Ngaahi tali fekauʻaki mo e Temipalé

ʻOku anga fēfē ʻa e loto temipalé?

ʻŪ tā ʻo e loto temipalé

Ko e temipalé ko e fale ia ʻo e ʻEikí. ʻOku maʻa mo fakaʻofoʻofa ʻa loto. ʻOku teunga hinehina ʻa e tokotaha kotoa pē mo feinga ke ʻapasia. Ko ha feituʻu nonga ia ke hū ai ki he ʻOtuá, ako, mo ongoʻi e ʻofa ʻa e Fakamoʻuí ʻo fakafou ʻi he Laumālie Māʻoniʻoní.

Ko e hā ʻoku fai ʻe he kakaí ʻi loto he temipalé?

Ko ha laʻitā ʻo ha kiʻi taʻahine mo ha kiʻi tamasiʻi ʻi he tafaʻaki ʻo ha laʻitā ʻo ʻena ngaahi kuí

ʻOku tau ako ʻi he temipalé fekauʻaki mo e palani ʻa e ʻOtuá mo fai ha ngaahi fuakava mo Ia. ʻOku tau fai ʻeni ʻaki ʻetau kau ʻi he ngaahi ouau hangē ko e papitaisó, hilifakinimá mo e silaʻi ki hotau ngaahi fāmilí.

Te u teunga fēfē nai ʻi heʻeku ʻalu ki he temipalé?

Ko ha kiʻi tamasiʻi ʻoku suti mo hēkesi ʻi he tafaʻaki ʻo ha kiʻi tamasiʻi tui ʻovalolo.

ʻOku totonu ke ke tui ho vala lelei tahá ki he temipalé. Ko hoʻo hū pē ki lotó, te ke fetongi leva ki ha vala makehe ke fakahoko ʻaki e ngaahi ouaú. Ki he papitaisó, ʻe ʻoatu ʻe he kau ngāue temipalé ha ʻovalolo hinehina ke ke tui.

Ko e hā ʻa e lekomeni temipale?

Ko ha kiʻi tamasiʻi ʻoku malimali mo toʻo ha kaati

Ko e lekomeni temipalé ko ha laʻipepa siʻisiʻi ia ʻokú ne fakaʻatā koe ke ke hū ki he temipalé. Te ke lava ʻo maʻu ia mei ha mēmipa hoʻo kau pīsopelikí pe kau palesitenisī fakakoló. Te ne fehuʻi atu pe ʻokú ke tauhi e ngaahi fekaú pea kapau ʻoku ʻi ai haʻo fakamoʻoni. Kapau ʻokú ke moʻui taau mo mateuteu ke hū he temipalé, te ne ʻoatu haʻo lekomeni temipale.

ʻOku ʻuhinga ki he hā ʻa e papitaiso maʻá e kau pekiá?

Ko ha taʻahine ʻoku papitaiso ʻi ha faiʻanga papitaiso he temipalé

ʻE lava ke tau papitaiso ʻi he temipalé maʻá e kakai kuo pekia ne teʻeki papitaisó. Te ke tui vala hinehina pea fakauku (puli kakato) hifo ʻi he vaí.

Ko e hā ʻa e ouau lakanga fakataulaʻeiki?

Ko ha kiʻi leka ʻokú ne maʻu e sākalamēnití mo ha kiʻi taʻahine ʻoku foaki hano tāpuaki

Ko e ouau ʻo e lakanga fakataulaʻeikí ko ha ngāue toputapu ia ʻoku fakahoko ʻi he mafai mo e mālohi mei he ʻOtuá. Ko e papitaisó, hilifakinimá, mo e sākalamēnití ko ha ngaahi ouau ia ʻoku fakahoko ʻi tuʻa ʻi he temipalé. Ko e papitaiso ʻi he temipalé, ʻenitaumení, mo e silá ko ha ngaahi ouau ia ʻoku fakahoko ʻi loto he temipalé.

Ko e hā ʻa e fuakava?

Ko e fuakavá ko ha palōmesi tafaʻaki ua ia ʻoku tau fakahoko mo e Tamai Hēvaní. ʻOku tau palōmesi kiate Ia ha ngaahi meʻa pau, pea ʻokú Ne talaʻofa mai te Ne ʻiate kitautolu mo tāpuakiʻi kitautolu.

PDF talanoa

Ngaahi tā fakatātā ʻa Simini Blocker