« Te pare nō te fa’aro’o », Hoa, Tiurai 2023, 10–11.
Te pare nō te fa’aro’o
’Ua hina’aro Dashanel ’ia riro tōna fa’aro’o i te Mesia ’ei mea rahi ’e te pūai.
’Ua tupu teie ’ā’amu i Jamaica.
’Ua tauturu Dashanel i tōna tua’ana ’ia tātara mai i te faraoa ’aratita mai roto mai i te umu. ’Auē te hau’a no’ano’a ē !
I muri iho ’ua fa’aro’o atu ’oia i te pātōtōra’a o te ’ōpani. « Teie te mau misiōnare ! », ’ua tuō tōna tuahine.
’Ua horo atu Dashanel i te ’ūputa. ’Ua ’oa’oa roa ’oia i te taera’a mai te mau misiōnare. E mana’o maita’i noa tōna ’ia haere ana’e mai rāua. I te tahi mau taime, e ’āfa’i mai rāua i te mau ha’uti nāna ’e tōna mau taea’e ’e mau tuahine nō te ha’uti.
« ’Ua hāmani fa’ahou Tyrell i te faraoa ’aratita ! » ’Ua parau atu Dashanel. E mea au nā tōna taea’e e hāmani i te mā’a nā te mau misiōnare.
« ’Ua hina’aro roa vau e tāmata i te reira », te parau ïa a Elder Colas. ’Ua tomo mai ’oia ’e ’o Elder Yusaki ’e ’ua pārahi i ni’a i te tahua. ’Ua pārahi Dashanel, tōna taea’e ’e tōna tuahine ’e o Māmā i mua ia rāua.
« E aha tā tātou e rave nō te ha’api’ira’a i teie mahana ? » ’Ua ui atu ’o Dashanel.
’Ua tātara mai Elder Yusaki i te hō’ē ha’apu’era’a ’āu’a. « E patu tātou i te hō’ē pare nō te fa’aro’o. Tē fa’ahōho’a nei teie mau ’āu’a tāta’itahi i te hō’ē mea tā tātou e nehenehe e rave, nō te patu i tō tātou fa’aro’o ia Iesu Mesia ».
’Ua ha’amata Elder Yusaki i te ’āpapa i te mau ’āu’a mai te hō’ē pare. ’Ua ’ite atu Dashanel ē, tē vai ra te parau pāpa’i i ni’a i te mau ’āu’a, mai te « pure », « tuatāpapara’a pāpa’ira’a mo’a », ’e « ’ēkālesia ».
« E mau mea ato’a teie tā ’ōrua i ani mai ia mātou ’ia rave ’ei ’utuāfare », tāna ïa i parau.
« ’Ua tano roa », ’ua parau atu Elder Colas. « ’Ia rave ana’e ’outou i teie mau mea, tē patu ra ïa ’outou i tō ’outou fa’aro’o ia Iesu Mesia ».
’Ua patu tāta’itahi o Dashanel ’e tōna mau taea’e ’e mau tuahine i tō rātou iho pare, ’e te mau ’āu’a ’a fa’aro’o noa ai rātou i te ha’api’ira’a.
I muri iho i te ho’ira’a te mau misiōnare, ’ua feruri Dashanel i te mea tā rāua i ha’api’i. ’Ua hina’aro ’oia ’ia rahi roa ’e ’ia pūai tōna fa’aro’o i te Mesia, mai te pare tāna i hāmani.
’A ma’iri noa ai te mau ’āva’e, ’ua ha’api’i rahi mai Dashanel nō ni’a i te ’evanelia mai roto mai i te mau misiōnare. ’Ua ha’amata ’oia i te haere i te purera’a ’e tōna ’utuāfare. ’Ua feruri hōho’a ’oia i tōna pare nō te fa’aro’o e teitei noa atu ra.
I te hō’ē mahana i muri a’e i tō te mau misiōnare ho’ira’a, ’ua paraparau atu Dashanel ia Māmā. « E nehenehe ānei au ’ia bāpetizohia ? », ui a’era ’oia.
« ’Ua pāpū ānei ia ’oe ē, ’ua ineine oe ? » ui atu ra Māmā.
« ’Ē », ’ua parau Dashanel. « Tē hina’aro nei au e pe’e ia Iesu ».
« Nā reira ïa », ’ua parau Māmā. « Mai te mea e hina’aro ’oe, e nehenehe ’oe e bāpetizohia ».
’Ua mā’iti ato’a te taea’e ’e te tuahine o Dashanel ’ia bāpetizo-ato’a-hia. ’Ua parau Māmā ē, ’aita ā ’oia i ineine atu ra ’ia bāpetizohia.
I te mahana nō tō rātou bāpetizora’a, ’ua ’ahu Dashanel ’e tōna taea’e ’e tuahine i te ’ahu ’uo’uo. ’Ua tīa’i rātou tāta’itahi ma te fa’a’oroma’i ’ia bāpetizohia rātou.
I te taera’a i te taime o Dashanel, ’ua tauturu atu Elder Yusaki iāna ’ia tomo mai i roto i te pape. I muri iho ’ua parau ’oia i te mau parau nō te pure bāpetizora’a ’e ’ua utuhi iāna i raro a’e i te pape. I te ho’ira’a mai Dashanel i ni’a, ’aita tāna e nehenehe e fa’aea i te ’ata’ata ! ’Ua ’oa’oa ’oia ’e ’ua ’ite ē ’ua mā ’oia. ’Aita roa atu ’oia i hina’aro ’ia mo’e teie mana’o i roto.
’Ua tāmau noa Dashanel i te rave i te mau mea nō te ha’apūai i tōna fa’aro’o ia Iesu Mesia. ’Ua tai’o i te mau pāpa’ira’a mo’a ’e tōna ’utuāfare. ’Ua pure i te Metua i te ao ra. ’Ua rave i te mau ’ohipa maita’i nō vetahi ’ē. ’E ’ua ha’amana’o i te mea tāna i fāri’i i te taime ’a bāpetizohia ai ’oia. ’Ua hina’aro ’oia ’ia fāri’i ato’a Māmā i te reira mana’o.
« Māmā, nō te aha ’aita ’oe e bāpetizohia ? » ’Ua ui atu Dashanel i te hō’ē mahana.
’Ua vai mū noa māmā hō’ē minuti. « ’Ua fa’a’ite mai ’outou i te hō’ē hi’ora’a maita’i iā’u. I teienei, e ti’a iā’u ’ia fa’a’ite ia ’outou i te hō’ē hi’ora’a maita’i » ’ua parau ’oia. « Tē hina’aro ato’a nei au ’ia bāpetizohia ».
I te mahana o te bāpetizora’a o Māmā, ’ua ’oa’oa roa Dashanel. I te ti’ara’a mai Māmā nā raro mai i te pape, ’ua ’ata’ata te mau ta’ata ato’a. I teienei, e nehenehe te ’utuāfare tā’āto’a o Dashanel e patu ’āmui i tō rātou pare nō te fa’aro’o.
Fa’ahōho’ara’a nā Alyssa Tallent