« Nāhea vau i te bāpetizora’ahia », Hoa, ’Ātete 2023, 12–13.

Nāhea vau i te bāpetizora’ahia

’Ia ora na ! ’O Aranoarii au. Tē ora nei au i Tahiti. E 11 matahiti tō’u, ’e tē ha’apeu nei au ia parau ē, e melo vau nō Te ’Ēkālesia a Iesu Mesia i te Feiā Mo’a i te mau Mahana Hope’a nei.

Nāhea tō ’oe ha’api’ira’a mai nō ni’a i te ’Ēkālesia ?

’Ua ani manihini mai te tahi mau hoa i tō’u ’utuāfare ’ia haere i te hō’ē ’ātivite nā te ’Ēkālesia. ’Ua ani-ato’a-hia mai mātou ’ia haere i te bāpetizora’a ’o te hō’ē tamari’i. ’Ua ani au i tō’u māmā e nehenehe ānei tā’u e fārerei i te mau misiōnare, nō te mea ’ua hina’aro mau vau e ’ite rahi atu ā nō ni’a ia Iesu Mesia.

E aha te huru nō te fārereira’a i te mau misiōnare ?

E mea maita’i roa te mau misiōnare ! ’Ua ’oa’oa vau i te mau taime ato’a e ha’api’ira’a tā’u ’e ’o rāua, nō ni’a ia Iesu Mesia ’e tāna ’evanelia. ’Ua au roa vau i te mau ’ā’amu tā rāua i fa’ati’a mai iā’u ’e te mau ha’uti ’o tā mātou e ha’uti nō te tauturu iā’u ’ia ha’api’i mai.

Mai te aha te huru o tō ’oe bāpetizora’a ?

’Ua bāpetizo tō’u pāpā i tō’u māmā ’e iā’u i te 11ra’a ’o tō’u mahana fānaura’a. ʼUa ’oa’oa roa vau. ’Ua ani manihini mātou e rave rahi ta’ata tā mātou i here. ’Ua haere mai tō’u mau hoa nō te fare ha’api’ira’a ’e tō’u ’orometua ha’api’i nō te turu iā’u.

I tō’u haerera’a mai i rāpae i te pape, ’ua ’ī roa vau i te ’oa’oa. ’Ua tae roa tā’u ’ata i tō’u nā tari’a ! E ’oa’oa rahi tō’u i te mea ē, e ti’a iā’u ’ia pe’e i te hi’ora’a ’o Iesu Mesia.

E aha te huru i te haerera’a i te Paraimere nō te taime mātāmua roa ?

I te ha’amatara’a, ’ua pe’ape’a roa vau ’ua fātata vau i te ta’i. I muri iho rā, ’ua haere atu vau i te hō’ē ’ātivite nā te Paraimere. ’Ua ha’amātau mai au i te mau ta’ata ato’a, ’e ’ua fa’ahoa vau i te tahi o rātou.

Mai te mea e mea ’āpī ’outou, tā’u parau a’o ’ia haere mai i roto i tā outou piha Paraimere, noa atu e taiā ’outou i te ha’amatara’a. ’Ua here mātou i te mau ta’ata ’āpī !

Nāhea ’oe i te pe’e ia Iesu ?

Tē pure nei au ’e tē haere nei au i te purera’a i te mau sābati ato’a. E paraparau vau i tō’u ’utuāfare nō ni’a i te ’evanelia a Iesu Mesia.

Tē tāmata nei au i te ’imi i te tahi atu mau ta’ata tei hina’aro i te tauturu. I te fare, tē tauturu nei au i tō’u māmā i roto i te mau ’ohipa i te fare. E tauturu vau i tō’u pāpā i roto i te ’āua, ’ia tāpū i te rā’au, ’e ’ia hāmani i te tahi mau mea. Tau ’āva’e i ma’iri a’e nei, ’ua fa’atupu tā mātou pāroita i te hō’ē ha’utira’a fa’a’itera’a tāreni. E ta’ata ha’uti ’upa’upa vau, nō reira ’ua ha’uti atu vau i te pahu i terā pō tā’āto’a !