« E hōro’a ta’a ’ē », Hoa, ’Ātete 2023, 18–19.
E hōro’a ta’a ’ē
« Pāpū roa, ’o te Vārua Maita’i teie », mana’o a’e ra Mehrimah.
’Ua tupu teie ’ā’amu i Farāni.
« Mehrimah ! Fatima ! Teie te mau misiōnare », ’ua tuō māmā.
Tāpiri iho ra ’o Mehrimah i tāna buka ’ā’amu pāpa’ira’a mo’a ’e ’ua horo atu i roto i te piha fa’afa’aeara’a. ’Ua ha’api’i te mau misiōnare i tō rātou ’utuāfare nō ni’a ia Iesu Mesia. Fātata roa Mehrimah ’e tōna ’utuāfare i te bāpetizohia. Tē tīa’i rū nei ’oia !
Pārahi mai ra Mehrimah i pīha’i iho i tōna ’utuāfare.
« I teie mahana e parauparau tātou nō ni’a i te Vārua Maita’i », ’ua parau Elder Moea’i. « E tauturu ’oia ia tātou ’ia fāri’i i te hau ’e te tāmāhanahana nō ’ō mai i te Metua i te ao ra ».
« E fa’aitoito ato’a ’oia ia tātou ’ia rave i te mau ’ohipa maita’i », ’ua parau mai Elder Campbell. « ’E e tauturu ’oia ia tātou ’ia ’ite e aha te parau mau. ’Ua fāri’i a’ena paha ’outou i te Vārua Maita’i nā mua a’e nei ».
’Ua feruri Mehrimah i te taime ’a ha’api’i mai ai ’oia nō ni’a ite Buka a Moromona. ’Ua fāri’i ’oia i te hau ’e te ’oa’oa. E mea nā reira tōna ’itera’a ē, e parau mau te reira. ’O te Vārua Maita’i ānei te reira ?
« I muri mai i tō ’outou bāpetizora’a, e hōro’ahia ia ’outou te hōro’a o te Vārua Maita’i », ’ua parau atu Elder Moea’i. « Te aura’a e nehenehe ’oia e pārahi tāmau noa i pīha’i iho ia ’outou, nō te tauturu ’e nō te arata’i ia ’outou ».
« I teie hepetoma, ’a ara maita’i i tō ’outou mau mana’o ’e te mau nino’a mana’o », ’ua parau Elder Campbell. « ’A ’imi i te mau taime ’a parauparau mai ai te Vārua Maita’i ia ’outou ».
I taua pō ra i roto i te pure ’utuāfare, ’ua ’ite Mehrimah i te mea tāna e putapū ra. ’Ua fāri’i ’oia i te marū ’e te hau. Fātata roa mai te mea ra te tauahi ra te hō’ē ta’ata iāna. Pāpū roa, ’o te Vārua Maita’i teie, ’ua mana’o ’oia.
I te fare purera’a i te sābati, ’ua fa’aro’o Mehrimah i te hō’ē hīmene nō ni’a ia Iesu Mesia. ’Ua ’oa’oa roa ’oia. ’Ua fa’atupu te reira i te hina’aro i roto iāna ’ia tauturu i te tahi atu mau ta’ata. Pāpū roa, ’o te Vārua Maita’i ato’a teie, i tōna mana’o.
Hou ’a haere ai i ni’a i te ro’i, ’ua tai’o Mehrimah i tāna buka ’ā’amu pāpa’ira’a mo’a. ’Ua ani atu tōna tuahine ’o Fatima, e tai’o ato’a. ’Ua parau atu Mehrimah, ’aita.
’Ua tāmau noa Mehrimah i te tai’o. ’Ua ’oto rā ’oia i te ’orera’a e fa’ati’a.
« Tē tātarahapa atu nei au », tāna ïa parau ia Fatima. « Hina’aro ’oe e tai’o ’āmui tāua ? »
Pārahi mai ra Fatima i pīha’i iho iāna. Tai’o a’era rāua, te tahi i muri mai i te tahi. ’Ua fāri’i Mehrimah i te māhanahana ’e te ’oa’oa. Pāpū roa, ’o te Vārua Maita’i teie, ’ua mana’o ’oia.
I te hope’a, tae mai nei te mahana nō tō rātou bāpetizora’a. ’Ua haere atu Mehrimah ’e tōna ’utuāfare i te fare purera’a ’e ’ua taui ia rātou i te ahu ’uo’uo.
’Ua bāpetizohia ’o Mehrimah nā mua. E mea to’eto’e te pape, ’ua ’oa’oa rā ’oia i te ravera’a i te fafaura’a ’e te Metua i te ao ra. ’Ua pū’ohu a’era māmā iāna i te hō’ē tauera. I muri iho, ’ua hi’o ’oia ia māmā, ia pāpā ’e ia Fatima ’ia bāpetizohia.
’Ua taui fa’ahou Mehrimah i tōna ’ahu marō. I teienei, ’ua tae ïa i te taime nōna ’ia ha’amauhia.
’Ua tu’u te mau misiōnare i tō rāua rima i ni’a i te upo’o ’o Mehrimah. « Tē ha’amau nei māua ia ’oe ’ei melo nō Te ’Ēkālesia a Iesu Mesia i te Feiā Mo’a i te mau Mahana Hope’a nei » ’ua parau Elder Campbell, « ’e tē parau atu nei māua ia ’oe, ’a fāri’i mai i te Vārua Maita’i ». ’Ua tupu te māhanahana i roto i te tino tā’āto’a o Mehrimah ’a fa’aro’o ai ’oia i te toe’a o te ha’amaita’ira’a.
I muri a’e i te ha’amaura’ahia Mehrimah, ’ua tauahi mai māmā iāna. « E aha tō ’oe huru ? »
« Mea maita’i roa », te parau ïa a Mehrimah. « I muri a’e i tō rātou tu’ura’a i tō rātou rima i ni’a i tō’u upo’o, ’ua ’ite au i te tahi mea, ’e mai te hau ra te huru ». ’Ua ʼataʼata ʼoia. « Mai te huru ē, tē parau mai ra te hō’ē ta’ata iā’u ’ia ora i te hō’ē orara’a maita’i, ’ia tauturu i te ta’ata ’e ’ia ha’apa’o i te mau fa’uera’a ».
« ’Ua ’ite ānei ’oe e aha tā ’oe e putapū ra ? ’Ua ui atu māmā.
« ’Ē, ’ua ’ite au », ’ua parau Mehrimah, ma te mata ’ana’ana. « ’O te Vārua Maita’i ïa ! »
Fa’ahōho’ara’a nā Alyssa Petersen