō Marius paraparaura’a ia māmā, ’ua ’oa’oa ’oia ’e tōna mau hoa i te ’āreareara’a. ’Ua paraparau ’ārearea rātou ’e ’ua ’amu i te mā’a monamona a Lola.
« E hina’aro ānei ’oe e haere nā muri iā’u i te bowling [fa’atopa mōhina] ananahi ? » ’Ua ani atu Jose hou ’oia ’a ho’i ai.
« ’Ē ! ». ’Ua parau Marius.
I taua pō ra hou ’oia ’a haere ai e ta’oto, ’ua pure Marius. « E te Metua i te ao ra, māuruuru nō tō ’oe hōro’ara’a mai iā’u i te mau hoa maita’i ’e hō’ē ’utuāfare. ’A ha’amaita’i i tō’u māmā i te ātea ’ē. ’E ’a ha’amaita’i mai iā’u ’ia ’ārearea maita’i au ’e ’o Jose ananahi i te bowling ».
I te mahana rā i muri iho, ’aita ’o Marius i nehenehe e haere i te bowling. ’Ua tupu te hō’ē vero rahi ’e ’ua tītauhia i te mau ta’ata ato’a ’ia fa’aea i te fare. ’Ua pārahi Marius i te fare, ma te fa’aro’o i te ua i te tūpa’ira’a i ni’a i te tāpo’i fare. ’Ua hina’aro ’oia e ’ite ia Jose.
E toru mahana, ’ua tāmau noa te ua. ’Ua tomohia te mau purūmu i te pape. ’Ua vaipu’e vetahi mau fare i te vāhi fa’aeara’a o Marius.
I muri a’e, ’ua ’ite Marius ia Lola i roto i te fare tūtu. Tē tunu ra ’oia i te hō’ē mea hau’a no’ano’a.
« E aha tā ’oe e tunu ra ? » ’ua ui atu ’oia.
« Tē hāmani nei au i te mā’a nā te tahi mau ’utuāfare i roto i tā tātou pāroita, » ’ua parau Lola. « ’Ua vaipu’ehia tō rātou fare, nō reira, ’ua ani mai te ’episekōpo iā’u ’ia tauturu ».
’Ua mana’o Marius ia Jose. « E nehenehe ānei tāua e hāmani i te mā’a nā te ’utuāfare o Jose ? E hina’aro ato’a paha rātou i te tauturu ».
« E mana’o maita’i roa te reira », ’ua parau Lola.
’Ua tunu Marius i te raiti ’e ’ua farai i te huero moa nā Jose ’e tōna ’utuāfare. I muri iho, ’ua tauturu ’oia ia Lola nō te pū’ohu i te mā’a.
I te pae hope’a, ’ua fa’aea te ua. ’Ua haere Marius ’e o Lola nā roto i te aroā vaipu’e nō te ’ōpere i te mā’a. ’Ua mara’a te pape i ni’a i te turi ’āvae o Marius !
’Ua ’ite atu rāua ia Jose ’e tōna ’utuāfare i mua i tō rātou fare. Tē ta’i ra Jose.
’Ua tauahi atu Marius i tōna hoa. « Tē ’oto nei au ē ’ua tomohia tō ’oe fare i te pape », ’ua parau ’oia. « ’Ua here Iesu ia ’outou. ’E māua ato’a »,
’Ua tauturu ’āmui Marius ’e ’o Jose i te tāmā i te mau mea tei varihia i roto i te fare o Jose. ’Ua hīmene Marius « E tamari’i au nā te Atua » ’a ’ohipa noa ai rātou. I tō rāua fa’afa’aeara’a, ’ua hōro’a atu Marius ia Jose i te mā’a tāna i hāmani nāna.
« Māuruuru i te tauturura’a i tō’u ’utuāfare », ’ua parau Jose. « ’E māuruuru nō te mā’a ! E mea monamona mau ».
« Maita’i ïa », ’ua parau Marius.
« I tō ’oe mana’o, e nehenehe ’oe e paraparau rahi mai ā iā’u nō ni’a ia Iesu ? ’E te hīmene tā ’oe i hīmene ? » ’ua ui a’era Jose.
« ’Oia mau ! » ’Ua parau Marius. « E hina’aro ānei ’oe e haere mai i te purera’a nā muri iho iā’u a sābati ? I reira vau e ha’api’i mai ai nō ni’a ia Iesu. ’E e nehenehe ato’a tātou e hīmene ’āmui ».
« Nā reira », ’ua parau Jose.
’Ua fāri’i Marius te māhanahana i roto iāna. ’Ua ’oa’oa ’oia i te tauturura’a ia Jose ’e tōna ’utuāfare. ’E ’ua ’oa’oa ’oia i te fa’a’ite-ato’a-ra’a i te ’evanelia.
Fa’ahōho’ara’a nā Jamie Bauza