“Ko e Lotu ʻa Losí,” Ko e Kaumeʻá, Mē 2023, 14–15.
Ko e Lotu ʻa Losí
Naʻe pāhia ʻa Losi ʻi he ongoʻi hangē naʻe ʻikai talitali lelei iá.
Naʻe hoko ʻa e talanoa ko ʻení ʻi he ʻIunaiteti Siteiti ʻo ʻAmeliká.
Naʻe lī ʻe Losi ʻene kató ki he falikí. Ko e toki ʻosi ia hono ʻaho ua ʻi heʻene kalasi foʻoú. Pea naʻe ʻikai ko ha ʻaho lelei ia.
“Ko e hā e meʻa ʻoku hokó?” Ko e fehuʻi ange ia ʻa e Fineʻeikí.
Naʻá ne tō tangutu hifo ʻi he seá. Naʻá ne pehē ange, “Naʻe lea taʻeʻofa mai ha niʻihi ʻo e fānau ʻi heʻeku kalasí kiate au. Fekauʻaki mo hoku kili lanu melomeló.”
Naʻe ʻikai tokolahi ha niʻihi ʻi he akó naʻe lanu tatau honau kilí mo Losí, ko ia naʻá ne ongoʻi hangē ʻoku ʻikai fiemaʻu iá. Ka naʻe hanga ʻe he fakamatalilí ʻo ʻai ia ke ne ongoʻi lotomamahi ange.
Naʻe fofonga hohaʻa ʻene faʻeé. Naʻá ne pehē ange, “Kātaki pē.” Naʻá ne fāʻofua kia Losi. “Te u talanoa ki ai mo hoʻo faiakó.”
Ka ʻi he ʻaho hono hokó ʻi he akó, naʻe toe fakamataliliʻi pē ʻa Losi. Naʻe angakovi ha tamasiʻi ʻe taha ʻi heʻene kalasí kiate ia he ʻahó kakato.
Naʻe ongoʻi lotomamahi ʻa Losi. Ka naʻá ne toe ongoʻi ʻita foki. ʻI he taimi ʻe niʻihi ʻi heʻene angakovi kia Losí, naʻá ne toe fakafepaki atu. Ka naʻe ʻikai ke ne ongoʻi fiemālie ai.
ʻI ha ʻaho ʻe taha ʻi he foki ʻa Losi mei he akó, naʻá ne lele hangatonu pē ki hono lokí. Naʻá ne foʻi ʻi hono fakamataliliʻi iá. Naʻá ne pāhia ʻi he ongoʻi hangē ʻoku ʻikai fiemaʻu iá. Naʻá ne foʻohifo ʻi hono piló peá ne tangi.
Naʻá ne fakakaukau ʻo pehē, ko e hā te u faí? . Naʻe ʻikai ke ne fie ongoʻi pehē ʻi he toenga ʻo e taʻu fakaakó.
Naʻe holoholoʻi ʻe Losi hono matá. Naʻá ne sio hake leva ki he kiʻi tā tongitongi ʻo Sīsū naʻe ʻi heʻene tukuʻanga tohí. Naʻe ʻoange ia ʻe he Fineʻeikí kia Losi ke tokoni ke ne manatuʻi ʻa Sīsū.
Naʻá ne fakakaukau, mahalo ʻoku totonu ke u lotu. Naʻá ne tūʻulutui hifo ʻo kūnima.
“Tamai Hēvani, ʻoku ou loto mamahi ʻaupito. ʻOku angakovi mai hoku kaungā akó kiate au koeʻuhí ko hoku kili lanu melomeló, pea ʻoku ou ongoʻi lotomamahi ai. Kātaki ʻo tokoniʻi muʻa au.”
Naʻá ne ongoʻi fiefia ʻi hono fakahā ki he Tamai Hēvaní ʻene ngaahi ongó. Naʻá ne ʻiloʻi ʻokú Ne fanongo mai. Naʻá ne ongoʻi māfana mo ʻofaʻi, ʻo hangē naʻe takatakaiʻi ia ʻe ha sipi kafu moluú. Naʻá ne ongoʻi naʻe fakaʻofoʻofa e lanu hono kilí. Ko ha ʻofefine ia ʻo e ʻOtuá, ʻokú Ne ʻofa ʻiate ia.
ʻI he ʻosi e lotu ʻa Losí, naʻá ne maʻu ha foʻi fakakaukau. Mahalo pē naʻe ʻi ai mo ha toe meʻa lahi ange te ne lava ʻo fai ke tokoni ai ʻi hono ʻapiakó.
ʻI he uike hono hokó, naʻe talanoa ʻa Losi mo ʻene faʻeé ki he kakai naʻa nau tokangaʻi e ʻapiakó fekauʻaki mo e meʻa naʻe hoko ʻi hono loki akó. Naʻe fakasiosio ʻe Losi e fānau kehe ʻi he akó naʻe fakamamahiʻí pea fakakaungāmeʻa kiate kinautolu. Naʻá ne feinga ke tukunoaʻi e kiʻi tamasiʻi naʻá ne fakamataliliʻi iá. Pea ʻi he lotú he Sāpaté, naʻá ne vahevahe ʻene fakamoʻoni ʻoku ʻofa ʻa e Tamai Hēvaní ki he tokotaha kotoa pē.
Naʻe ʻikai fakaʻau ke saiange e ngaahi meʻa ʻi he akó he taimi pē ko iá. Ka ʻi he taimi naʻe faingataʻa aí, naʻe manatuʻi ʻe Losi e ongo naʻá ne maʻu lolotonga ʻene lotú. Ko ha fānau ia ʻa e ʻOtuá, pea naʻe ʻofaʻi ia. Pea koeʻuhí naʻá ne ʻiloʻi ia, te ne lava ʻo fai ha faʻahinga meʻa pē.
ʻŪ tā fakatātā ʻa Shawna J. C. Tenney