« Te metua tāne fa’ahiahia o Magnolia », Hoa, Tiurai 2023, 40–41.
Te metua tāne fa’ahiahia o Magnolia
« ’Ua parau mai te tahi mau tamari’i ē, e ’ere tātou i te ’utuāfare maita’i nō te mea e ’ere pāpā i te melo nō tā tātou ’Ēkālesia ».
’Ua tupu teie ’ā’amu i te fenua Marite.
« Magnolia ! Lily ! » ’Ua pi’i atu pāpā. « E taime nō te mau pāpa’ira’a mo’a ’e te pure ! »
’Ua ’ōu’a atu Magnolia i ni’a i te tahua i pīha’i iho i tā rātou ’ūrī, o Raindrop. ’Ua tomo atu Lily i roto i tōna ’ahu ta’oto au roa a’e.
E mea ’ārearea te taime nō te pāpa’ira’a mo’a ’utuāfare. I te tahi taime e ha’uti ’āmui ta’ata ora rātou i te mau ’ā’amu o te pāpa’ira’a mo’a. E tauturu te reira ia Magnolia ’ia ’ite hōho’a i te mau ’ā’amu. Hau atu, e tauturu tāmau noa Raindrop i te taime tē vai ra te mau ’ānimara i roto i te mau ’ā’amu !
’Ua ’īriti mai pāpā i tāna pāpa’ira’a mo’a ’e ’ua tai’o i te hō’ē ’īrava. I muri iho, ’ua hōro’a atu i te Bībīlia rahi ’e te teiaha ia Magnolia. E tai’o rātou te tahi i muri mai i te tahi.
« E ’ia hāmani maita’i ’outou te tahi i te tahi », ’ua tai’o Magnolia.*
’Ua fa’atu’atu’a ’oia i tōna mata. ’Aita te mau ta’ata i te hāmani maita’i noa i ni’a ’iāna i te fare purera’a.
« Māmā, pāpā, e nehenehe ānei tā’u e paraparau atu ia ’ōrua nō te tahi mea ? » ui atu ’oia.
« Nā reira ïa », ’ua parau māmā. « ’E aha te reira ? »
« I te Paraimere inanahi ra, ’ua parau mai te tahi mau tamari’i ē, e ’ere tātou i te hō’ē ’utuāfare maita’i nō te mea e ’ere pāpā i te melo nō tā tātou ’Ēkālesia ».
Nō te tahi ’ē ’ēkālesia te pāpā o Magnolia. ’Ua haere ’oia i te purera’a ’ōro’a ’e tō rātou ’utuāfare i te sābati. ’Ua hōro’a ’oia i te mau a’ora’a nō ni’a i te Vārua Maita’i i nā bāpetizora’a tō Lily ’e tō Magnolia. ’Ua parau te mau ta’ata ato’a e ’ohipa maita’i tāna i rave. E pāpā fa’ahiahia roa ’oia.
« Te mea tā rātou i parau, ’ua fa’atupu te reira iā’u i te ’oto ». ’Ua huti Magnolia i te aho. « Nō te aha e mea ’ino mau te mau ta’ata ? »
Hi’o a’era māmā ’e o pāpā ia rāua.
« Tē ’oa’oa nei au i tō ’oe paraura’a mai ia māua i te ’ohipa i tupu », ’ua parau pāpā. « ’Ua here roa māua o māmā ’ia ’ōrua tāta’itahi. ’E e mea faufa’a roa tō tātou ’utuāfare nō māua ».
’Ua tā’iri’iri te upo’o o māmā. « ’E e mea faufa’a ato’a tō tātou ’utuāfare nō te Metua i te ao ra. ’Ua here ’oia i tāna mau tamari’i ato’a.
Tomo atu ra Raindrop i roto ia Magnolia. Ra’ura’u a’era Magnolia i tōna tari’a.
« ’Ua mātau maita’i te Metua i te ao ra ia tātou, ’e ’ua ’ite ’oia ’ua here tātou te tahi i te tahi », ’ua parau pāpā. « ’Aita e ’utuāfare e mea maita’i hope roa, e nehenehe rā tātou e tāmata tāmau noa ’ia maita’i roa atu ».
« E mea māuiui iho ā rā ’ia parau ana’e te ta’ata i te mau parau ’ino nō tō tātou ’utuāfare », tē parau ra Magnolia. « ’Ua ha’api’i mai Iesu Mesia ia tātou ’ia hāmani maita’i ia vetahi ’ē. Te paraura’a i te parau tano ’ore, ’aita te reira e au ra i te pe’era’a ia Iesu ».
« ’Ua tano ’oe », ’ua parau pāpā. « Penei a’e ē, ’ia hina’aro ana’e ’oe e parau i te hō’ē parau tano ’ore, e nehenehe ’oe e ha’amana’o i te mea tā ’oe i fāri’i ’ia parau-’ino-hia mai ’oe e vetahi ’ē. I muri iho e nehenehe ’oe e parau i te hō’ē mea maita’i, nō te mono atu ».
Huti a’era Magnolia i te aho. « Nā reira ». ’Ua ’oa’oa roa ’oia i te paraparaura’a ia māmā ’e ia pāpā.
« E taime teie nō te ’amu’amura’a ’utuāfare ! » Huti mai ra pāpā ia Lily ’e ia Magnolia ma te tauahi rahi ia rāua ’e ’ua haru pūai ia rāua. ’Ua tauahi mai ra māmā ia rātou to’otoru. ’Ua horohoro ha’ati noa ra Raindrop ia rātou.
« E’ita tā’u e nehenehe e huti i te aho ! » hō’ata a’era Lily. ’Ua ’ata Magnolia.
« I teienei, ’a fa’aha’amana’o mai nā iā’u—nā vai e tai’o ? » ’Ua ui atu pāpā. ’Ua tu’u ’oia i te mau tamāhine ’e ’ua rave mai i tāna mau pāpa’ira’a mo’a.
« Nā’u teienei ! » ’ua parau Lily. « ’E nā pāpā e pure mai ».
I te ’otira’a tā rātou tai’ora’a, ’ua tūturi rātou pā’āto’a nō te pure. ’Ua fāri’i Magnolia te hau, ’a fa’aro’o ai ’oia ia pāpā i te purera’a. ’Ua ’ite ’oia ē, ’ua here te Metua i te ao ra i tōna ’utuāfare.
Fa’ahōho’ara’a nā Constanza Basaluzzo