« វាបានចាប់ផ្តើមនៅលើទីលានកីឡាបេស្បល » ប្រិយមិត្ត ខែ កក្កដា ឆ្នាំ ២០២៣ ទំព័រ ៣២ ។
មិត្តទៅកាន់មិត្ត
វាបានចាប់ផ្តើមនៅលើទីលានកីឡាបេស្បល !
ដកស្រង់មកពីការសម្ភាសមួយជាមួយលូស៊ីស្ទីវ៉ែនសុន អេវែល ។
រចនារូបភាពដោយ ប្រាយអិន ម៉ៃខល វីវើរ
នៅពេលខ្ញុំអាយុ ១៣ ឆ្នាំ ខ្ញុំបានលេងក្នុងក្រុមកីឡាបេស្បលជាមួយមិត្តភក្តិមួយចំនួន ។ ខ្ញុំមិនមែនជាសមាជិកនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយទេ ប៉ុន្តែមិត្តរួមក្រុមរបស់ខ្ញុំពីរនាក់ជាសមាជិក ។ ពួកគេជាកូនភ្លោះ ។ ពួកគេមានឈ្មោះថា រ៉ប់ និងឡេន ។
ថ្ងៃមួយនៅពេលហ្វឹកហាត់ ពួកគេបានអញ្ជើញខ្ញុំឲ្យចូលរួមរាត្រីជួបជុំក្រុម គ្រួសាររបស់ពួកគេ ។ កាលនោះខ្ញុំមិនដឹងថារាត្រីជួបជុំក្រុមគ្រួសារជាអ្វីទេ ដូច្នេះខ្ញុំបានសួរពីរឿងនោះ ។ ពួកគេបានប្រាប់ខ្ញុំថា យើងនឹងរៀនអំពីរឿងក្នុងព្រះវិហារ ហើយច្រៀងចម្រៀង ។ ខ្ញុំមិនសូវចាប់អារម្មណ៍អំពីរឿងនោះទេ ។ ប៉ុន្តែពួកគេសន្យាថានឹងមានបង្អែម ដូច្នេះខ្ញុំក៏សម្រេចចិត្តទៅ ។
គ្រួសារខ្ញុំបានទៅផ្ទះពួកគេនៅរាត្រីជួបជុំក្រុមគ្រួសារ ។ ខ្ញុំមានអារម្មណ៍ថាមានអ្វីប្លែក ។ ខ្ញុំមិនដឹងថាវាជាអ្វីទេ ប៉ុន្តែវាមានអារម្មណ៍ថាធ្លាប់ស្គាល់ ។ វាជាអារម្មណ៍ល្អ ។ ម៉ាក់ខ្ញុំក៏មានអារម្មណ៍ដូច្នោះដែរ ។
កាលនោះ ខ្ញុំមិនបានដឹងថា ម៉ាក់របស់ខ្ញុំជាសមាជិកនៃសាសនាចក្រនោះទេ ។ គាត់បានទទួលបុណ្យជ្រមុជទឹកកាលនៅជាយុវនារី។ ប៉ុន្តែគាត់ស្ទើរតែមិនដែលទៅព្រះវិហារទេ ។
បន្ទាប់ពីយប់នោះមក ម៉ាក់ខ្ញុំបានចាប់ផ្ដើមទៅព្រះវិហារម្ដងទៀត ។ ខ្ញុំបានទៅជាមួយគាត់ដើម្បីស្វែងយល់បន្ថែមទៀត ។ ប៉ុន្មានខែក្រោយមក ខ្ញុំបានទទួលបុណ្យជ្រមុជទឹកដោយប៉ារបស់ រ៉ប់ និងឡេន ។
ខ្ញុំមានអំណរគុណយ៉ាងខ្លាំងដែលរ៉ប់ និងឡេន យកចិត្តទុកដាក់ចំពោះខ្ញុំគ្រប់គ្រាន់ដើម្បីចែកចាយដំណឹងល្អ ។ ថ្ងៃនេះ ខ្ញុំមានពរជ័យដែលមានគ្រួសារដ៏អស់កល្បមួយ ។ ហើយរឿងទាំងអស់បានចាប់ផ្តើមនៅលើទីលានកីឡាបេស្បល !
ដូចរ៉ប់ និងឡេនដែរ គឺ អ្នកមានឥទ្ធិពលខ្លាំងលើអ្នកដទៃ ។ អ្នកអាចធ្វើឲ្យមានភាពខុសប្លែកគ្នានៅក្នុងគ្រួសាររបស់អ្នក ។ អ្នកអាចចែកចាយដំណឹងល្អជាមួយមិត្តភក្តិរបស់អ្នកបាន ។