« Te pupu nō te ha’amaita’i atu ā i te mau ’ohipa », Hoa, Tiurai 2023, 20–21.
Te pupu nō te ha’amaita’i atu ā i te mau ’ohipa
’Ua ’ite Josie i te hō’ē rāve’a e nehenehe ai iāna ’ia pe’e i te hi’ora’a o Iesu Mesia.
’Ua tupu teie ’ā’amu i te fenua Marite.
’Ua pārahi Josie ’e tōna tuahine fēti’i o Ashlyn i raro a’e i te hō’ē tumu rā’au i rāpae’au i tōna fare.
« Te hina’aro nei au e rave i te hō’ē ’ohipa ’ārearea ’ia nehenehe e roa’a mai te moni nā tāua », ’ua parau Josie.
« Penei a’e e nehenehe tāua e ’imi i te moni nā roto i te ravera’a i te mau ’ohipa nō te ta’ata », ’ua parau Ashlyn.
« E aha tō ’oe mana’o mai te mea e ha’amau tāua i te hō’ē pupu ? » ’Ua ’ōu’a a’era Josie ma te ’oa’oa. « Mai te hō’ē pupu ha’apa’ora’a ’ānimara ’aore rā fa’aori-haere-ra’a te ’ūri ».
« E nehenehe tāua e rave i te mau huru mea ato’a », ’ua parau Ashlyn. « E hina’aro noa te ta’ata i te tauturu. ’E e ’aufau rātou ia tāua ».
’Ua tano roa Ashlyn. I te mau mahana ato’a, e ’ite Josie i te ta’ata tei hina’aro i te tauturu.
I taua iho taime ra, ’ua fāri’i Josie i te tahi atu mana’o. ’Ua fāri’i ’oia te māhanahana i roto iāna. ’Ua fa’aha’amana’o te reira iāna i tōna bāpetizora’a i te matahiti i ma’iri a’e nei. ’Ua fafau ’oia ’ia ha’amana’o noa ia Iesu ’e ’ia pe’e i tōna hi’ora’a. ’Ua ’ite ’oia i te hō’ē rāve’a e ti’a ai iāna ’ia nā reira.
« Ahani pai e pupu tā tāua nō te tauturu i te ta’ata ma te tāmoni ’ore ? » ’Ua ui atu Josie. ’Ua pūai atu ā te huru māhanahana.
’Ua ’ara’ara roa te mata o Ashlyn. « E mea ’ārearea mau ïa », tāna ïa i parau. « E nehenehe tāua e tauturu i te ta’ata i te fare ha’api’ira’a ’e i te fare purera’a—nā te mau vāhi ato’a ».
« E nehenehe tāua e pi’i i te reira te Pupu nō te ha’amaita’i atu ā i te mau ’ohipa ! » ’Ua parau Josie. « E ha’amata ana’e ananahi i te fare ha’api’ira’a ».
I te po’ipo’i a’e i te hora fa’afa’aeara’a, ’ua horo atu Ashlyn ’e ’o Josie i te hiti o te ’āua ha’utira’a.
« Tē ’ite ra ānei ’oe i te hō’ē ta’ata e nehenehe tā tāua e tauturu ? » ’Ua ti’a o Ashlyn i ni’a i tōna muara’a ’āva’e ’e ’ua hi’o atu ra i te vāhi fa’ahe’era’a anuanua.
« ’Aita ā ». ’Ua hi’o atu Josie i te mau ’āuri tīrarera’a ’ūri ta’ata ’e te mere’ū. Te fa’ahe’e ’e te tīrare noa ra te mau tamari’i. ’Ua tāora haere rātou i te pōpō ’e ’ua ’ōu’a taura. ’Aita hō’ē a’e ta’ata i hina’aro roa i te tauturu. E au ra e hoa tō te mau ta’ata ato’a. I muri iho, ’ua ’ite atu ’oia i te hō’ē tamāhine ’āpī a’e ’ōna ana’e ’e tāna taura ’ōu’a.
’Ua haru mai ra Josie i te rima o Ashlyn. « A hi’o nā i ’ō ! »
’Ua ’itehia mai ia Josie ’e ia Ashlyn te mau taura ’ōu’a ’e ’ua haere atu ra i te tamāhine ra.
« Ia ora. ’O Josie au ».
« ’E ’o Ashlyn au. ’O vai tō ’oe i’oa ? »
’Ua māere te tamāhine. « ’O Leslie au ».
« E hina’aro ānei ’oe e ha’uti nā muri iho ia māua ? » Tē tāpe’a noa ra Josie i te hō’ē taura ’ōu’a.
’Ua ’ata Leslie. « ’Ē ! »
’Ua ha’api’i atu Ashlyn ’e ’o Josie ia Leslie i te tahi mau rāve’a ’āpī nō te ’ōu’a i te taura. ’Ia ta’i mai te oe, ’ua aroha atu ia rātou. ’Ua ’oa’oa roa Josie. ’Ua ’ite ’oia ē, ’o te Vārua Maita’i te reira.
I muri a’e i te reira, i te mau taime ato’a e ’ite atu Josie rāua Ashlyn ia Leslie i roto i te vāhi haerera’a ta’ata, e aroha rāua iāna.
’Ua ’imi Josie ’e o Ashlyn i te tahi atu ā mau ta’ata nō te tauturu. I te tahi taime e parau rāua i te mau mea maita’i i te mau ta’ata ’e e tāmata i te fa’aitoito ia rātou. I te tahi mau taime e ani rāua i te mau tamari’i ’ia haere mai e ha’uti nā muri ia rāua.
I te hō’ē mahana, ’ua ’ata’ata Josie i te hō’ē tamāroa i rāpae i te fare ha’api’ira’a. « E mea au roa nā’u tō ’oe piriaro mo’o rahi taehae », ’ua parau Josie.
’Ua ’ata te tamaiti ’e ’ua hi’o atu i tōna piriaro. « Māuruuru ».
I te pārahira’a Josie ’ite a’era oia ē, ’aita ’oia i feruri noa a’e i te rave i te reira nō te pupu ! ’Ua rave noa rā ’oia i te reira.
’Ua feruri Josie i te mau hoa ato’a tāna i fa’ahoa mai te taime ’a ha’amata ai rāua o Ashlyn i tā rāua pupu. E mea au roa nā Josie i te tauturu i te ta’ata. ’Ua fa’atupu te reira i tōna hina’aro ’ia rave rahi atu ā i te mau mea maita’i nō vetahi ’ē. ’Ua ha’amaita’i atu ā te Pupu nō te ha’amaita’i atu ā i te mau mea ato’a iāna. ’E ’ua tupu te reira i te rahi.
Fa’ahōho’ara’a nā Tania Rex