“Kemaloni ko e Tangata Tā Piano,” Ko e Kaumeʻá, Mē 2023, 40–41.
Kemaloni ko e Tangata Tā Pianó
Naʻe ʻikai poto ʻa Kemaloni he tā pianó, ka naʻá ne fie tokoni.
Naʻe hoko ʻa e talanoa ko ʻení ʻi he ʻIunaiteti Siteiti ʻo ʻAmeliká.
Naʻe hiva ʻe Kemaloni mo e fānau Palaimeli kehé ʻa e, “Fānau au ʻa e ʻOtuá.” Naʻe ʻikai lelei e fanongo ʻa Kemaloní, ka naʻá ne manako ke hiva. Pea ʻe vavé ni pē haʻanau hiva ʻi he polokalama ʻa e Palaimelí. Naʻe toe pē ha māhina ʻe taha.
ʻI he ʻosi ʻa e taimi hivá, naʻe fai ʻe Sisitā Sōnasi ha fanongonongo. “ʻOku vavé ni pē ha hiki ʻa e tokotaha tā piano ʻa e Palaimelí. Te mau matuʻaki fiefia ka tā ʻe hamou niʻihi e pianó ʻi heʻetau polokalama Palaimelí. ʻE fie tā nai ʻe hamou niʻihi ha foʻi hiva ʻe taha pe ua?”
Naʻe hiki ʻe Kemaloni hono nimá. Naʻá ne fie tokoni ki he polokalamá.
Naʻe hiki ʻe Sisitā Sōnasi e hingoa ʻo e fānau ne nau fie tokoní. “ʻEma. Peni. Pea mo Kemaloni! Naʻe ʻikai ke u ʻilo ʻokú ke poto he tā pianó.” Naʻá ne malimali.
Naʻe teʻeki kalasi piano tuʻo taha ʻa Kemaloni kimuʻa, ka naʻá ne manako ke faʻu ha ngaahi hiva ʻi he piano he ʻapi ʻo ʻene kui fefiné.
Naʻá ne pehē ange, “ʻOku teʻeki ai ke u fuʻu poto. Ka ʻoku ou tui te u lava ʻo fai ia kapau te u akoako!”
Naʻe pehē ʻe Sisitā Sōnasi, “Fakamālō atu ʻi hoʻo fie tokoní.” Naʻá ne ʻoange ki he fānau takitaha ha foʻi hiva ʻe ua ke nau tā.
Naʻe ongoʻi ʻe Kemaloni hangē ʻoku fie lele ia he loto holó. Kuó ne fie ako maʻu pē ke tā piano, ka ko ʻeni ʻe hoko moʻoni ia!
“ʻOkú ke fofonga fiefia! Naʻe hoko ha meʻa ʻi he Palaimelí?” Ko e fehuʻi ange ia ʻene faʻeé ʻi heʻena heka ki he kaá ʻi he tuku ʻa e lotú.
Naʻe malimali ʻa Kemaloni. “Te u tā e pianó he polokalama ʻa e Palaimelí!”
Naʻe pehē ange ʻe he Fineʻeikí, “ʻOku ou saiʻia ʻi hoʻo fie tokoní. Ka ʻoku ʻikai ke ke poto feʻunga he tā pianó ke fakahoko ia.”
Naʻe tangutu hangatonu hake ʻa Kemaloni. “Te u lava pē ʻo ako. Te u akoako fakamātoato ʻaupito! Te u lava ʻo fakaʻaongaʻi e piano ʻa Kulenimaá.”
Naʻe pehē ange ʻene faʻeé. “Ta ʻoku totonu ke ta kamata leva!”
Naʻe tokoni e Fineʻeikí kia Kemaloni ke kumi ha faiako piano. Naʻe fakaʻaliʻali ange ʻe he faiakó ha ngaahi founga faingofua ke tā ai ʻa e “Fie Siofia ha Temipalé“ mo e “Ko e Siasi ʻo Sīsū Kalaisí.”
Naʻe akoako ʻa Kemaloni ʻi he ʻapi ʻo Kulenimaá ʻi he lahi taha naʻá ne lavá. Naʻá ne akoako tā tuʻo lahi e laine takitaha ʻo e ngaahi hivá. Naʻe lahi ʻene ngaahi fehalākí, ka naʻá ne kei feinga pē mo kei tā pē. Faifai peá ne lava ʻo tā e ongo foʻi hivá fakatouʻosi.
Ne taimi nounou pē kuo hokosia e taimi ke fai ai e polokalamá. Naʻe fehuʻi ange ʻene faʻeé. “ʻOkú ke ongoʻi fēfē?”
Naʻe puke mai ʻe Kemaloni ʻene tohi tā-pianó ki hono fatafatá. “Manavasiʻi Pea mo fiefia foki.”
ʻI he hokosia e taimi ʻo Kemaloni ke taá, naʻe kiʻi tetetete hono nimá. Naʻá ne lotu ʻi heʻene fakakaukaú, Tamai Hēvani, kātaki muʻa ʻo tokoniʻi au. Naʻá ne mānava lelei. Peá ne tā leva ʻi he lelei taha naʻá ne lavá. Naʻe hiva moe toenga ʻo e fānaú.
ʻI he ʻosi ʻa e foʻi hivá, naʻá ne malimali. Naʻe fakalata ia! Naʻá ne ʻiloʻi naʻe tokoniʻi ia ʻe he Laumālie Māʻoniʻoní.
Koeʻuhí kuó ne ʻosi tā ʻeni ha foʻi hiva ʻe taha, naʻe ongoʻi ʻe Kemaloni ha loto-falala lahi ange. Naʻá ne kamata tā ʻa e foʻi hiva hono uá. Naʻe ngaʻunu hono louhiʻi nimá ʻi he ngaahi kií ʻo hangē pē ko ia naʻá ne akoakó.
Ko e foʻi hiva manako ʻeni ʻa Kemaloní. Naʻá ne fakakaukau ki he ngaahi leá lolotonga ʻene taá. “Tui ki he Fakamoʻuí, mo viki Hono Huafá.” Naʻe ngāue mālohi ʻa Kemaloni ke ako e ngaahi hiva ki he polokalamá.
Naʻe fakakaukau ʻa Kemaloni, Mahalo ko e tā pianó ko ha founga ia ʻe taha hono vahevahe ʻeku fakamoʻoní.
Hili e polokalamá, naʻe fāʻofua e Fineʻeikí kia Kemaloni.
Na‘á ne ʻeke ange, “Naʻe fēfē?”
Naʻe talaange ʻe Kemaloni. “Naʻá ku manavasiʻi ʻi he kamataʻangá, ka naʻe fakalata!” Naʻá ne loto ke hokohoko atu pē ʻene akoakó mo ako ha ngaahi hiva lahi ange.
Ngaahi tā fakatātā ʻa Adam Koford