Mālō e Lelei mei Keipi Veeti!

Ako fekauʻaki mo e fānau ʻa e Tamai Hēvaní ʻi he funga ʻo e māmaní.

Ko e fuka ʻo Keipi Vētí

Ngaahi tā fakatātā ʻa Carolina Farías

Ko Keipi Vētí ko ha motu ia ʻoku ofi ki he matāfanga ʻo ʻAfilika Hihifó. ʻOku nofo ai ha kakai ʻe meimei toko 480, 000.

Lea Fakafonuá

Ongo tamaiki fefine ʻokú na talanoa

Ko e lea fakafonuá ʻa e lea faka-Potukalí. ʻOku toe lea foki e kakaí ʻi he lea faka-Potukali ʻa Keipi Veteini Keleioló, pe Kiliolú, ʻa ia ʻoku fakatefito ʻi he lea faka-Potukalí.

Ngaahi moʻunga afi

Ko ha moʻunga afi

ʻOku ʻi ai ha motu ʻe 10 ʻi Keipi Veeti, ʻa ia naʻe faʻu mei he moʻunga afí. ʻOku ui e moʻunga afi lahi tahá ko e Pico do Fogo. ʻOku fute ʻe 9,281 (mita ʻe 2,829) hono māʻolungá.

Tui Fakalotú

Ko ha falelotu

Ko e pēseti nai ʻe 80 ʻo e kakaí ʻoku nau Katolika. ʻOku ʻi ai foki mo ha kāingalotu ʻe toko 16,000 nai hotau Siasí.

Mūsiká

Ko ha fāmili ʻoku hiva

ʻOku manako e kakai Keipi Vētí ʻi he mūsiká! ʻOku nau faʻa hiva ʻi he lea faka-Keleioló, pea ʻoku tuifio ʻenau mūsiká mei he ngaahi sitaila Potukali, Palāsila, mo ʻAfilika Hihifó.

Temipale Praia

Ko e Temipale Praia Cape Verde

Naʻe fakatapui e fuofua temipale ʻo Keipi Vētí ʻi he taʻu kuo ʻosí!

ʻEkitivitī

ʻEkitivitī Talanoá

Ko ha fānau ʻoku nau tuʻu laine

Ko ha vaʻinga ʻeni te mou lava ʻo fakahoko! ʻE mavahe ha tokotaha mei he lokí. ʻE fai ʻe he toengá ha talanoa fekauʻaki mo ha tangata ʻoku ʻalu ʻo taumātaʻu ʻi he tahí. Lolotonga ʻenau talanoá, ʻoku nau fepaasiʻaki ha meʻa ʻiate kinautolu. ʻOku fakaʻosi ʻaki maʻu pē ʻa e talanoá e ngaahi lea, “pea mate e kiʻi iká.” Ko hai pē ʻokú ne puke e meʻa ne paasi holó ʻi he taimi ko iá, te ne fūfuuʻi ia ʻi hono tuʻá. ʻE foki mai ʻa e tokotaha naʻe mavahé ʻo mateʻi pe ko hai ʻoku ʻi ai ʻa e meʻa naʻe paasi holó. Kapau te ne mateʻi ʻo tonu, ʻe mavahe leva e tokotaha naʻe ʻi aí mei he lokí. Ka ne mateʻi ʻo hala, te ne toe mavahe pē mei he lokí pea toe kamata foʻou ʻa e talanoá.

Founga Feimeʻatokoní

Cachupa (Sitiu Kepi Veeti)

Ko ha poulu sitiu

1. Tofitofi ha foʻi onioni ʻe taha mo ha konga kāliki ʻe 6. Kuki ia ʻi ha fakapaku mo ha meʻi lolo siʻisiʻi.

2. Huaʻi e onioní mo e kālikí ki ha kulo lahi. Tānaki ki ai ha kapa temata ʻe 1, kapa hominy pe koane ʻe 1, mo ha kapa piini kulokula ʻe 2.

3. Tānaki atu mo ha kakanoʻi manu pauni ʻe 2 (1 kg), hangē ko ha puaka, sōsisi, pulu pe ika.

4. Lingi ki ai ha vai feʻunga ke puli kātoa ʻi he loto kuló. Kuki ʻi ha houa ʻe 2 pe lahi ange ʻi he ulo siʻisiʻi ʻa e sitoú.

Fakatokangaʻi ange: ʻOku lahi e ngaahi founga ke ngaohi ʻaki e cachupa. Te ke lava ʻo tānaki ki ai ha faʻahinga kehekehe ʻo e kakanoʻi manú, pīní, mo e vesitapoló kapau ʻokú ke fiemaʻu!

Kiʻi Tokoni ki he Moʻui Leleí

Maʻuʻanga Faipa lelei

Pīní, fuamelié mo e natí

ʻOku lahi e faipá ʻi he pīní, ʻa ia ʻokú ne fakamaʻa e siemú meiate kitautolu mo fakafaingofuaʻi ange e ngaʻunu holo ʻa e meʻakaí ʻi hotau sinó. Te ke lava foki ʻo maʻu ʻa e faipá mei he laisé, fuamelié, mo e natí.