« Mau ’ā’amu nō te bāpetizora’a », Hoa, Tiurai 2023, 30–31.
Mau ’ā’amu nō te bāpetizora’a
’Ua parau māmā « te hō’ē pionie ’o te ta’ata mātāmua ïa tei rave i te hō’ē ’ohipa ».
’Ua tupu teie ’ā’amu i te fenua Marite.
’Ua hurihuri noa Mary ma te fa’ahiahia i tōna ’ahu ’uo’uo i roto i te hi’o. Hō’ē ā ’ahu tā tōna māmā i ’ō’omo i tōna bāpetizora’a. ’Ua tāfai maita’i māmā rū’au tupuna Marluce i teie ’ahu ’ia tano i ni’a ia Mary. I teienei, e nehenehe Mary e ’ō’omo i te reira nō tōna iho bāpetizora’a !
« ’E mea nehenehe mau ’oe ! ». ’Ua tāpe’a a’era māmā i te rima o Mary ’e ’ua fa’a’ohu atu iāna.
’Ua hō’ata Mary. « ’E nehenehe ānei tā’u e ’ō’omo i te reira i te roara’a o te mahana ? »
« ’A fa’aherehere noa te reira nō te ’ō’omo i tō ’oe bāpetizora’a, e ti’a ’ia vai maita’i ’e te mā noa, nā reira ? » ’Ua parau māmā.
« Nā reira ». E bāpetizohia Mary i te va’ura’a o tōna matahiti, ’e ’ua fa’aineine-a’ena-hia ’oia nō te reira. ’Ua haere ’oia i te Paraimere, ’ua tai’o i te mau pāpa’ira’a mo’a, ’e ’ua haere ato’a i te bāpetizora’a o tōna mau hoa. Teie rā, mai te huru ra ē e mea ātea roa tōna mahana fānaura’a !
Mo’e a’era Mary i roto ia māmā i ni’a i te tōfa. « Māmā, e hia matahiti tō ’oe ’a bāpetizohia ai ’oe ? »
« 16 tō’u matahiti ».
« ’Auē ! » Nō te aha ’oe i tīa’i maoro ai ? »
’Ua tauahi pū’ohu a’era māmā ia Mary. « Nō te mea ’aita vau i ’ite nō ni’a i te ’Ēkālesia a Iesu Mesia i fa’aho’i-fa’ahou-hia mai e tae roa mai i taua taime ra. ’Ua ha’amata rā vau i te haere i te mau ’ātivite a te ’Ēkālesia ’e te tahi mau hoa. Rahi noa atu ā tō’u ha’api’ira’a mai, rahi noa ato’a atu tō’u hina’aro ’ia bāpetizohia ! »
« Nō te aha ho’i ? » ’Ua ui atu Mary.
« Nō te mea ’ua hina’aro vau e fāri’i i te hō’ē ’utuāfare mure ’ore ». Fa’atoro atu ra Māmā i ni’a i te hōho’a o te hiero e tārere ra i ni’a a’e ia rāua. « ’Ua ha’api’i mai au ē, i te hō’ē mahana e nehenehe au e tā’atihia i tō’u ’utuāfare i roto i te hō’ē hiero ē a muri noa atu. Te fāri’ira’a i te hō’ē ’utuāfare mure ’ore, ’o tā’u ïa moemoeā. ’O te bāpetizora’a te ta’ahira’a mātāmua ! I teienei, ’ua tupu maita’i iho ā tā’u moemoeā ».
’Ua ’ata’ata Mary. « Tē vai ra ’o pāpā, ’o Mallory, ’e te ’aiū Maeva ! ’E o vau ato’a ».
« ’Ē, ’oia mau. ’E o māmā rū’au Angela ».
« ’Ua bāpetizohia ānei māmā rū’au ’e o ’oe ? »
« ’Ua tīa’i ’oia tau matahiti i muri mai. I te mau taime ato’a rā e rātere mātou nā pīha’i iho i te hiero, e mea au nā mātou ’ia fa’aea ’e ’ia māta’ita’i atu i te reira ».
’Ua feruri Mary ia māmā ’e ia māmā rū’au i te māta’ita’i-’āmui-ra’a i te mau hiero. « ’E ’o pāpā ? E hia matahiti tōna ’a bāpetizohia ai ’oia ? »
« 11 matahiti tōna ».
« ’E i ora nā ’oia i Peretīria ? »
« Parau mau roa », ’ua parau māmā. « Tē vai ra te mau ta’ata nā te ao ato’a nei e ha’api’i mai nei nō ni’a ia Iesu ’e te bāpetizora’a. E rave rahi o rātou e mau pionie ».
« Pionie ? »
« Te hō’ē pionie o te ta’ata mātāmua ïa tei rave i te hō’ē ’ohipa » ’ua fa’ata’a mai māmā.
’Ua feruri Mary i te reira. « Mai te huru ra, ’o ’oe ’ua riro ’oe ’ei ta’ata mātāmua i roto i tō ’oe ’utuāfare tei bāpetizohia ? »
’Ua ta’iri’iri māmā te upo’o ma te mata ’ata’ata.
I taua iho taime rā, ’ua tomo mai pāpā i roto i te piha ’e ’ua pārahi mai i ni’a i te tōfa.
« Pāpā, e pionie ānei ’oe nō tō ’oe utuāfare ? »
« E nehenehe e parau. I muri mai i tō’u bāpetizora’ahia, ’ua ’ite mai au ē, e melo a’ena māmā rū’au Rosimere nō tā tātou ’ēkālesia ! ’Aita rā ’oia e haere nei e rave rahi matahiti ».
« E aha ïa ? E aha tei tupu ?
« ’Ua ha’amata vau i te haere i te purera’a. I muri iho, ’ua ha’amata ato’a tō’u mau taea’e i te haere, e muri mai ’o māmā rū’au Rosimere. ’Ua ’āmui ato’a mai ’o māmā rū’au tupuna Marluce ! »
’Ua feruri Mary ia pāpā e haere ra ’oia ana’e i te purera’a, i muri mai ’ua ’āfa’i ato’a mai ’oia i te tahi atu o tōna ’utuāfare nā muri iāna.
’Ua parau atu Mary « ’Auē ïa ē ». « ’Ua au roa vau i te fa’aro’ora’a i tō ’ōrua ’ā’amu. Tē fa’a’ana’anatae hau nei te reira iā’u ’ia bāpetizohia.
« Māuruuru i te uira’a mai ia māua i teie mau uira’a ato’a e Mary » ’ua parau pāpā. « I teienei, e nehenehe ānei māua e ui ia ’oe ? »
’Ua tā’iri’iri Mary i tōna upo’o. E aha ra tā rāua e ui mai ?
« Nō te aha ’oe i hina’aro ai ’ia bāpetizohia ’oe ? »
’Ua feruri Mary i te mea tāna i ’apo mai i roto i te mau pāpa’ira’a mo’a ’e te mea tāna i fāri’i i te fare purera’a. « Nō te mea tē hina’aro nei au i te pe’e ia Iesu ’e ’ia pārahi i piha’i iho i tō’u ’utuāfare e a muri noa atu ».
’Ua ’ata’ata a’era māmā ’e o pāpā, ’e ’ua tauahi atu Mary i tōna nā metua. « E’ita tā’u e nehenehe e tīa’i ! »
Fa’ahōho’ara’a nā Tammie Lyon