« Te mohina pape pararī », Hoa, ’Ātete 2023, ’api–’api.
Te mohina pape pararī
’Ua po’ihā Kadie. Nāhea e nehenehe ai ia Sophia e tauturu ?
’Ua tupu teie ’ā’amu i Sierra Leone.
’Ua fa’aro’o maita’i Sophia, ’a fa’ata’a ai tōna ’orometua i te ha’api’ira’a nūmera i ni’a i te tāpura ’ere’ere.
« Nō reira, e hia te maha taime i te iva ? » ui a’era te ’orometua ha’api’i.
’Āfa’i a’era Sophia i tōna rima i ni’a. « E toru ’ahuru mā ono ! » ’ua parau ’oia.
’Ua ’ata’ata tōna ’orometua. « ’Ua tano roa e Sophia ! »
I muri a’e i te ha’api’ira’a, ’ua tae te taime nō te ho’i i te fare. ’Ua haere atu Sophia nā muri iho i tōna mau hoa. ’Ua tātara pā’āto’a mai rātou i tā rātou mau mōhina pape, nō te inu i te pape i toe mai. E mea ve’ave’a roa teie mahana !
’Ua ’ite atu ra Sophia i te hō’ē ’ohipa huru ’ē. ’Aita tōna hoa ’o Kadie e inu ra i te pape. ’Ua haere noa ’oia ma te hau.
« Kadie, tei hea tā ’oe mōhina pape ? » Ui atu ra Sophia. E po’ihā iho ā te mau pīahi ato’a i te taime fa’aotira’a ha’api’ira’a.
« ’Ua pararī i nanahi ra ’e e’ita e ti’a iā’u e fāri’i i te hō’ē mohina ’āpī », ’ua parau atu Kadie. « Nō reira, i teienei e’ita tā’u e nehenehe e ’āfa’i mai i te pape i te fare ha’api’ira’a ».
Hi’o a’era Sophia i tāna iho mōhina pape. ’Ua hina’aro ’oia e hōro’a i te tahi pape ! Terā rā, ’ua pau roa tāna pape.
I te tā’āto’ara’a o te mahana, ’ua feruri noa Sophia ia Kadie ’e tāna mōhina pape pararī. E ’ere i te mea ’ōhie ’ia fāri’i i te pape mā i te vāhi tā rātou e ora ra. Te rahira’a o te mau tamari’i hō’ē ana’e mōhina pape tā rātou nō te matahiti tā’āto’a. E fa’a’ī rātou i te reira i roto i te hō’ē fa’ari’i pape rahi mā i te fare. E nehenehe ’outou e ma’ihia ’ia inu i te tahi atu pape. Mai te mea ’aita tā Kadie e mōhina pape, e’ita tāna e nehenehe e rave mai i te pape i te fare nō te inu i te fare ha’api’ira’a.
I te po’ipo’i a’e, ’ua feruri Sophia e nāhea e ti’a ai iāna ’ia tauturu ia Kadie. Tē vai ra tā te ’utuāfare ’o Sophia te tahi mau mōhina ’ūrina tei ’ī i te pape. ’Ua tu’u Sophia hō’ē mōhina i roto i tāna pūtē tua ’e tāna mōhina ’āuri. E fa’ateiaha ri’i te reira i te pūtē, ’aita rā ’oia i ha’apa’o i te reira.
I tōna taera’a i te fare ha’api’ira’a, ’ua ’ite atu ’oia ia Kadie.
« Kadie, ’ua roa’a ānei tā ’oe hō’ē mōhina pape ’āpī ? » Ui atu ra Sophia.
’Ua tā’iri’iri Kadie i tōna upo’o ma te hi’o i raro.
« ’Aita e fifi », ’ua parau Sophia. « Tē vai ra tā’u hō’ē nā ’oe ! »
’Ua hōro’a atu ’oia ia Kadie te mōhina pape ’ūrina. ’Ua ’ata’ata Kadie.
« Māuruuru, Sophia ! » Tauahi atu ra Kadie i tōna hoa.
I roto i te piha ha’api’ira’a, ’ua inu Kadie i tāna mōhina pape ’e te tahi atu mau tamari’i. ’Ua ’oa’oa roa Sophia i te ’itera’a ē, ’aita tōna hoa e po’ihā fa’ahou.
I te mau mahana ato’a i taua hepetoma ra, ’ua ’āfa’i mai Sophia i te hō’ē mōhina pape hau nā tōna hoa. I te hō’ē po’ipo’i, ’ua rave mai te māmā o Sophia i tāna pūtē tua.
« Hmm », ’ua parau māmā. « Mai te huru ra e mea teiaha a’e teie, i tei mātauhia ». Tātara iho ra ’oia i te pute tua ’e ’īriti mai ra i te mōhina pape hau.
« Tē ’āfa’i ra ’oe i teie mōhina pape hau i te fare ha’api’ira’a, e Sophia ? » Ui atu ra māmā.
Ta’iri’iri iho ra Sophia i te upo’o. « ’Ua pararī te mōhina pape a Kadie ’e ’aita tāna e nehenehe e fāri’i i te tahi atu mōhina. Nō reira, ’aita tāna e pape i te fare ha’api’ira’a ».
« E aha te maorora’a tō ’oe ’āfa’ira’a i te pape nāna ? » Ui a’era māmā.
« I teie noa hepetoma », ’ua parau atu Sophia. « ’Aita vau i hina’aro ia Kadie ’ia po’ihā ».
’Ua ʼataʼata māmā. « Mea maita’i roa ’oe i te ferurira’a i tō ’oe hoa. Terā te hō’ē mea tā Iesu e rave. Tē ’oa’oa nei au ’ia ’ite ia ’oe ’ia riro mai ia Iesu te huru ». ’Āpā iho ra ’oia ia Sophia. « ’E tē mana’o nei au ’ua ’ite au i te tahi atu rāve’a e nehenehe ai tāua e tauturu ».
’Ua hōro’a atu māmā ia Sophia i te hō’ē mōhina pape auri. « ’A hōro’a i teie nā tō ’oe hoa, ’ia nehenehe iāna ’ia fa’a’ohipa noa i te reira. ’Aita ïa ’oe e rave noa i te mau mahana ato’a i te hō’ē mōhina pape ’ūrina ».
« E parau mau ? » Ui a’era Sophia.
’Ua tā’iri’iri te upo’o o māmā. « ’Ē. ’A ani noa iāna ’ia ha’apa’o maita’i ».
’Ua ’āfa’i Sophia i te mōhina pape i te fare ha’api’ira’a. Te ’ohipa mātāmua tāna i rave o te hōro’ara’a ïa i te mōhina ’āuri ia Kadie.
« Wow », ’ua parau Kadie. « Māuruuru roa e Sophia ! » ’Āpā iho ra Kadie iāna.
’Ua fāri’i Sophia i te māhanahana ’ōroto iāna. ’Ua ’ite ’oia, ’ua tauturu ’oia i tōna hoa, mai tā Iesu e nā reira.
Faʼahōho’araʼa nā Melissa Kashiwagi