« Te itoito nō ’ō mai i te Vārua Maita’i ra », Hoa, Tiurai 29, 2023.
Pāpa’ihia nā ’outou
Te itoito nō ’ō mai i te Vārua Maita’i ra
Fa’ahōho’ara’a nā Toby Newsome
I tō’u na’ina’ira’a, ’ua parau mai te mau taote i tō’u nā metua ē, e ma’i vāvā tō’u. E ma’i pe’ape’a terā o te ha’afifi i te paraparau ia vetahi ’ē. E nehenehe noa tā’u e paraparau i te mau melo nō tō’u ’utuāfare fātata roa.
E vai noa vau i roto i te pe’ape’a i te mau taime ato’a, mai te mea ihoa rā e paraparau mai te hō’ē ta’ata iā’u. E fa’atupu te pure tāmau i te mana’o maita’i roa a’e ’e e tāmarū iā’u. ’Ua fārerei ato’a vau i te hō’ē fa’aa’o i te fare ha’api’ira’a nō te tauturu mai. Teie rā, mai te huru rā ē, ’aita vau e maita’i roa ra. Fātata roa vau i te fa’aru’e, tera rā ’ua tāpe’a noa vau te fa’aro’o.
Tē taera’a mai ra i te va’ura’a o tō’u mahana fānaura’a. ’Ua tītau tō’u nā metua iā’u ’ia tai’o i te Buka a Moromona ’e ’ia pure nō te tauturu iā’u ’ia fa’aoti e bāpetizo ānei iā’u. I te mau pō ato’a, tē pure nei au nō te ani e ti’a ānei iā’u ’ia bāpetizohia. Hō’ē ā pāhonora’a tā’u i fāri’i i te mau taime ato’a—hō’ē mana’o māhanahana ’e te hau i roto i tō’u ’ā’au. ’Ua ’ite au ē, tē parau mai ra te Vārua Maita’i iā’u ē, te bāpetizora’a ’o te hō’ē mā’itira’a ti’a ïa.
I te taime ’a hōro’ahia mai ai iā’u te hōro’a o te Vārua Maita’i i muri ri’i mai i tō’u bāpetizora’a, ’ua fa’aro’o vau i te mau parau nō te tīa’ira’a, te here ’e te fa’aitoitora’a. ’Ua ’ite au ē e tāmāhanahana mai te Vārua Maita’i iā’u ’e e hōro’a mai iā’u i te itoito.
’Ua fa’aoti au e tāmata i te paraparau i tō’u hoa piri roa a’e, ’o Charlie. ’Ua tāmata vau i te hepetoma tā’āto’a, e mea pa’ari roa rā. I te hō’ē rā mahana, ’o māua Charlie ana’e i roto i te ’āua nō te fare ha’api’ira’a. ’Ua pure māmū noa vau i roto i tō’u upo’o. E te Metua i te ao ra, ’a tauturu mai na iā’u ’ia parau i te hō’ē reta parau.
’E ’ua ha’amama vau i tō’u vaha ’e ’ua parau atu vau, « Hey, Charlie ! » ’Ua māere roa ’oia. ’Ua ’oa’oa roa vau !
I muri a’e i taua mahana ra, e mea ’ōhie roa ’ia fa’aoti i te tahi atu ā mau fā. ’Aita i maoro roa, tē paraparau ra vau i te mau ta’ata ato’a e rave rahi ! Tē māuruuru nei au ’ua hōro’a mai te Vārua Maita’i iā’u i te itoito nō te paraparau ia Charlie.