“Tanumaki ʻAki ʻa e ʻOfa,” Ko e Kaumeʻá, Mē 2023, 26–27.
Tanumaki ʻAki ʻa e ʻOfa
“Te tau lava nai ʻo tokoni ki he fāmili ʻo Hōseá?” Naʻe fehuʻi ʻe Meliasi.
Naʻe hoko ʻa e talanoa ko ʻení ʻi Filipaini.
ʻI he lue atu ʻa Meliasi ki hono falé, naʻá ne fanongo ki he talanoa ha kakai ʻi loto. Naʻá ne fakasiosio atu ʻi he matapā sioʻatá.
Naʻá ne fifili, ko hai nai ʻoku ʻi hení. Naʻe nofo ʻene faʻeé ʻi ha fonua ʻe taha ki he ngāué, pea ko e angamahení ko ia pē mo Lola (Kuifefine) naʻe nofó.
Naʻá ne fakaava ʻa e matapaá. Naʻe ʻi ai kotoa hono ngaahi kaungāmeʻá!
Naʻa nau pehē “Surprise!”
Naʻe pehē ange ʻe Hōsea, ko e kaungāmeʻa lelei taha ʻo Meliasí, “Naʻa mau loto ke fakafiefiaʻi koe mo hoʻo maʻu mētali ʻi he feʻauhi Taikuanitoó.”
“ʻOku ou laukau ʻaki koe.” Naʻe kukuʻi ʻe Lola ʻa Meliasi ʻi heʻene fāʻofuá. “ʻOku tatali mai hoʻo faʻeé ʻi he telefoní! ʻOku ou tui ʻe fie fanongo ki he meʻa kotoa fekauʻaki mo hoʻo mētalí.”
Hili e talanoa ʻa Meliasi ki heʻene faʻeé, naʻá ne fiefia mo hono ngaahi kaungāmeʻá ʻi he pātí. Naʻa nau fiefia he talanoa mo kai e meʻatokoni ifo ʻa Lolá.
“Te ke fie ʻalu ʻo vaʻinga poulingi mo au ʻapongipongi?” Ko e fehuʻi ange ia ʻa Hōsea kimuʻa peá ne mavahé.
“ʻIo!” Ko Meliasi ange ia.
Kimuʻa pea mohe ʻa Meliasi he pō ko iá, naʻá ne fakahoko ha lotu. “Tamai Hēvani, ʻoku ou fakamālō ki he ʻAfio ná ʻi hono foaki mai kiate au ha ngaahi kaungāmeʻa mo ha fāmili lelei. Kātaki ʻo tāpuakiʻi ʻeku faʻeé lolotonga ʻene mamaʻó. Pea kātaki ʻo tāpuakiʻi au ke u fiefia ʻi heʻeku vaʻinga poulingi mo Hōsea ʻapongipongí.”
Ka ʻi he ʻaho hono hokó, naʻe ʻikai ʻalu ʻa Meliasi ʻo poulingi. Naʻe tō ha ʻuha lōvai pea naʻe pau ke nofo fale ai ʻa e tokotaha kotoa pē. Naʻe tangutu ʻa Meliasi ʻi ʻapi ʻo fanongo ki he ngangana ʻa e ʻuhá ʻi he ʻató. Naʻá ne fakaʻamu ke lava ʻo sio kia Hōsea.
Naʻe ʻuha taʻetuku ʻi ha ʻaho ʻe tolu. Naʻe fonu vai e ngaahi halá. Naʻe tāfea foki mo ha ngaahi fale ʻe niʻihi ʻi he kaungāʻapi ʻo Meliasí.
Kimui ange ne sio ʻa Meliasi kia Lola ʻi he peitó. Naʻá ne ngaohi ha meʻatokoni naʻe namu lelei.
Naʻá ne fehuʻi ange, “Ko e hā ʻokú ke ngaohí?”
Naʻá ne pehē ange, “ʻOku ou ngaohi ha meʻakai maʻa ha ngaahi fāmili ʻi hotau uōtí. Naʻe tāfea honau ngaahi falé, pea naʻe kole mai ʻe he pīsopé ke u tokoni.”
Naʻe fakakaukau ʻa Meliasi kia Hōsea. “Te ta lava nai ʻo ngaohi ha meʻatokoni maʻá e fāmili ʻo Hōseá? Mahalo te nau fiemaʻu tokoni foki mo kinautolu.”
Naʻe pehē ange ʻe Lola, “Ko ha fakakaukau lelei ia.”
Naʻe haka ʻe Meliasi ha laise mo fakapaku ha fuaʻimoa maʻa Hōsea mo hono fāmilí. Naʻá ne tokoni leva kia Lola ke faʻo ʻa e meʻakaí.
Naʻe faifai pea tuʻu ʻa e ʻuhá. Naʻe aʻa atu leva ʻa Meliasi mo Lola he ngaahi halá ke tufa e meʻatokoní. Naʻe aʻu e vaí ki he tui ʻa Meliasí!
Ne na sio kia Hōsea mo hono fāmilí ʻoku nau tuʻu ʻi tuʻa honau falé. Naʻe tangi ʻa Hōsea.
Naʻe fāʻofua ʻa Meliasi ki hono kaungāmeʻá. Naʻá ne pehē ange, “Fakamolemole ʻi he tāfea homou falé. ʻOku ʻofa ʻa Sīsū ʻiate koe! Pea mo maua foki.”
Naʻe tokoni fakataha ʻa Meliasi mo Hōsea ke fakamaʻa e ngaahi meʻa naʻe pelepela ʻi he fale ʻo Hōseá. Naʻe hivaʻi ʻe Meliasi ʻa e “Fānau Au ʻa e ʻOtuá“ ʻi heʻenau ngāué. ʻI heʻenau kiʻi mālōloó, naʻe ʻoange ʻe Meliasi kia Hōsea ʻa e meʻakai naʻá ne ngaohi maʻaná.
Naʻe pehē ange ʻe Hosea, “Mālō hoʻo tokoni ki hoku fāmilí. Pea fakamalo atu he meʻatokoní! ʻOku ifo.”
Naʻe pehē ange ʻe Meliasi, “ʻOku ou fiefia ke fai ia maʻau.”
Naʻe kole ange ʻe Hōsea, “ʻOkú ke pehē te ke lava ʻo vahevahe mai ʻo lahi ange fekauʻaki mo Sīsū? Pea mo e foʻi hiva naʻá ke hivaʻí?”
“ʻIo!” Naʻe tali ange ʻe Meliasi. “Te ke fie haʻu ʻo maʻulotu mo au he Sāpaté? Ko e feituʻu ia ʻoku ou ako ai fekauʻaki mo Sīsuú. Pea te ta lava foki ʻo hiva fakataha ai.”
Naʻe pehē ange ʻe Hōsea “ʻIO.”
Naʻe ongoʻi loto-māfana ʻa Meliasi. Naʻá ne fiefia ʻi heʻene lava ʻo tokoni kia Hōsea mo hono fāmilí. Pea naʻá ne fiefia foki ʻi heʻene lava ʻo vahevahe ʻa e ongoongoleleí.
Ngaahi tā fakatātā ʻa Jamie Bauza