“Ko e ʻOupeni Hausi ʻa e Temipalé,” Ko e Kaumeʻá, Mē 2023, 16–17.
Ko e ʻOupeni Hausi ʻa e Temipalé
Naʻe fiefia ʻa Sivietani ke hū ki loto he temipalé!
Naʻe hoko ʻa e talanoa ko ʻení ʻi he ʻIunaiteti Siteiti ʻo ʻAmeliká.
Naʻe ongoʻi fiefia ʻa Sivietani. Naʻe hiki hono fāmilí mei ʻĀsenitina ki he ʻIunaiteti Siteití. Pea ko ʻeni kuo faifai pea aʻu ki he taimi ke heka ai ki he vakapuna lahí!
Naʻe sio ʻa Sivietani ki tuʻa he matapā sioʻatá ʻi he puna ʻa e vaká. Naʻá ne fifili pe ʻe fēfē nai hono ʻapi foʻoú. ʻE kehe ʻa e meʻa kotoa pē. Ko ha ʻapi foʻou. Ko ha loki foʻou. Ko ha kaungāʻapi foʻou. Pea mo ha ngaahi kaungāmeʻa foʻou ke fetaulaki mo ia! Naʻe fiefia ʻa Sivietani.
Naʻe ʻiloʻi foki ʻe Sivietani naʻe ofi hono ʻapi foʻoú ki ha temipale naʻe toki langa. ʻI ʻAsenitiná, naʻe mamaʻo ʻa e temipalé. Ko e ngaahi tā pē kuo sio aí.
Naʻe tafoki hake ʻa Sivietani ki heʻene faʻeé. “ʻOkú ke pehē te tau lava ʻo sio ki he temipalé mei he langí?”
Naʻe mamali ʻene faʻeé. “ʻOku ʻikai ke u tui ki ai. Ka ʻe vavé ni pē haʻatau sio ki ai.”
Naʻe malimali ange ʻa Sivietani. Naʻe talaange ʻe heʻene ongomātuʻá ʻoku teʻeki ava ʻa e temipalé. Ka ʻe vavé ni pē ha ʻoupeni hausi. Naʻe ʻuhinga ia ʻe lava ʻa e kakaí ʻo hū ki loto ʻo sio ʻi he temipalé kimuʻa pea toki fakatapuí. Pea ʻe ʻalu e fāmili ʻo Sivietaní ki he ʻoupeni hausí! Naʻe ʻikai ke ne faʻa tatali ke sio tonu ki he temipalé.
Hili ha ngaahi houa siʻi mei ai, kuo aʻu ʻa Sivietani mo hono fāmilí ki honau ʻapi foʻoú. Naʻe lahi e meʻa ke faí. Naʻe tokoni ʻa Sivietani ke fakaava ʻenau ʻū puhá mo teuteuʻi honau ʻapí ke hā fakaʻofoʻofa.
ʻI he ʻaho kimuʻa he ʻoupeni hausí, ne nau tangutu hifo ʻi he loto falé ke talanoa.
Naʻe pehē ange ʻe heʻene faʻeé, “Ko e temipalé ko e fale ia ʻo e ʻEikí. ʻI he taimi ʻoku tau ʻi loto aí, kuo pau ke tau loto-ʻapasia. ʻOkú ke ʻilo ʻa hono ʻuhingá?”
“Ke talanoa leʻo siʻi kae lava ke tau fanongo lelei ki he Laumālie Māʻoniʻoní?” Naʻe fehuʻi ange ʻe Sivietani.
Naʻe pehē ange ʻe heʻene faʻeé, “ʻOku tonu ia. ʻE lava ke tau ako ha ngaahi meʻa lahi ʻi heʻetau ʻi he temipalé.”
Naʻe kamo pē ʻa Sivietani. Naʻá ne loto ke ʻapasia kae lava ke ne ongoʻi e Laumālie Māʻoniʻoní ʻi he temipalé.
ʻI he pongipongi hono hokó, naʻe ʻā pongipongia hake ʻa Sivietani. Naʻá ne tui hono vala ki he Sāpaté. ʻIkai fuoloa kuo taimi ke nau ʻalu.
Naʻe aʻu e fāmili ʻo Sivietaní ki he temipalé. Naʻe tokoniʻi kinautolu ʻe he kakaí ke fakatui ha kiʻi milemila ʻi honau suú.
“Ko e hā ne nau fakatui ai e fanga kiʻi milemila ko ʻení ʻi hoku vaʻé, Mami?” Naʻe fehuʻi ange ʻe Sivietani.
“Koeʻuhí ʻoku foʻou mo maʻa ʻa e meʻa kotoa pē ʻi he loto temipalé. ʻOku tau loto ke tauhi lelei ia.”
Naʻe talitali lelei kinautolu ʻe ha fefine. Naʻá ne lau e ngaahi lea ʻi he matapā ʻo e temipalé: “Māʻoniʻoni ki he ʻEikí—ko e Fale ʻo e ʻEikí.”
Naʻe puke ʻe Sivietani e nima ʻo ʻene faʻeé. Naʻa nau lue atu ki loto. Naʻe fakaʻofoʻofa ʻa e meʻa kotoa pē! Mahalo ko e ongo ʻeni ʻo hēvaní.
“Sio!” Naʻe fanafana ange ʻa Sivietani. Naʻá ne tuhu ki ha tā valivali. “Ko Sīsū ē!”
ʻI he ʻosí, naʻe ongoʻi fiefia ʻa Sivietani. Naʻá ne houngaʻia ʻi heʻene lava ʻo hū ki loto he temipalé. Naʻá ne loto ke toe hū ki loto ʻi heʻene fuʻu lahi angé.
Ngaahi tā fakatātā ʻa Mark Robison