Naʻe Akonaki ʻa Sīsū ʻi he Temipalé

Toʻo ʻa e peesi ko ʻení pea pelu ua ia. Puke hake leva ʻa e fakatātaá lolotonga hoʻo fai ʻa e talanoá.

ʻI he taʻu 12 ʻa Sīsū Kalaisí, naʻá Ne ʻalu mo Mele mo Siosefa ki Selusalema.

ʻI heʻenau fokí, naʻe fakatokangaʻi ʻe Mele mo Siosefa naʻe ʻikai ʻiloa ʻa Sīsū. Naʻá na foki fakavavevave ki Selusalema ke kumi Ia.

Naʻe fekumi mo fekumi ʻa Mele mo Siosefa. Faifai, peá na ʻilo ʻa Sīsū ʻi he temipalé. Naʻá Ne akoʻi e kakaí mo tali ʻenau ngaahi fehuʻí. Naʻe ofo ʻa e tokotaha kotoa pē ʻi he lahi ʻo ʻEne ʻilo fekauʻaki mo e ongoongoleleí. Naʻe fakahoko ʻe Sīsū e ngāue ʻa e Tamai Hēvaní neongo naʻá Ne kei siʻi.

Te tau lava foki ʻo tokoni ʻi he ngāue ʻa e Tamai Hēvaní. Te tau lava ʻo vahevahe ʻa e ongoongoleleí. Te tau lava ʻo talanoa fekauʻaki mo e temipalé. ʻE tokoni e ngaahi meʻá ni ke tau ako mo tupulaki ʻo hangē ko Sīsuú.