« Pe’ape’a i te ’āua fa’afa’aeara’a », Hoa, ’Ātete 2023, 46–47.
Pe’ape’a i te ’āua fa’afa’aeara’a
Huti pūai a’era Hunter i te aho. « E’ita vau e parau i te reira mau parau ».
’Ua tupu teie ’ā’amu i te fenua Marite.
’Ua horo haere Hunter nā roto i te ’āua fa’afa’aeara’a ’e tōna mau hoa. ’Ua ’ata’ata ’oia ’a ’ite ai ’oia i te mata’i i te revara’a nā mua iāna. E au ra iāna ē, e mea vitiviti roa ’oia ’e te māmā !
Nā mua Kyle i te tāpe’a i te ’āua. « ’Ua rē iā’u ! » ’ua tuō ’oia.
Tāpae mai nei Hunter i te ’āua, ma’a taime noa i muri mai. « ’Aita i tano ! ’Ua ha’amata ’oe nā mua »
« ’Ē », ’ua parau Miguel. « ’A horo na i terā tumu rā’au ra ! »
’Ua ha’amata fa’ahou Hunter i te horo. I tera taime, ’ua tāpe’a ’oia nā mua i te tumu rā’au. Tei muri noa mai rā ’o Miguel iāna.
« ’Ua rē iā’u ! » ’Ua parau Miguel.
« ’Aita, ’ua rē Hunter », parau a’era Piper.
« ’Ē », ’ua parau Kyle.
Tūfene iho ra Miguel i tōna nā rima. I muri iho, parau a’era ’oia i te hō’ē parau ’ino.
’Ua ’ata a’era te tahi mau tamari’i. ’Ua fa’ahiti fa’ahou Miguel i te parau ’ino, ’e ’ua ’ata fa’ahou rātou.
’Oto roa a’era Hunter i roto iāna. ’Ua ’ite ’oia e ’ere teie parau i te mea maita’i ’ia parau. ’Aita rā ’oia i hina’aro ’ia fa’ao’ō’ohia ’oia. ’Aita ’oia i parau a’e hō’ē parau.
’Ua parau Piper i te tahi atu parau ’ino. I muri iho, ’ua parau mai ra Kyle i te tahi.
« I teienei, e parau ’oe te tahi atu, e Hunter », parau mai ra Kyle.
« ’Ē, haere », ’ua parau Miguel. « ’A parau i te hō’ē parau ’ino ’āpī ».
’Ua huti pūai a’era Hunter i te aho. « ’Aita vau e parau nei i te reira mau huru parau ».
Parau mai ra Kyle, « ’aita te paraura’a i te hō’ē parau e ha’amāuiui ia ’oe ».
« ’Aita vau e hina’aro », parau a’era Hunter.
« E aha ho’i ri’ari’a ’oe ? » ’Ata a’era Miguel.
’Ua ’ahu te hōho’a mata o Hunter. « E haere au e ha’uti i te tahi atu vāhi ».
’Ua tāmau noa te toe’a o te mau tamari’i i te ’ata ’e i te parau i te mau parau ’ino. ’Ua hina’aro roa Hunter e horo ’ē. ’Aita te ’āua fa’afa’aeara’a i te mea ’ārearea i teienei. « E fārerei fa’ahou tātou », ’ua parau marū noa ’oia.
Tu’u a’era Hunter i tōna nā rima i roto i tōna nā pūtē ’e ’ua haere marū atu ra nā mua i te tahi atu mau tamari’i. ’Aita ’oia i vitiviti ’e i māmā fa’ahou. ’Ua teimaha roa ra ’oia.
’Ua ’ite atu ’oia ia māmā ’e ia pāpā e pārahi ra i ni’a i te hō’ē pārahira’a. Tu’u a’era pāpā i tāna buka i raro. « Mea maita’i ’oe ? »
Ha’ape’e a’era Hunter i tōna tapono. « ’Ua ha’amata rātou i te parau i te mau parau ’ino. ’Aita vau i hina’aro e nā reira, nō reira ’ua haere mai au ».
’Ua ʼataʼata māmā. « E mea itoito mau ’oe ».
« Tē ha’apeu nei māua ia ’oe », ’ua parau pāpā. « E mea fifi roa ’ia rave i te mau mā’itira’a maita’i, ’ia ’ore ana’e te ta’ata ati a’e ia tātou e nā reira nei ».
Mapu a’era Hunter i tōna aho. ’Ua ’oa’oa ’oia i te ravera’a i te mā’itira’a maita’i, ’aita rā te reira i fa’ahau iāna.
« E hina’aro ānei ’oe e ho’i i te fare ? » Ui atu ra māmā.
Feruri iho ra Hunter. « ’Aita ā », ’ua parau atu ’oia. Hi’o atu ra ’oia i te tahi atu pupu tamari’i e ha’uti ra na ni’a i te zip line. « E haere au i’ō ».
’A haere atu ai Hunter i reira, tārape mai ra te hō’ē o te mau tamāroa iāna. « Hei, ’o David au ».
« ’O Hunter vau. E nehenehe ānei au e ’ōu’a nā muri iho ia ’oe ? »
« ’Oia mau ! »
’Ua rave Hunter hō’ē taime nā ni’a i te zip line ’e ’ua ’ite a’era ’oia i te mata’i i te fararara’a mai. ’A ha’uti noa ai ’oia ’e ’o David ’e vetahi ’ē, ’ua ’ite fa’ahou ’oia i tōna vitiviti ’e te māmā. ’Ua rave ’oia i te mea ti’a, noa atu e mea fifi te reira. ’Ua ’oa’oa ’oia i te ravera’a i te hō’ē mā’itira’a maita’i.
Fa’ahōho’ara’a nā Shawna J. C. Tenney