“Ko e Mana ʻa Simena ʻi he Temipalé,” Ko e Kaumeʻá, Mē 2023, 36–37.
Ko e Mana ʻa Simena ʻi he Temipalé
Naʻe manavasiʻi ʻa Simena. Ka naʻá ne ʻiloʻi ʻe tokoniʻi ia ʻe he ʻEikí.
Naʻe hoko ʻa e talanoa ko ʻení ʻi Kuatemala.
Naʻe heka hake ʻa Simena ki he kaá ʻo fakamaʻu hono letá. Ko ʻene fononga atu ʻeni mo ʻene ongomātuʻá ki he temipalé. Ko e fuofua taimi ʻeni ke ne fakahoko ai ʻa e papitaiso ʻi he temipalé. ʻE papitaiso ia ʻe heʻene tamaí maʻa ha niʻihi ʻo ʻenau ngaahi kuí. Naʻe ʻikai faʻa tatali ʻa Simena!
Ka naʻe fakakaukau ʻa Simena ki ha meʻa naʻá ne loto hohaʻa ai. Naʻá ne pehē ange, “Papi, ʻe fēfē ʻeku pamú?”
Naʻe maʻu ʻe Simena ʻa e suka kalasi 1. Ke ne moʻui leleí, naʻá ne tui maʻu pē ha kiʻi meʻangāue fakaʻilekitulōnika naʻe ui ko ha pamu ʻinisulini ke tokoni ke mapuleʻi e lahi ʻo e suka ʻi hono totó. Ka fuʻu fuoloa ʻene taʻe tui iá, te ne ongoʻi puke.
“Te nau fakaʻatā nai ke u tui ia ʻi loto he temipalé?” Naʻe fehuʻi ange ʻe Simena. Naʻe tā vave hono mafú. “Fēfē e taimi te u ʻalu hifo ai ki he vaí?”
Naʻe pehē ange ʻe heʻene tamaí, “ʻE SAI pē ia. Te ke lava pē ʻo tui e pamú kae ʻoua kuó ke aʻu ki he vaí. Pea ʻe lava leva ʻa Mami ʻo tokoni atu ke fakatui fakafoki ia ʻi hoʻo haké hake pē.”
Naʻe kamokamo ʻene faʻeé. “Pea kapau ʻe kamata ke ke ongoʻi puke lolotonga hoʻo fai e papitaisó, talamai pē kia au pea ʻe lava ke taʻofi leva hoʻo papí.” Naʻe kuku ʻe heʻene faʻeé hono nimá. “Te ma ʻi ai pē he taimi kotoa.”
Naʻe talaange ʻe Simena, “ʻOku lelei.” Naʻá ne kei ongoʻi manavasiʻi pē. Ka naʻe tokoniʻi ia ʻe heʻene ongomātuʻá ke kiʻi ongoʻi sai ange.
ʻI heʻena aʻu atú, naʻe puke ʻe Simena e nima ʻo ʻene ongomātuʻá ʻi heʻenau lue atu ki he matapā ʻo e temipalé. ʻI he hū pē ʻa Simena ki lotó, naʻá ne maʻu ha ongo māfana mo fakafiemālie. Naʻá ne ʻiloʻi naʻe talaange ʻe he Laumālie Māʻoniʻoní ʻe tokoniʻi ia ʻe he Tamai Hēvaní, neongo naʻá ne manavasiʻi. ʻE lelei pē ʻa e meʻa kotoa, ʻo hangē ko e talaange ʻe heʻene tangataʻeikí.
Naʻe fetongi ʻa Simena ki hono vala hiná. Naʻe tokoniʻi leva ia ʻe heʻene faʻeé ke toʻo ʻene pamú. Naʻe pehē ange ʻe heʻene faʻeé, “ʻE taimi siʻi pē.” Naʻá ne fāʻofua kia Simena.
Naʻe hifo hifo ʻa Simena ki he vaí. Naʻe tatali ai ʻene tamaí. Naʻe mafao mai hono nimá mo tokoniʻi hifo ia he sitepú.
Naʻe fai ʻe heʻene tamaí e lotu papitaisó pea ʻohifo leva ʻa Simena ki lalo ʻi he vaí. ʻI he foki hake ʻa Simená, naʻá ne malimali. Hili iá naʻa nau fakahoko mo ha ngaahi papitaiso kehe.
“ʻOkú ke ongoʻi sai pē?” Naʻe fanafana hifo ʻene tangataʻeikí ʻi hono telingá.
Naʻe pehē ange ʻe Simena, “ʻIo!”
Naʻe papitaiso ia ʻe heʻene tamaí maʻa ha niʻihi kehe tokosiʻi. Naʻá ne toe fehuʻi ange, “Te ke lava ʻo toe hoko atu?”
Naʻe pehē ange ʻe Simena, “ʻIo!”
ʻI he hili pē ʻa e papitaiso fakaʻosí, naʻe tokoni ʻene faʻeé kia Simena ke fakatui ʻene pamú mo vakaiʻi e suka ʻo Simená. Ne malimali ʻene faʻeé. Naʻe sai pē ia! Naʻe hangē pē ne ʻikai toʻo ʻe Simena ia ʻene pamú.
Naʻa nau ʻalu atu leva ki ha kiʻi loki siʻisiʻi ange. Naʻe hilifaki ʻe he tamaí hono ongo nimá ʻi he ʻulu ʻo Simená. Naʻá ne fakamaʻu ia ko ha mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní maʻá e kakai pekia naʻe papitaiso ia maʻanautolú. Kuo lava ʻeni ʻene ngaahi kuí ʻo fili ke kau ki he Siasi ʻo Sīsū Kalaisí!
ʻI he efiafi fakafāmili ʻi ʻapi he uike hono hokó, naʻe talanoa ʻa Simena mo ʻene ongomātuʻá fekauʻaki mo ʻenau ʻalu ki he temipalé. Naʻe pehē ʻe heʻene tamaí, “Ko e temipalé ko e fale ia ʻo e ʻEikí. ʻI heʻetau ʻalu ki aí, te tau lava ʻo maʻu ha ngaahi mana ʻi heʻetau moʻuí.”
Naʻe fehuʻi ange ʻe he kiʻi tuongaʻane siʻisiʻi ʻo Simena ko Paulo, “Ko e ngaahi mana fēfē?”
Naʻe pehē ʻe Simena, “Naʻá ku manavasiʻi ke toʻo ʻeku pamu ʻinisuliní ka u hifo ki he loto vaí. Ka ʻi he lolotonga ʻeku fakahoko e papitaisó, naʻe ʻikai ke u toe ongoʻi puke. Ko ha mana ia!” Naʻe malimali ʻa Simena. “Pea neongo naʻá ku manavasiʻi, naʻe tokoniʻi au ʻe he Laumālie Māʻoniʻoní ke u ongoʻi nonga. Ko ha mana foki ia.”
Tā fakatātā ʻa Alyssa Petersen