Te hoa i te hoa

’Ua ha’amata te reira i ni’a i te tahua tā’irira’a pōpō

Nā ’Elder Mark A. Bragg

Nō te Hitu ’Ahuru

Mai roto mai i te hō’ē uiuira’a ’e ’o Lucy Stevenson Ewell.

Fa’ahōho’ara’a nā Brian Michael Weaver

I te 13ra’a o tō’u matahiti, ’ua ha’uti au i roto i te hō’ē pupu ta’iri pōpō ’e te tahi mau hoa. ’Aita ā vau i riro atu ra ’ei melo nō Te ’Ēkālesia a Iesu Mesia i te Feiā Mo’a i te mau Mahana Hope’a nei, e piti rā o tō’u mau hoa ha’uti ’ē. E maeha’a rāua. ’O Rob ’e ’o Lane tō rāua i’oa.

I te hō’ē mahana, ’ua ani mai rāua iā’u ’ia haere i te purera’a pō ’utuāfare i’ō rātou. ’Aita vau i ’ite e aha te pō ’utuāfare, nō reira ’ua ’ani au i te aura’a nō taua fa’anahora’a ra. ’Ua parau mai rāua iā’u ē, e ha’api’i mai mātou nō ni’a i te mau mea o te ’Ēkālesia ’e e hīmene i te mau hīmene. « ’Aita vau i ’ana’anatae roa i te reira. ’Ua fafau mai rā rāua e tupu te tahi ’amu’amura’a, ’e nō reira ’ua fa’aoti au e haere.

’Ua haere tō’u ’utuāfare i tō rātou fare nō te pō ’utuāfare. ’Ua ’ite au i te hō’ē mea ta’a ’ē mau. ’Aita vau i ’ite e aha te reira, e au rā ē ’ua mātauhia. E mea au roa te reira. ’Ua au ato’a i tō’u māmā.

’Aita vau i ’ite i taua taime ra ē, e melo tō’u māmā nō te ’Ēkālesia. ’Ua bāpetizohia ’oia i tōna ’āpīra’a. ’Aita roa rā ’oia i haere noa a’e i te purera’a.

I muri a’e i taua pō ra, ’ua ha’amata tō’u māmā i te haere fa’ahou i te purera’a. ’Ua haere au nā muri iāna ’ia rahi atu ā tō’u ’ite. Ma’a ’āva’e i muri mai, ’ua bāpetizohia vau e te pāpā o Rob rāua Lane.

’Ua māuruuru roa vau i te mea ē, ’ua ha’apa’o maita’i Rob ’e o Lane iā’u nō te fa’a’ite i te ’evanelia. I teie mahana, ’ua ha’amaita’ihia vau i te fāri’ira’a i te hō’ē ’utuāfare mure ’ore. ’E ’ua ha’amata ho’i te reira i ni’a i te hō’ē tahua ta’irira’a pōpō !

Mai ia Rob ’e o Lane, ’e fa’atupu ’outou i te hō’ē fa’aurura’a pūai i ni’a ia vetahi ’ē. E nehenehe ’outou e fa’atupu i te hō’ē ta’a-’ē-ra’a i roto i tō ’outou ’utuāfare. E nehenehe ’outou e fa’a’ite i te ’evanelia i tō ’outou mau hoa.